ބައިނަލްއަޤުވާމީ ރަޙުމަތްތެރިކަމުގައި ބަންގްލަދޭޝްއާ ދެކޮޅަށް ކުޅުނު ދެ ވަނަ މެޗުން، ފަހު ވަގުތު ރާއްޖޭގެ ޤައުމީ ފުޓުބޯޅަ ޓީމު ބަލިވެއްޖެ އެވެ.

ބަޝުންދަރާ ކިންގްސް އެރީނާގައި ހޮނިހިރު ދުވަހު ކުޅުނު މެޗުގައި ބަންގްލަދޭޝް އިން ރާއްޖޭގެ މައްޗަށް ކުރި ހޯދީ 2-1ންނެވެ. މިއީ މިފަހަރުގެ ބައިނަލްއަޤުވާމީ ބްރޭކުގައި ރާއްޖެ އިން ކުޅުނު ދެ ވަނަ މެޗެވެ. ފުރަތަމަ މެޗުގައި ރާއްޖެ އިން ވަނީ ބަންގްލަދޭޭޝްގެ މައްޗަށް ކުރި ހޯދައިފަ އެވެ.

ބަންގްލަދޭޝްއާ ދެކޮޅަށް ކުޅުނު ދެ ވަނަ މެޗުގައި ވެސް އެންމެ ފުރަތަމަ ލަނޑު ޖަހައި ކުރި ހޯދީ ރާއްޖެ އިންނެވެ. މެޗު ފަށައިގެން 23 ވަނަ މިނެޓުގައި ރާއްޖެ އަށް ލީޑު ނަގައިދިނީ އަލީ ފާސިރު (ސެންޓޭ) އެވެ. ފުރަތަމަ މެޗުގައި ރާއްޖެ އިން ބަންގްލަދޭޝްގެ މައްޗަށް ކުރި ހޯދީ ވެސް ސެންޓޭ ޖެހި ލަނޑުންނެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ބަންގްލަދޭޝް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ މުޖީބުއް ރަހުމާން އެވެ. މެޗުން ބަންގްލަދޭޝް މޮޅުވީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ލަނޑު ޖަހައިގެންނެވެ. އެއީ ޕަޕޯން ސިންގް ޖެހި ލަނޑެކެވެ.

ރާއްޖެ އިން މިފަހަރުގެ ބައިނަލްއަޤުވާމީ ބްރޭކުގައި ދެ މެޗު ކުޅެފައިވާއިރު، މިއީ ފާއިތުވި އެއް އަހަރު ދުވަހުގެ ތެރޭގައި ރާއްޖެ އިން ކުޅުނު ބައިނަލްއަޤުވާމީ ފުރަތަމަ މެޗުތަކެވެ. މި މެޗުތަކުގެ ކުރިން، އެންމެ ފަހުން ޤައުމީ ޓީމުން މެޗެއް ކުޅުނީ މިދިޔަ އަހަރުގެ އޮކްޓޯބަރު މަަހުގެ 17 ވަނަ ދުވަހު ފީފާ ވޯލްޑް ކަޕް ކޮލިފިކޭޝަންގައި ބަންގްލަދޭޝްއާ ދެކޮޅަށެވެ. އެ މެޗުން ރާއްޖެ ވަނީ ބަލިވެފަ އެވެ.