ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން އަގުބޮޑުކޮށް ޑްރޯންތަކެއް ގަނެފައިވަނީ ގާނޫނާ ހިލާފަށް ކަމަށް ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ފަލަސުރުހީ ޕްރޮގްރާމްގައި ޔައުގޫބް ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ސަޕްލިމެންޓްރީ ބަޖެޓެއް ހުށަހެޅުމުން ވަރަށް ބޮޑަށް މިސަރުކާރުގެ ބޭފުޅުން ފާޑު ވިދާޅުވި ކަމަށާއި، ނަމަވެސް އެ ބަޖެޓު ފާސްވުމުގެ ކުރިން ހަރަދުކޮށްފައިނުވާނެ ކަމަށެވެ. ނަމަވެސް މިސަރުކާރުން އެއާ ހިލާފަށް އަމަލު ކޮށްފައިވާ ކަމަށް އޭނާ ވިދާޅުވިއެވެ.
މިސަރުކާރުން ޑްރޯން ގަނެފައިވަނީ ގާނޫނާ ހިލާފަށްކަން ފާހަގަކުރައްވައި ޔައުގޫބް ވިދާޅުވީ އެމަސައްކަތް ކޮށްފައިވަނީ ކޮންޓިންޖެންސީ ބަޖެޓުން ކަމަށެވެ.
ޑްރޯން ގަތުމަށް 37 މިލިއަން ޑޮލަރު ހަރަދުކޮށްފައިވާއިރު، ޑްރޯންތައް ބޭނުންކޮށްފައިވަނީ 20 އޭޕްރީލް 2024 ގައި މ. ރަތްމަންދޫ ބޭރުން ގެއްލުނު ދޯންޏެއް އެކަނި ހޯދުމަށެވެ. އޭގެފަހުން ކަނޑުމާތީގެ ހާދިސާތައް ހިނގި ނަމަވެސް މި ޑްރޯންތައް ބޭނުންކޮށްފައިނުވެއެވެ. އަދި ޑްރޯންތައް ބޭނުން ނުކުރާ ސަބަބާއި ގުޅޭގޮތުން އެމްއެންޑީއެފްގެ ބަހެއް ވަނީ ލިބޭ ގޮތް ނުވެފައެވެ.
މިސަރުކާރުން ޑްރޯން ގަތީ ސީދާ ކަނޑައެޅިގެން ގާނޫނާ ހިލާފަށް. ކޮންޓިންޖެންސީ ބަޖެޓުގެ ތެރެއިން. ކޮންޓެންޖެންސީ ބަޖެޓަކީ މިލިޓަރީއަށް އެކަހަލަ ޑްރޯން އަޅުގަނޑުމެން މިއޮތީ ހަނގުރާމައެއްގެ ތެރޭގައި ނޫން. އެހެންވީމަ އެކަންކަން ކުރަން އޮންނަ ބަޖެޓެއް ނޫން ކޮންޓިންޖެންސީ ބަޖެޓަކީ. އޭގެ މަފްހޫމަކީ ވެސް އެ ނޫން. ސީދާ ކޮންޓިންޖެންސީ ބަޖެޓުން 500 ނުވަތަ 700 މިލިއަން ރުފިޔާ ހަރަދުކޮށްގެން ޑްރޯން ގަނެގެން މިއަދު ހަރަދުކޮށްފައި. އެގޭފަހުން މިއަދު އެހުށަހެޚީ ބަޖެޓުގައި އެއޮތީ އެ 600 މިލިއަން ރުފިޔާ ކޮންޓިންޖެންސީ ބަޖެޓަށް ލާފައި ހަރަދުކޮށްފައި އޭގެ 9 މަސް ފަހުން އެއޮތީ ހުށަހަޅާފައި އެހެންވެއްޖެއްޔާ އެމިންގަނޑުގެ ތެރެއިން އެއީ ކުށަކަށްވެއްޖެއްޔާ ހަގީގަތުގައި ވެސް މިސަރުކާރުން އެއޮތީ އެއާ ހިލާފުވެފައި.ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ
މީގެ އިތުރުން ޔައުގޫބް ވިދާޅުވީ އެމްޑީޕީއަކީ ވައްކަންކޮށް ރައްޔިތުންގެ ފައިސާއަށް ހިޔާނަތްތެރިވާ ބައެއް ނޫން ކަމަށާއި، ކޮރަޕްޝަންގެ ތުހުމަތު ކުރެވޭނަމަ ތަހުގީގު ކުރިއަށް ގެންދަންޖެހޭ ކަމަށެވެ.
މިއަދު މުޅި ގައުމުގެ ކޮންޓްރޯލް އޮތީ ސަރުކާރުގެ އަތުގައި ކަމަށާއި، ފިޔަވަޅު އަޅަންޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ އެމްޑީޕީގެ ސަރުކާރުގައި އެގޮތަށް ހިންގާފައިވާ އެއްވެސް ކަމެއް ދެއްކެން ނޯންނާނެ ކަމަށެވެ. ނަތީޖާއެއް ގޮތުން މިސަރުކާރުގެ ބޭފުޅުން ދައްކަނީ ބޭކާރު ބަރުދަނެއް ނުހުންނަ ވާހަކަތަކެއް ކަމަށް ޔައުގޫބް ވިދާޅުވިއެވެ.
