ޗައިނާގެ ސަރުކާރުން ސްޕޮންސަރ ކުރާ ހެކަރުން މި މަހުގެ ކުރީކޮޅު އެމެރިކާގެ ޓްރެޜަރީ ޑިޕާޓްމަންޓްގެ ސިސްޓަމްތަކަށް ވަދެ، މުވައްޒަފުންގެ ވަރކްސްޓޭޝަންތަކާއި ބައެއް ލިޔެކިޔުންތަކަށް ވާސިލުވެފައިވާ ކަމަށް އެމެރިކާގެ އޮފިޝަލުން ބުނެފިއެވެ.
މި މައްސަލައާ ގުޅޭގޮތުން އެމެރިކާގެ ޤާނޫނު ހަދާ މަޖިލީހުގެ މެންބަރުންނަށް ފޮނުވި ސިޓީއެއްގައި މިކަން ހާމަކުރުމަށްފަހު، ޓްރެޜަރީ ޑިޕާޓްމަންޓުން މި ހެކްކުރުން "ބޮޑު ހާދިސާއެއް" ގެ ގޮތުގައި ސިފަކޮށްފައިވެއެވެ.
ހެކްކުރުމުގެ ލިބުނު ގެއްލުން ދެނެގަތުމަށް އެފްބީއައި އިން އެހެނިހެން އޭޖެންސީތަކާއެކު މަސައްކަތްކުރަމުންދާ ކަމަށް ޓްރެޜަރީ ޑިޕާޓްމަންޓުން ބުނެފައިވެއެވެ.
ޗައިނާ އިން މިކަމުގައި އެއްވެސް ބައިވެރިވުމެއް ނެތް ކަމަށް ބުނެ، މި ތުހުމަތަކީ "އަސާސެއް ނެތް" ތުހުމަތެއް ކަމަށާއި، ޗައިނާ އިން "ހުރިހާ ބާވަތެއްގެ ހެކްކުރުމާ އަބަދުވެސް ދެކޮޅު ހަދާ" ކަމަށް ވަނީ ބުނެފައެވެ.
މިއީ އެމެރިކާގައި ހިނގާފައިވާ، ހެކްކުރުމުގެ އަމަލުތަކުގެ ތެރެއިން ޗައިނާގެ މައްޗަށް ތުހުމަތުކުރެވޭ، މަޝްހޫރު އަދި ލަދުވެތި ސެކިއުރިޓީ ފޫ އަޅުވާލި ހާދިސާތަކުގެ ތެރެއިން އެންމެ ފަހުގެ ހާދިސާއެވެ.
ޑިސެމްބަރު މަހު ހިނގި ޓެލެކޮމް ކުންފުނިތައް ހެކްކުރުމުގެ ހާދިސާ ގައި އެމެރިކާގެ ގިނަ ބައެއްގެ ފޯނު ރެކޯޑުތަކުގެ މަޢުލޫމާތަކަށް ހެކަރުން ވާސިލުވެފައިވާ ކަމަށް ބެލެވެއެވެ.
ޤާނޫނު ހަދާ މަޖިލީހުގެ މެންބަރުންނަށް ފޮނުވި ސިޓީގައި ޓްރެޜަރީ ޑިޕާޓްމަންޓުން ބުނެފައިވަނީ އެންމެ ފަހުގެ ސައިބަރ ހަމަލާގައި ޗައިނާގައި ތިބި ފަރާތްތަކުން ތިންވަނަ ފަރާތެއްގެ ޚިދުމަތް ހޯދާ ކީއެއް މެދުވެރިކޮށް ސެކިއުރިޓީ ފޫއަޅުވާލާފައިވާ ކަމަށެވެ.
ކޮމްޕްރޮމައިޒްވެފައިވާ ތިންވަނަ ފަރާތް ކަމަށް އެ ޑިޕާޓްމަންޓުން ބުނާ - ބިޔޮންޑްޓްރަސްޓް - އޭގެ ފަހުން އޮފްލައިން ވެފައިވާ ކަމަށް ބުނެފައިވެއެވެ. އޭގެ ފަހުން ހެކަރުންނަށް ޓްރެޜަރީ ޑިޕާޓްމަންޓްގެ މަޢުލޫމާތަށް ވާސިލުވެވިފައިވާކަމުގެ އެއްވެސް ހެއްކެއް ނެތް ކަމަށް ވެސް ބުނެފައި ވެއެވެ.
