މި ސަރުކާރުން އަރަބިއްޔާ ސްކޫލު ބޭނުންކުރަނީ ސިޔާސީ ޓޫލެއްގެ ގޮތުގައި ކަމަށް އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ ތައުލީމީ ދާއިރާއަށް ހެޔޮ އެދިގެން އަރަބިއްޔާ ސްކޫލު އިމާރާތް ކުރުމަށް މަސައްކަތް ކުރާ މަންޒަރު ނުފެންނަ ކަމަށެވެ. އަދި ރަނގަޅު ތައުލީމެއް ފޯރުކޮށްދޭ ނިޒާމެއްގެ ތެރެއިން ހަރުދަނާ ގޮތެއްގައި ހިނގާ ސްކޫލަކަށް އަރަބިއްޔާ ސްކޫލު ހެދުމަށް މަސައްކަތް ކުރުމުގެ ބަދަލުގައި ސިޔާސީ ގޮތުން ޕޮއިންޓް ހޯދުމަށް ނުވަތަ ސިޔާސީ މަންފާތަކެއް ހޯދުމަށް ބޭނުންކުރާ ޓޫލްއެއް ގޮތަށް އަރަބިއްޔާ ސްކޫލު ބޭނުންކުރަމުންދާ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ އަރަބިއްޔާ ސްކޫލުގެ ކަންކަމުގައި ރައްޔިތުންނަށް އޮޅުވާލުމަށް މަސައްކަތް ކުރަމުންދާ ކަމަށެވެ.
މީގެ އިތުރުން އިހުސާން ވިދާޅުވީ ކުރީ ސަރުކާރުގައި އަރަބިއްޔާ ސްކޫލު އެޅުމަށް މަސައްކަތް ކުރީ ބައު ޖަމާލުއްދީން ސްކޫލު ހުރި ބިމުގައި ކަމަށާއި، ނަމަވެސް އެބިން އޮތީ މާލެސިޓީ ކައުންސިލް ބެލުމުގެ ދަށުގައި ކަމަށެވެ. އަދި އޭރު މޭޔަރކަށް ހުންނެވި މިހާރުގެ ރައީސް ޑރ.މުހައްމަދު މުއިއްޒު އެކަމަށް ހުރަސްއެޅުއްވި ކަމަށް އިހުސާން ވިދާޅުވިއެވެ.
މިއަހަރުގެ ފެބްރުއަރީ މަހުގެ 24 ވަނަ ދުވަހު ވަޒީރު އަރަބިއްޔާ ސްކޫލު އެޅުމަށް ހަމަޖެހިފައިވާ ބިމަށް ވަޑައިގެން ޓްވީޓެއް ކުރައްވާ ވިދާޅުވި ތިމަންނަ މިދިޔައީ އަރަބިއްޔާ ސްކޫލުގެ މަސައްކަތް ހިނގާ ނުހިނގާގޮތް ބަލާލާށޭ. ނަމަވެސް 17 ނޮވެންބަރު 2024 ގައި އަނެއްކާވެސް އަރަބިއްޔާ ސްކޫލުގެ އަމަލީ މަސައްކަތް ވަނީ ފަށާފައި. އެދުވަހު އަމަލީ މަސައްކަތް ފެށިއިރު ކުރިން ފެށި މަސައްކަތުގެ އެއްވެސް ކަމެއް ފެންނާކަށް ނެތް.އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން
އަރަބިއްޔާ ސްކޫލުގެ އާ އިމާރާތް އެޅުން ލަސްވެގެންދިޔައީ ރައްޔިތުންގެ ފައިސާއިން 80 ވަރަކަށް މިލިއަން ރުފިޔާ ސަލާމަތްކުރަން ކުރި މަސައްކަތްތަކުގެ ސަބަބުން ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެފައިވާތީ އެކަމަށް ރައްދު ދެއްވައި އިހުސާން ވިދާޅުވީ މިއީ ހަގީގަތާއި ހިލާފު ވާހަކަތަކެއް ކަމަށެވެ.
