ފަހުގެ ތާރީޚެއްގައި ދިވެހި ގައުމު ސިއްސުވާލި އެންމެ ބޮޑު އެއް ޚަބަރަކަށް ވެފައި ވަނީ ދައުލަތުގެ ވިޔަފާރި ކުންފުނިތަކުގެ ތެރެއިން އެންމެ މުއްސަނދި އަދި އެންމެ ބޮޑު ފައިދާއެއް ލިބޭ ކުންފުނިތަކުގެ ލިސްޓުގެ އެއް ވަނައިގައި އޮތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ބޮޑު ވައްކަމާއި ހިޔާނާތުގެ ވާހަކައެވެ.
ރައްޔިތުންގެ ފައިސާއިން އެތައް މިލިއަން ޑޮލަރެއް ހަރަދުކޮށްގެން ހުޅުމާލޭގައި ހިއްކާފައި ހުރި ބިންތަކެއް އެޗްޑީސީން ވަގަށް ވިއްކާލި ވާހަކައެވެ.
ބޯހިޔާވަހިކަން ތަދު މި ގައުމުގައި އެންމެ ބޮޑު ޒިންމާއެއް މަތިކުރެވިފައި އޮތް ކުންފުނި، އެޗްޑީސީން އެތައް ހާސް ރައްޔިތުންގެ މަސްލަހަތު ހިމެނޭ ބިންތަކާއި ގޯތިތަކެއް ނަހަމަ ގޮތުގައި ބަޔަކަށް ދިން ވާހަކައެވެ.
ތެދެކެވެ. މިއީ ދިވެހި ނިކަމެތި ރައްޔިތުނެ ލޯކުރިމައްޗަށް ފެންނަން އޮތް ވަރަށް ބޮޑު ތެދު ހަގީގަތެކެވެ.
މިކަހަލަ އެތައް ކަމެކެވެ. އެތަކެއް ވައްކަމާއި ހިޔާނާތާއި ކަރަޕްޝަންގެ މައްސަލަތެކެވެ. މި ސަރުކާރަށް މިވީ އަހަރެއްހައި ދުވަހުގެ ތެރޭގައި ވައްކަމާއި ހިޔާނާތާއި ކަރަޕްޝަން ނޫން ކަމެއް ކޮށްފައި ނުވާކަމަށް ގައުމުގެ ގިނަ ރައްޔިތުން ދަނީ ބުނަމުންނެވެ.
ވެރިކަމުގެ ތާޖަށް ދަހިވެތިވެ، ވެރިކަމަށް އައުމަށް މިހާރުގެ ރައީސް ދެއްކި އެތަކެއް ވާހަތަކާއި ވެފައިވާ ވައުދުތަކުގެ ބޭނުމެއް ނެތެވެ. ރައްޔިތުން ގުނބޯހެއްދުމަށް ފަހު ވެރިކަމަށް ވަޑައިގެން ކުރައްވަމުން ގެންދަވާ ކަމަކީ އަމިއްލަ ޖީބު ބޮޑުކުރުން ނޫން ކޮންކަމެއްތޯއެވެ.
ވެރިކަމުގެ އާރާއި ބާރު ލިބުމުން، ނިކަމެތި ރައްޔިތުންނަށް އަނިޔާވެރިވެ، ނިކަމެތިކަން ދެމުން ގެންދަވާއިރު، ރައީސްގެ ހިތްޕުޅަށް ހަމަ އެއްވެސް އެއްޗެއް އަރައިވަޑައިނުގްނަނަވަނީތޯ ސުވާލު އުފެދެއެވެ.
ރައީސެވެ. މަނިކުފާނު ވެރިކަމުގެ ތާޖު އަޅުއްވައިގެން، ތަހުތުގައި އިންނަވާއިރު، ދިވެހި ރައްޔިތުންގެ މުދަލާއި ފައިސާ އަށް ސަރުކާރުގެ ތެރެއިން ޚިޔާނާތްތެރިވަމުން ދާއިރު، އެކަންކަން ފެންމަތި ވީމާ އެނގިވަޑައި ނުގަންނަވައޭ ވިދާޅުވުމަކުން ނުފުދެއެވެ. އެ ކަންކަމުގެ ފުރިހަމަ ޒިންމާ ނަގްވަން ޖެހިވަޑައިގަންނަވާނެ ދުވަހެއް އެބައޮތެވެ.
ދީނީ ދަންނަބޭކަލުން ބުނާތީ އަހަމެވެ. މުސްލިމަކަށް، މުއުމިނަކަށް ހަމަ އެކަނި ފަރުޟު ފަސް ނަމާދުކުރުމަކުން އަދި ނުފުދެއެވެ. އެ އާއި އެކު އެހެން އަމަލުތައްވެސް ސީދާ ވާން ޖެހެއެވެ. އޭގެތެރޭގައި އަމަލާއި ބަހާ ދިމާނާން ވެސް ޖެހެއެވެ. ދޮގުހެދުމާއި ވައްކަން ކުރުންފަދަ ނުބައި އަމަލުތަކުން ދުރުވާން ޖެހެއެވެ. އެހެން ނޫނީ ކުރާ ނަމާދަކުން ލިބޭނޭ މަންފާއެއް ނޯންނާނޭ ކަމަށް ދަންނަބޭކަލުން ބުނާތީ އަހަމެވެ.
