ބައިނަލްއަޤުވާމީ ރަޙުމަތްތެރިކަމުގައި އަވަށްޓެރި ބަންގްލަދޭޝްއާ ދެކޮޅަށް މެޗުތަކެއް ކުޅުމަށް، ރާއްޖޭގެ ސީނިއާ ޤައުމީ ފުޓުބޯޅަ ޓީމު ބަންގްލަދޭޝް އަށް ފުރައިފި އެވެ.

އާދީއްތަ ދުވަހުގެ ހަވީރު ޤައުމީ ޓީމު ބަންގްލަދޭޝް އަށް ފުރާފައިވާއިރު، މިއީ އަހަރެއްހާ ދުވަސް ފަހުން ޤައުމީ ޓީމުން މެޗެއް ކުޅޭނެ ފުރަތަމަ ފަހަރެވެ. ރާއްޖެ އިން ބަންގްލަދޭޝްއާ ދެކޮޅަށް ދެ މެޗެއް ކުޅުމަށް ވަނީ ހަމަޖެހިފަ އެވެ. އެގޮތުން ފުރަތަމަ މެޗުގައި އެ ޤައުމާ ދެކޮޅަށް ނިކުންނާނީ ނޮވެމްބަރު މަހުގެ 13 ވަނަ ދުވަހު އެވެ. އަދި ދެ ވަނަ މެޗުގައި އެ ޤައުމާ ދެކޮޅަށް ކުޅޭނީ ނޮވެމްބަރު މަހުގެ 16 ވަނަ ދުވަހު އެވެ.

ބަންގްލަދޭޝް މެޗަށް ރާއްޖެ އިން އެކުލަވާލި ސްކޮޑުގައި ހިމެނޭ 25 ކުޅުންތެރިންނަކީ، ޙުސެއިން ޝަރީފު، ސަމޫހު އަލީ، ޙުސެއިން ސިފާއު ޔޫސުފް، މުޙައްމަދު އިރުފާން، އަލީ ފާޞިރު (ސެންޓޭ)، އިބްރާހީމް އުސާމާ، ހައިސަމް ރަޝީދު، ނާއިޒް ޙަސަން (ދާދު)، ޙަމްޒާ މުޙައްމަދު (ހަމްޕު)، ޙަސަން ރާއިފް އަޙުމަދު، ނިޝާމް މުޙައްމަދު ރަޝީދު، މުޙައްމަދު ނިޒާމް، ހައިޝަމް ޙަސަން، އަޙުމަދު އައިހަމް، ޢަބްދުﷲ ލޫތު އިބްރާހީމް، އަޙުމަދު މާއިޝް ރަޝީދު، ޙަސަން ޝިފާޒު، އިބްރާހީމް މަހުދީ ޙުސެއިން (ފޭދޫ އިއްބެ)، ޙުސެއިން ނިހާން، އިޔާން ޢަބްދުލް ޢަލީމް، މުޙައްމަދު ނާއިމް، ޙަސަން ނަޒީމް، އަޙުމަދު ރިޒުވާން (ރިޒޭ)، މުޙައްމަދު ޔާމީން އަދި މުޒުދާން ޙަސަން އެވެ.

ރާއްޖެ އިން އެކުލަވާލި މި ސްކޮޑުގައި ޒުވާން ގިނަ ކުޅުންތެރިންތަކަކަށް ފުރުސަތު ދޭން ކޯޗު އަލީ ސުޒޭން ވަނީ ނިންމައިފަ އެވެ. އެގޮތުން 20 އަހަރުން ދަށުގެ ޤައުމީ ޓީމުގައި ހިމެނޭ ކުޅުންތެރިންނަށް ވެސް ޓީމުން ފުރުސަތު ދީފައިވެ އެވެ. މީގެ އިތުރުން ރާއްޖޭގެ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންގެ 14 ކުޅުންތެރިޔަކު ވެސް ސްކޮޑުގައި ވަނީ ހިމަނައިފަ އެވެ.