އިޒްރޭލުގެ ސިފައިން ގާޒާގެ އަލް-މަވާސީ ގައި ހުރި "ރައްކާތެރި ސަރަޙައްދު" ކަމަށް ބުނާ ތަނަކަށް ޑްރޯން ހަމަލާއެއް ދީ މަދުވެގެން 10 ފަލަސްތީނު މީހުން ޝަހީދު ކޮށްލައިފިއެވެ. މިއާއެކު އިޒްރޭލުގެ ޓޭންކުތައް ޣައްޒާގެ މެދުތެރޭގެ ނުސީރާތު ރެފިއުޖީ ކޭމްޕަށް ބޮންއަޅާ މަދުވެގެން 20 މީހުން ވަނީ ޝަހީދު ކޮށްލާފައެވެ.

އިޒްރޭލުގެ އައު ދިފާއީ ވަޒީރު އިސްރާއީލް ކަޓްޒް ވަނީ ލުބުނާނުގެ ހިޒްބުﷲ އާއެކު ވަގުތީ ގޮތުން ހަނގުރާމަ މެދުކަނޑާލުމުގެ އެއްބަސްވުމަކަށް ދިއުމަށް އިންކާރުކޮށްފައެވެ. އެއާއެކު، އީރާނުގެ ނިއުކްލިއަރ ފެސިލިޓީ ތަކަށް ހަމަލާ ދޭނެކަމުގެ އިޝާރާތެއް އޭނާ ވަނީ ދެއްވާފައެވެ.

އަނެއްކޮޅުން އިޒްރޭލުގެ ހައްދުފަހަނަ އެޅި ކަނާތުފިޔައިގެ މާލީ ވަޒީރު ސްމޮޓްރިޗް ވަނީ ފަލަސްތީނުގެ ހުޅަނގު އައްސޭރި އިޒްރޭލުގެ ބިމަށް އިތުރު ކުރުމަށް އޭނާ ގެންގުޅޭ ޕްލޭނަށް އެމެރިކާގެ ރައީސް ކަމަށް އިންތިޚާބުވެވަޑައިގެންވި ޑޮނަލްޑް ޓްރަމްޕް ތާއީދު ކުރައްވާނެ ކަމަށް އުންމީދު ފާޅުކޮށްފައެވެ.

ހުޅަނގު އައްސޭރީގެ ހެބްރޮން ގައި ހިންގި ރެއިޑެއް ގައި އަންގާރަ ދުވަހު އިޒްރޭލު ސިފައިން ފަލަސްތީނުގެ ތިން މީހުން ހައްޔަރު ކުރި ކަމަށް ވަފާ ނިއުސް އޭޖެންސީން ބުނެފައިވެއެވެ. އިޒްރޭލު ސިފައިން ހުޅަނގު އައްސޭރީގައި ހިންގަމުންދާ ރެއިޑް އާ އެކު ހުޅަނގު އައްސޭރިއަށް ވަދެވެން އޮންނަ ގިނަ މަގުތަކެއް ބަންދުކޮށްފައިވާ ކަމަށްވެސް ވަފާ އިން ބުނެފައިވެއެވެ.

އޮކްޓޯބަރ 7، 2023ން ފެށިގެން އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި ފަލަސްތީނުން މަރުވި މީހުންގެ އަދަދު 43،603ށް ވަނީ އަރާފައެވެ. މީގެ އިތުރުން 102،929 މީހުން ޒަޚަމްވެފައިވެއެވެ.

ލުބުނާނަށް އިޒްރޭލުން ދޭ ހަމަލާތަކުގައި މަދުވެގެން 3،243 މީހުން މަރުވެ، 14،134 މީހުން ޒަޚަމްވެފައިވެއެވެ.