މަނިކުފާނެވެ. ނިކަމެތި ރައްޔިތެއްގެ ހައިސިއްޔަތުން ބުނެލަން ބޭނުންވާ ވާހަކައެއް އެބައޮތެވެ. އެއީ މިހާރު މި ގައުމުގެ ރައްޔިތުން މަނިކުފާނުގެ ސަރުކާރަށް އިތުބާރު ނުކުރާ ވާހަކައެވެ. އަދި ވެރިއެއްގެ ގޮތުން ވެސް މަނިކުފާނު ބަލައިނުގަންނަ ވާހަކައެވެ. ހަމަ ޔަގީނުންވެސް މިހާރަކު ރައްޔިތުންގެ ތާއީދެއް، ލޯތްބެއް މަނިކުފާނަކަށް ނެތެވެ.
ސަބަބުތައްވެސް ބައިވަރެވެ. ގިނަ ރައްޔިތުން ބުނާގޮތުން ނަމަ މަނިކުފާނަކީ އަމަލާއި ހަބާ ދިމާނުވުމުގެ އިތުރުން، އިންތިހާއަށް އިތުރުފުޅު ހެއްދެވުމުގައި ވެސް އަރައި ހުންނެވެވި ބޭފުޅަކަށް ވުމެވެ.
އެކަން ދިވެހި ރައްޔިތުންނަށް އެނގި ހާމަވެގެން ދިޔައީ ދާދި މިދާކަށް ދުވަހު އެޗްޑީސީގެ ބޮޑު ވައްކަމާއި ހިޔާނާތުގެ މައްސަލާއި ގުޅިގެން ދިވެހިން ރައްޔިތުންގެ ކުރިމަތީގައި މަނިކުފާނު ހެއްދެވި އިތުރުފުޅުގެ ސަބަބުންނެވެ.
އެޗްޑީސީ ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާ ގުޅޭ ގިނަ މައްސަލަތަކެއް ފާހަގަކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު ފޮނުވި ސިޓީ ނުލިބޭ ކަމަށް ވިދާޅުވެ، މަނިކުފާނު ހެއްދެވީ ބޮޑު އިތުރުފުޅެކެވެ.
އާދެ، އަޅުގަނޑު ވެސް ތި ވާހަކަ އަޑުއެހިން. އަޅުގަނޑަކަށް ނުލިބޭ އިނގޭތޯ ސިޓީއެއް. އަޅުގަނޑަށް ތި ވިދާޅުވާ ސިޓީއެއް އައިސްފައެއް ނެތް، ނުލިބޭ. އަޅުގަނޑަށް ލިބުނު ނަމަ އަޅުގަނޑު އެއަށް އަމަލުކުރާނަން ނުވަތަ އެއަށް ބަލާނަން.ރައީސް މުއިއްޒު
މިއީ އޭރު މަނިކުފާނު މީޑިއާގައި ވިދާޅުވި ވާހަކަފުޅެވެ. އެހެން ނަމަވެސް މިކަން ދިވެހި ރައްޔިތުނަށް ވަރަށް ސާފުކޮށް އެނގެއެވެ. އެ ސިޓީ މަނިކުފާނުގެ އޮފީހުން ބަލައިގެންފައިވާ ކަމުގެ ރަސްމީ ލިޔުމުގެ ކޮޕީއެއް މީޑިއާގައި ދައުރުވާން ފެށުމާއި ގުޅިގެންނެވެ.
މިއީ މަނިކުފާނު އިތުރުފުޅުހެއްދަވާކަން ރައްޔިތުންނަށް އެނގި ހާމަވި ކުޑަ މިންވަރެކެވެ. އަދި މިއަށް ވުރެ، ބޮޑެތި އިތުރުފުޅުތައް ވެސް މަނިކުފާނު ހައްދަވަމުން ގެންދަވާކަމަށް މިއަދު މުޅި ގައުމުގެ ރައްޔިތުން ދަނީ ބުނަމުންނެވެ. ވެވަޑައިގެންނެވިހާ ވައުދުތައް އެއީ ނެތް އެއްޗެއް ކަމަށް ހައްދަވައިފިއެވެ. ޓެކްސް ބޮޑު ނުކުރާނެ ކަމަށް ވިދާޅުވެ ޓެކްސް ބޮޑު ކުރައްވައިފިއެވެ. މީހުން ވަޒީފާތަކުން ނުކަނޑާނެ ކަމަށް ވިދާޅުވެ އެތައް ބަޔަކު ވަޒީފާތަކުން ކަނޑާ އުކާލައިފިއެވެ. ގޯއްޗާއި ފުލެޓްވެސް ލިބިފައި އޮތް ތާކުން ލިބިފައި އޮތް މީހަކަށް ދެއްވާނެ ކަމަށް ވިދާޅުވެ، ފަހުން އެ ތަންތަން ދޫކުރަން އުޅުނު ސަރުކާރުގެ އޮފިޝަލުން ވީ ބޮޑެތި މުޖުރިމުންނަށެވެ. މިފަދަ އެތައް ކަމެކެވެ.
ދެން މިކަމުގައި ކިޔާނެ އެއްޗެއް ދައްކާނެ ވާހައެއް ނެތެވެ. ރައްޔިތުން މިހާރު ބޭނުންވަނީ މަނިކުފާނު އިސްތިއުފާދެއްވާފައި ގެއަށް ވަޑައިތުމެވެ. މިއީ މި ގައުމަށް މިހާރު އެންމެ ފައިދާހުރި ގޮތް ކަމަށް ގިނަ ރައްޔިތުން ގަބޫލުކުރާގޮތެވެ.
