މޯލްޑިވްސް އިކޮނޮމިކް ގޭޓުވޭ ޕްރޮޖެކްޓުގެ މާސްޓަރ ޑިވެލޮޕަރު ގެ ގޮތުގައި ކަނޑައަޅާފައިވާ ސަރުކާރުގެ ކުންފުނި މޯލްޑިވްސް އިންޑަސްޓްރިއަލް ޑިވެލޮޕްމަންޓު ފްރީ ޒޯންގެ (އެމްއައިޑީއެފްޒެޑް) އާއި ސިންގަޕޫރުގެ ކެޕިޓަލް އޭޝިއާ އިންވެސްޓްމަންޓްސް (ސީއައިއޭ) އާ ދެމެދު ހޮނިހިރު ދުވަހު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމާ ބެހޭ ގޮތުން އިކޮނޮމިކް މިނިސްޓްރީން ނެރުނު ނޫސްބަޔާނެއްގައި މިއީ "މޯލްޑިވްސް އިކޮނޮމިކް ގޭޓްވޭ މަޝްރޫއު ކުރިއަށް ގެންދިއުމަށް ސޮއިކުރެވުނު އެއްބަސްވުމެއް،" ކަމަށް ބުނުމުގެ އިތުރުން އެއްބަސްވުމުގައި ހިމެނޭ ކަންކަމާ ބެހޭ ގޮތުން އެއްވެސް މައުލޫމާތެއް ހިމަނާފައެއް ނުވެއެވެ.

އެއްބަސްވުމުގައި ބައިވެރިވި ބޭރުގެ ކުންފުންޏާ ބެހޭ ގޮތުން ބުނެފައިވަނީ، "ސީއައިއޭ" އަކީ ސިންގަޕޫރުގައި ފަންޑު މެނޭޖު ކުރުމުގެ ލައިސަންސް ލިބިފައިވާ، އިންފްރާސްޓްރަކްޗަރ، ފިންޓެކް، އައިޓީ، ހަކަތަ، އަދި ހޮސްޕިޓޭލިޓީ ފަދަ ތަފާތު ޕޯޓްފޯލިއޯ ތަކުން ޖުމްލަ 1.3 ބިލިއަން ޑޮލަރުގެ އެސެޓް މެނޭޖް ކުރަމުންދާ ކުންފުންޏެއް،" ކަމަށެވެ.

ސީއައިއޭ، އިހަވަންދިއްޕޮޅު ޕޯޓު މަޝްރޫއުގައި މަސައްކަތް ކުރުމަށް ހޮވުނު ގޮތުގެ އެއްވެސް މައުލޫމާތެއް ނޫސް ބަޔާނުގައި ހާމަކޮށްފައި ނުވާއިރު، އިކޮނޮމިކް މިނިސްޓްރީން ބުނެފައިވަނީ، "އިކުއިޓީ ޓްރާންސެކްޝަން ތަކާއި، ޕްރައިވެޓް ޕްލޭސްމަންޓް ތަކާއި، ސްޓްރެޓީޖިކް އިންވެސްޓްމަންޓު ތަކުގެ ތަޖުރިބާ ފުޅާ ދާއިރާ އެއްގައި ލިބިފައިވާ މި ކުންފުންޏަކީ، ޓްރާންސްފޮމޭޓިވް މަޝްރޫއުތަކުގައި، މަސައްކަތް ކުރުމުގެ ގާބިލުކަން ލިބިފައިވާ ކުންފުންޏެކެވެ."

ގާބިލު ކުންފުންޏެއްގެ ގޮތުގައި އިކޮނޮމިކް މިނިސްޓްރީން ފާހަގަ ކުރާ ސިއައިއޭގެ ލިންކްޑިން ޕްރޮފައިލް ގައި އެންމެ 205 ފޮލޯވަރުން ހިމެނޭ އިރު، ޕޯޓެއް ތަރައްގީ ކުރުމުގެ އެއްވެސް މަސައްކަތެއް ކޮށްފައިވާ ކަމެއް އެކުންފުނިން ބުނެފައެއް ނުވެއެވެ. އޭގެ ބަދަލުގައި އާންމު ބަހުރުވައިން ޕްރޮފައިލްގައި ހިމަނާފައިވަނީ، ކަސްޓަމައިޒްޑް ކްލައިޔަންޓް ސޮލިއުޝަންސް، މަލްޓިޕްލް ފެމިލީ އޮފިސަސް، ޕްރޮޕަރަޔަޓީ ސޮލިއުޝަންސް، އަދި ސްޕެޝަލް އޮޕޮޗުނިޓީސް ފަދަ ކަންކަމެވެ.

ކުންފުނިން މިހާތަނަށް ކާމިޔާބު ކަމާއެކު ހިންގާފައިވާ އެއްވެސް މަޝްރޫއެއްގެ ތަފްސީލެއް ވެސް ޕްރޮފައިލްގައި ހިމަނާފައެއް ނުވެއެވެ.

