ދިވެހި ރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އިން އިންތިޒާމު ކޮށްގެން ކުރިއަށް ގެންދިޔަ، އެމްއެންޔޫއެސްޔޫ ފުޓްސަލް ފިއެސްޓާ 2024ގެ އަންހެން ޑިވިޝަންގެ ޗެމްޕިއަންކަން މޯލްޑިވްސް ބިޒްނަސް ސްކޫލް (އެމްބީއެސް) އިން ހޯދައިފި އެވެ.
މުބާރާތުގެ ޗެމްޕިއަންކަން އެމްބީއެސް އިން ހޯދީ، ހުކުރު ދުވަހުގެ ރޭ ކުޅުނު ފައިނަލް މެޗުގައި ސެންޓަ ފޯ ފައުންޑޭޝަން ސްޓަޑީޒް (ސީއެފްއެސް)ގެ މައްޗަށް ކުރި ހޯދައިގެންނެވެ. ހުޅުމާލޭ ރެހެންދި ފުޓްސަލް ދަނޑުގައި ކުޅުނު ފައިނަލް މެޗު އެމްބީއެސް އިން ކާމިޔާބު ކުރީ 6-0 ގެ ތަފާތު ބޮޑު ނަތީޖާ އަކުންނެވެ.
މެޗުގައި އެމްބީއެސްގެ ލަނޑުތައް ޖެހީ ފާތިމަތު ސައިނާ، ނުޒުމާ ނާޒިމް، ފާތިމަތު ސާމިރާ، ސަނިއްޔާ ޢަބްދުއް ޞަމަދު އަދި ފާތިމަތު އަޒުމާ އަޙުމަދު އެވެ. މެޗުގައި އެމްބީއެސްގެ އަނެއް ލަނޑަކީ ސީއެފްއެސްގެ ސަދާ އަންވަރު އަތުން ބައި ކޮޅަށް ވަތް ލަނޑެކެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ އެމްބީއެސްގެ ސާއިނާ އެވެ.
މުބާރާތުގެ އަންހެން ޑިވިޝަންގެ އެންމެ މޮޅު ކުޅުންތެރިންގެ ތެރޭގައި ހިމެނުނީ ޗެމްޕިއަން އެމްބީއެސްގެ ސަނިއްޔާ، މަރިޔަމް މަލްދާގެ އިތުރުން، ސީއެފްއެސްގެ ޖަފްނާ ޢީސާ، ސަދާ އަދި ސްކޫލް އޮފް ނާސިން (އެސްއެން)ގެ މަރިޔަމް ޝަހާ އެވެ. އަންހެން ޑިވިޝަންގެ އެންމެ އުންމީދީ ކުޅުންތެރިޔަކަށް ހޮވުނީ ސީއެފްއެސްގެ އާމިނަތު ރައިޝާ ރަމީޒު އެވެ. އެންމެ މޮޅު ކޯޗަކަށް އެމްބީއެސްގެ ކޯޗު ހޮވުނުއިރު، އެންމެ ގިނަ ލަނޑު ޖެހި ކުޅުންތެރިޔަކީ އެމްބީއެސްގެ އައިޝަތު ނަސްމާ އަޙުމަދު އެވެ. އޭނާ ވަނީ މުބާރާތުގައި 10 ލަނޑު ޖަހައިފަ އެވެ. މީގެ އިތުރުން އަންހެން ޑިވިޝަންގެ އެންމެ މޮޅު ކުޅުންތެރިޔާ އަށް ހޮވުނީ ޗެމްޕިއަން އެމްބީއެސްގެ ފާތިމަތު ސައިނާ އެވެ.
މިއަހަރުގެ އަަންހެން ޑިވިޝަންގައި ވަނީ ޖުމުލަ 12 ޓީމަކުން ބައިވެރިވެފަ އެވެ. މުބާރާތުގެ ޗެމްޕިއަން ޓީމަށް ފައިސާގެ އިނާމުގެ ގޮތުގައި 10،000 (ދިހަ ހާސް) ރުފިޔާ ދިނުމަށް ހަމަޖެހިފައިވާއިރު، ރަނަރަޕް ޓީމަކަށް 5000 (ފަސް ހާސް) ރުފިޔާ ދިނުމަށް ވަނީ ހަމަޖެހިފަ އެވެ. 2012 ވަނަ އަހަރުން ފެށިގެން ބާއްވަމުން އަންނަ މި މުބާރާތަކީ ރާއްޖޭގެ މަތީ ތައުލީމު ދޭ ކޮލެޖު/ޔުނިވާސިޓީތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތެކެވެ.
މިއަހަރުގެ މުބާރާތުގެ ފައިނަލް މެޗު ޝަރަފުވެރި ކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް އަދި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ.
