ޗެލްސީ އަށް ކުޅެމުން އަންނަ ފްރާންސްގެ ޑިފެންޑަރު ވެސްލޭ ފޮފާނާ އަށް ލިބުނު އަނިޔާއެއްގެ ސަބަބުން، ޤައުމީ ޓީމުން އޭނާ އުނި ކުރަން ނިންމައިފި އެވެ.

އުމުރުން 23 އަހަރުގެ ފޮފާނާ އަށް އަނިޔާވެފައި ވަނީ އިނގިރޭސި ޕްރިމިއާ ލީގުގައި އެންމެ ފަހުން ޗެލްސީން އާސެނަލާ ދެކޮޅަށް ކުޅުނު މެޗުގަ އެވެ. މެޗުގައި ފޮފާނާ އަށް ކޮންމެ ވެސް ވަރެއްގެ އަނިޔާވެފައިވާއިރު، އޭނާ ވަނީ މެޗު ފުރިހަމަ ކޮށްފަ އެވެ. އޭގެ ފަހުން ޗެލްސީން ހާމަކޮށްފައިވާ ގޮތުގައި ފޮފާނާގެ ވާއަތު ފައިގެ ކަކުލަށް ކޮންމެ ވެސް ވަރެއްގެ އަނިޔާއެއް ލިބިފައިވެ އެވެ.

އެހެންވެ، ބައިނަލްއަޤުވާމީ ބްރޭކުގައި ފްރާންސް ޤައުމީ ޓީމުން ކުޅޭ މެޗަށް އެކުލަވާލި ސްކޮޑުން މިހާރު ފޮފާނާ ވަނީ އުނިކޮށްފަ އެވެ. ޤައުމީ ސްކޮޑުން އޭނާ އުނި ކުރަން ނިންމާފައިވާއިރު، އޭނާގެ އަނިޔާ ސީރިއަސް ނުވި ނަމަވެސް، ޗެލްސީން އިތުރު ރިސްކެއް ނަަގަން ބޭނުން ނުވާ ކަމަށް ވަނީ ބުނެފަ އެވެ. އެހެންކަމުން، ބައިނަލްއަޤުވާމީ ބްރޭކަށްފަހު އަލުން ކުލަބު ފުޓުބޯޅައިގެ ކުޅުން ފަށާއިރު، ފޮފާނާ ފިޓުވާނެ ކަމަށް ބެލެވެ އެވެ.

ބައިނަލްއަޤުވާމީ ބްރޭކުގައި ފްރާންސް ޤައުމީ ޓީމުން ދެ މެޗެއް ކުޅޭނެ އެވެ. އެއީ ޔުއެފާ ނޭޝަންސް ލީގުގައި މި މަހުގެ 15 ވަނަ ދުވަހު އިޒްރޭލާ ދެކޮޅަށް ކުޅޭ މެޗާއި، މި މަހުގެ 18 ވަނަ ދުވަހު އިޓަލީއާ ދެކޮޅަށް ކުޅޭ މެޗެވެ. އަނިޔާގެ ބިރު އޮތުމާއެކު ފޮފާނާ ޤައުމީ ސްކޮޑުން އުނި ކޮށްފައިވާތީ، މި ދެ މެޗުގައި ވެސް އޭނާ އަށް ނުކުޅެވޭނެ އެވެ.

ފޮފާނާ އަށް ފްރާންސް ޤައުމީ ޓީމުން ޖާގަ ލިބުނީ މިދިޔަ އަހަރު އެވެ. މިއަހަރު ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތުގެ ކޮލިފިކޭޝަން އަށް ފްރާންސް އިން އެކުލަވާލި ސްކޮޑުން އޭނާ އަށް ފުރުސަތު ދިން ނަމަވެސް. އަނިޔާގެ ސަބަބުން އޭނާ ވަނީ ޔޫރޯގެ ފައިނަލް ސްކޮޑުން އުނިކޮށްފަ އެވެ.