ހޮނިހިރު ދުވަހު ސޮއިކުރުމަށް ބޭއްވި ރަސްމިއްޔާތުގައި ސޮއި ކުރެވުނު މި އެއްބަސްވުމަކީ އޮއްޓަރު ހުރި އެއްޗެއް ނޫންކަން ދޭހަވާ ގޮތައް އެމްއައިޑީއެފްޒެޑްގެ މެނޭޖިންގ ޑިރެކްޓަރ ވިދާޅުވީ، ކުރިއަށް އޮތް 6 މަސް ދުވަހުގެ ތެރޭގައި ރަސްމީ އެއްބަސްވުމުގައި ސޮއި ކުރެވޭނެ ކަމަށެވެ.

އަނެއްކޮޅުން، މި އެއްބަސްވުމާއެކު 100 މިލިޔަން ޑޮލަރުގެ މަޝްރޫޢެއް ކެޕިޓަލް އޭޝިއާ އިންވެސްޓުމަންޓު ކުންފުނީގެ ފަރާތުން ފެށުމަށް ވާހަކަދެކެވިފައިވާ ކަމަށް ޝިމާދު އިތުރަށް ވިދާޅުވިއެވެ. އެހެން ނަމަވެސް، 100 މިލިއަން ޑޮލަރު އެ ކުންފުނިން ހޯދާ ގޮތަކާ ބެހޭ އެއްވެސް މައުލޫމާތެއް ހާމަ ކޮށްފައި ނުވާއިރު އަދި މި މަޝްރޫއު އިން ސީއައިއޭ އަށް ލިބޭ މަންފާ އަކީ ކޮބައިކަން އާންމު ކޮށްފައެއް ނުވެއެވެ. އަނެެއްކޮޅުން މި މަޝްރޫޢުގެ މަސައްކަތްތަކަށް ފަންޑުކުރަނީވެސް އެ ކުންފުނިން ކަމަށާއި، ބިންހިއްކާ، ޕޯޓާއި، ކީވޯލްތައް ތަރައްޤީ ކޮށް، ފަތުރުވެރިކަމުގެ މަޝްރޫޢުތަކާއި، ވެއަރ ހައުސްތަކުގެ އިތުރުން ރިއަލް އެސްޓޭޓުތައްވެސް ފުރުޞަތު އޮންނާނެ ކަމަށް ޝިމާދު ވިދާޅުވިއެވެ.

ސިންގަޕޫރުގެ އެންމެ ބޮޑެތި 300 ކުންފުނީގެ ތެރޭގައިވެސް ހިމެނިފައި ނުވާ، ސީއައިއޭގެ ޗީފް ކޮމާޝަލް އޮފިސަރ ޓަން ކުން ޗިއާއޯ ޖޯޖް ވެސް ވިދާޅުވީ، އިހަވަންދިއްޕޮޅުގައި ގިނަ ޚިދުމަތްތަކެއް މި މަޝްރޫޢުގެ ދަށުން ތަރައްޤީކުރުމަށް އެ ކުންފުނިން ނިންމާފައިވާ ކަމަށާއި، ބައިނަލްއަޤްވާމީ ޕޯޓު ފެސިލިޓީތަކާއި، ބޯޓު މަރާމާތުކުރުމުގެ ޚިދުމަތް، ބަންކަރިންގ، ކުރޫޒު ޓޫރިޒަމް، އަދި ފަތުރުވެރިކަމާއި ގުޅުންހުރި އިތުރު މަސައްކަތްތައް، ރިއަލް އެސްޓޭޓުގެ ވިޔަފާރިއާއި، އެކްސްޕޯޓު ޕްރޮސެސިންގ ޒޯނެއްވެސް ތަރައްޤީކުރާނެ ކަމަށެވެ. އެހެން ނަމަވެސް މަޝްރޫއުއަށް ފައިސާ ހޯދާ ގޮތެއް އަދި އެކުންފުނިން މި މަޝްރޫއުގައި ބައިވެރިވާ ޓާމްސްތަކެއް ހާމައެއް ނުކުރެއެވެ.

ފްރޭމްވޯކް އެއްބަސްވުމުގައި އެމްއައިޑީއެފްޒެޑް ގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޝިމާދު އިބްރާހީމެވެ. އަދި ސީއޭއައި ގެ ފަރާތުން ސޮއިކޮށްކުރެއްވީ ޗީފް ކޮމަރޝަލް އޮފިސަރ ޓަން ކުން ޗިއާއޯ ޖޯޖްއެވެ.

ފްރޭމްވޯކް އެއްބަސްވުމަކީ ދެ ފަރާތެއްގެ ދެމެދުގައި ހެދޭއެއްބަސްވުންތަކުގެ ތެރެއިން، އެ އެއްބަސްވުމާ ގުޅޭ ހުރިހާކަމަކަށް ފުރިހަމަ އެއްބަސްވުމަކަށް އައިސްފައި ނުވާ، ނަމަވެސް ގުޅުންކުރިއަށް ގެންދިއުމަށް އެކަށީގެންވާ މިންވަރަކަށް ކަންކަމަށް އެއްބަސްވެވިފައިވާ، އަދި ތަފްސީލުތަކަށް ކުރިމަގުގައިއެއްބަސްވުމަށް ސޮއިކުރެވޭ ލިޔުމެކެވެ.