ޒަމާންތަކަކަށްފަހު ކ.ގުރައިދޫއިން ބަންޑާރަ ގޯތި ދޫކުރުމަށް ނިންމައިފިއެވެ.

ރާއްޖެއެމްވީއަށް ގުރައިދޫ ކައުންސިލް މެންބަރު އައިމިނަތު ނަދާ ނާޒިމް ވިދާޅުވީ އެރަށަށް ބޯހިޔާވަހިކަމުގެ ދަތިކަން ވަރަށް ބޮޑަށް ކުރިމަތިވެފައިވާ ކަމަށާއި، ގޯތި ދޫނުކުރާތާ ވަރަށް ދުވަސްވެފައިވާ ކަމަށެވެ. ގޯތި ދޫނުކުރާތާ ގާތްގަނޑަކަށް 20 އަހަރު ފާއިތުވެފައިވާކަމަށް އޭނާ ވިދާޅުވިއެވެ.

ނަދާ ވިދާޅުވީ 2000 އަކަފޫޓުގެ 195 ގޯތި ދޫކުރުމަށް ނިންމާފައިވާ ކަމަށާއި، ގިނަ ގޯތި ދޫކުރުމަށް ނިންމާފައިވަނީ އަލަށް ހިއްކި ސަރަހައްދުން ކަމަށެވެ. އަދި ބައެއް ގޯތިތައް ރަށު ތެރެއިން ވެސް ދޫކުރާނެ ކަމަށް އޭނާ ވިދާޅުވިއެވެ.

ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ގުރައިދޫގައި ހިއްކާފައި ވަނީ 15 ހެކްޓަރުގެ ބިމެކެވެ. މީގެ ކުރިން ގުރައިދޫގެ ބިމުގެ ބޮޑު މިނަކީ 21.89 ހެކްޓަރެވެ. އަލަށް ހިއްކައި ނިމުނު ބިމާއެކު ގުރައިދޫގެ ބިމުގެ ބޮޑުމިން ވަނީ 36.89 ހެކްޓަރަށް އިތުރުވެފައެވެ. މިމަޝްރޫއު ނިންމާލާފައިވަނީ 2021 ވަނަ އަހަރުގެ އޮކްޓޫބަރު މަހުގެ ތެރޭގައެވެ.

މީގެ އިތުރުން ނަދާ ވިދާޅުވީ ގޯއްޗަށް ކުރިމަތިލުމަށް ފުރުސަތު ހޯމަ ދުވަހު ހުޅުވާލާފައިވާއިރު، ފޯމް ހުށަހެޅުމުގެ މުއްދަތު ހަމަވުމާއެކު ފޯމްތައް އިވެލުއޭޓްކޮށް ގޯތި ވީހާ ވެސް އަވަހަށް ދޫކުރުމުގެ މަސައްކަތް ކައުންސިލުން ކުރާނެ ކަމަށެވެ. ހިއްކި ބިމާއެކު އެރަށަށް ދިމާވެފައިވާ ބިމުގެ ދަތިކަމުގެ މައްސަލައަށް ހައްލު ލިބިފައިވާ ކަމަށް އޭނާ ވިދާޅުވިއެވެ.

ކައުންސިލުން ބުނީ ހޯމަ ދުވަހުން ފެށިގެން ދިވެހި ސަރުކާރުގެ ގެޒެޓުން ފޯމް ޑައުންލޯޑް ކުރެވޭނެ ކަމަށެވެ. 19 ސެޕްޓެމްބަރު 2024 ވާ ބުރާސްފަތި ދުވަހުގެ ނިޔަލަށް ރަސްމީ ބަންދު ނޫން ކޮންމެ ދުވަހެއްގެ 9:30ން 12:30ށް އެ އިދާރާގެ ކައުންޓަރުން ފޯމް ލިބެން ހުންނާނެ ކަމަށް ކައުންސިލުން ބުނެއެވެ. އަދި ފޯމް ބަލައިގަތުން އޮންނާނީ 16 ސެޕްޓެމްބަރު 2024 ވާ ހޯމަ ދުވަހުން ފެށިގެން 19 ސެޕްޓެމްބަރު 2024 ވާ ބުރާސްފަތި ދުވަހުގެ ނިޔަލަށް ރަސްމީ ބަންދު ނޫން ކޮންމެ ދުވަހެއްގެ 09:00ން 11:30ށް އަދި 13:00ން 14:00ށް އެ އިދާރާގެ ކައުންޓަރުން ކަމަށް ކައުންސިލުން ބުނެއެވެ.

ގުރައިދޫގެ އާބާދީއަކީ ގާތްގަނޑަކަށް 2000 މީހުންނެވެ. ނަމަވެސް އެރަށުގައި ގެސްޓްހައުސް ވިޔަފާރި ފުޅާވެ، މާލެސިޓީއާ ކައިރި ރަށަކަށްވުމާއެކު، ގިނަ އަދަދެއްގެ ބަޔަކު އެރަށަށް ކޮންމެ ދުވަހަކު ވެސް ދަތުރު ކުރެއެވެ. އަދި ވަޒީފާގެ ފުރުސަތުތައް ތަނަވަސްވެ އެރަށުގައި މިހާރު ގާތްގަނޑަކަށް 3000ށް ވުރެ މީހުން ދިރިއުޅެމުންދާ ކަމަށް ކައުންސިލުން ބުނެއެވެ.