ކުރިން އަޅުގަނޑުމެން އިމާރާތް ކުރުމަށް ކަނޑައަޅާފައިވާ ޖާގައަށް ވުރެ ކުޑަ ޖާގައެއް. އަޅުގަނޑުމެން ކުރިން 168 މިލިއަން ރުފިޔާއަށް އަޅުގަނޑުމެން ހަވާލުކުރީ އަރަބިއްޔާ ސްކޫލުގެ އިމާރާތާއި، އަދި އޭގެ އިތުރަށް ޖަމާލުއްދީން ސްކޫލުގެ 34 ކްލާސްރޫމްގެ އެނެކްސްއާއެއްކޮށް އިމާރާތް ކުރުމަށް. އެހެންނަމަވެސް މިއަދު އަރަބިއްޔާ ސްކޫލުގެ އިމާރާތް ކުރުމަށް އެތައް މިލިއަން ރުފިޔާއަކަށް އެތަން އެހަވާލުކުރީ. ކޮށްފައި މިބުނަނީ ތިމަންނަމެން މިއުޅެނީ 80 މިލިއަން ރުފިޔާ ސަލާމަތް ކުރާށޭ. ސުވާލަކީ ކޮބައިހޭ ޖަމާލުއްދީން ސްކޫލުގެ 34 ކްލާސްރޫމް އެނެކްސް. ކޮބައިހޭ އެތަނުގައި ހަރުކުރަން ނިންމާފައިވާ ލިފްޓް. އެއިމާރާތުގެ ގާއިމްކުރާ ޕާކިން އޭރިޔާ ކޮބައިތޯއޭ.އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން
އަރަބިއްޔާގެ އާ އިމާރާތް ހަދަން އަމީން ކޮންސްޓްރަކްޝަންސްއާ ހަވާލުކުރީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި 29 ސެޕްޓެމްބަރު 2022 ގައެވެ. އޭރު އެ މަސައްކަތް ހަވާލުކުރީ 420 ދުވަހުގެ ތެރޭގައި ނިންމާ ގޮތަށް، ޖުމުލަ 168.5 މިލިއަން ރުފިޔާއަށެވެ.
ނަމަވެސް މިސަރުކާރުން ވަނީ އަރަބިއްޔާ އިމާރާތް އަޅާ ބިން ކުރީގެ ކުނިކޮށި ހުރި ބިމަށް ބަދަލުކޮށްފައެވެ. 24 ފެބްރުއަރީ 2024 ގައި އަރަބިއްޔާ ސްކޫލުގެ އާ އިމާރާތުގެ އަމަލީ މަސައްކަތް މިނިސްޓަރު ޝަފީއު ވަނީ ފައްޓަވާދެއްވާފައެވެ. ދަރިވަރުންނާއި ޓީޗަރުން ހިމެނޭ ގޮތަށް ރަސްމިއްޔާތެއް ބޭއްވި ނަމަވެސް އެ ސްކޫލުގެ އަމަލީ މަސައްކަތް ކުރިއަށް ގެންގޮސްފައިނުވެއެވެ.
އެ ސްކޫލްގެ އާ އިމާރާތުގެ މަސައްކަތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހަފުތާ 14 ޗާޓުގައި ހިމެނިގެން ކުރިއަށްދާ މަޝްރޫއެއްކަން ކަން ވެސް އޭރު އިއުލާން ކުރިއެވެ.
މިދިޔަ ސަރުކާރުގައި އަމީން ކޮންސްޓްރަކްޝަނާ ހަވާލުކުރި ނަމަވެސް އަގު ދަށްކުރަން އެއްބަސްނުވެވުމުން ސެޕްޓެމްބަރު މަސް ތެރޭ އެއްބަސްވުން ވަނީ ބާތިލުކޮށްފައެވެ. އަދި 17 ނޮވެންބަރު 2024 ގައި އަރަބިއްޔާ ސްކޫލް ޒަމާނީކޮށް، އަށް ބުރީގެ އިމާރާތެއްގެ ގޮތުގައި ތަރައްގީ ކުރުމަށް ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރްސީސީ) އާ ހަވާލުކޮށް، އެ މަޝްރޫއުގެ މަސައްކަތް ވަނީ ފަށާފައެވެ. އާރްސީސީއާ އެ މަސައްކަތް ހަވާލުކޮށްފައިވަނީ 152،945،200.65ރ އަށް މި މަސައްކަތް 540 ދުވަހުގެ ތެރޭގައި ނިންމާ ގޮތަށެވެ.