ހެކް ކުރުމުގެ ސަބަބުން ލިބުނު ޖުމްލަ ގެއްލުން ދެނެގަތުމަށް ސައިބަރ ސެކިއުރިޓީ އެންޑް އިންފްރާސްޓްރަކްޗަރ ސެކިއުރިޓީ އޭޖެންސީ އާއި ފޮރެންސިކް ތަޙުޤީޤުކުރާ ފަރާތްތަކާ އެކު މަސައްކަތްކުރަމުންދާ ކަމަށް އެ ޑިޕާޓްމަންޓުން ބުނެފިއެވެ.
އޮފިޝަލުން ބުނެފައިވަނީ ތަޙުޤީޤުތަކުން ދައްކާގޮތުން ހެކް ކުރުން ކުރިއަށް ގެންގޮސްފައިވަނީ "ޗައިނާގައި ހުރި އެޑްވާންސްޑް ޕަރސިސްޓަންޓް ތްރެޓް (އޭޕީޓީ) އެކްޓަރެއް" ކަމަށެވެ.
އެމެރިކާގެ ޓްރެޜަރީ ޑިޕާޓްމަންޓަކީ ދުނިޔޭގެ މާލީ ނިޒާމުތަކާއި އިޤްތިޞާދުތައް މޮނިޓަރކޮށް، ފަހަކަށްއައިސް ޗައިނާގެ މައްޗަށް ފިޔަވަޅުތައް އަޅާފައިވާ މުއައްސަސާއެކެވެ.
މި ހާދިސާއާ ގުޅޭ އިތުރު ރިޕޯޓެއް 30 ދުވަހުގެ ތެރޭގައި ޤާނޫނު ހަދާ މަޖިލީހުގެ މެންބަރުންނަށް ފޯރުކޮށްދޭނެ ކަމަށް ވެސް ޓްރެޜަރީ ޑިޕާޓްމަންޓުން ބުނެފައިވެއެވެ.
ޗައިނާގެ ހާރިޖިއްޔާގެ ތަރުޖަމާނު އެމެރިކާގެ ތުހުމަތުތައް ދޮގުކޮށް، ނޫސްވެރިންގެ ބައްދަލުވުމެއްގައި ބުނެފައިވަނީ މިއީ "ހެކި ނެތް، އަސާސެއް ނެތް، ތުހުމަތުތަކެއް" ކަމަށެވެ.
"ޗައިނާއިން އަބަދުވެސް ހުރިހާ ބާވަތެއްގެ ހެކްކުރުމަކަށް ދެކޮޅުހަދައެވެ. އަދި ސިޔާސީ މަޤްޞަދުތަކަށްޓަކައި ޗައިނާއަށް އަމާޒުކޮށް ދޮގު މަޢުލޫމާތު ފެތުރުމާމެދު ހަރުކަށި އިބާރާތުން ދެކޮޅުހަދައެވެ."
ފާއިތުވި އަހަރު، ޗައިނާ ސަރުކާރުގެ ހެކަރުންނަށް ނިސްބަތްކުރެވޭ ދެ ގްރޫޕެއް ފާހަގަކުރެވިފައިވެއެވެ.
އެއީ ވޯލްޓް ޓައިފޫން އާއި ސޯލްޓް ޓައިފޫން ކިޔާ ދެ ގްރޫޕެވެ. މި ދެގްރޫޕް ގެ މައްޗަށް ބޮޑެތި އަދި ސީރިއަސް ތުހުމަތު ތަކެއް ވަނީ ކޮށްފައެވެ.
ޗައިނާއިން އާންމުކޮށް މިފަދަ ކަންކަމުގައި ބައިވެރިވުން ދޮގުކުރެއެވެ. އަދި ވޮޝިންގްޓަން ޑީސީ ގައި ހުރި ޗައިނާގެ އެމްބަސީގެ ތަރުޖަމާނު ލިއު ޕެންގްޔޫ ބީބީސީ ނިއުސް އަށް ބުނެފައިވަނީ މި ތުހުމަތަކީ އެއްވެސް ޙަޤީޤަތެއްގެ މައްޗަށް ބިނާވެފައިނުވާ ބަދުނާމުކުރުމުގެ ހަމަލާއެއްގެ ބައެއް ކަމަށެވެ.
މި ހެކްކުރުމުގައި ޗައިނާ ޒިންމާވާންޖެހޭ ކަމުގެ އެއްވެސް ހެއްކެއް އެމެރިކާއިން ހާމަކޮށްފައެއް ނުވެއެވެ.
