މާލޭގެ ބޮޑުތަކުރުފާނު މަގުގައި ހިނގި ނުރައްކާތެރި އެކްސިޑެންޓުގައި އަނިޔާވި ޒުވާނާ މަރުވެއްޖެެއެވެ.

މިއެކްސިޑެންޓުގައި މަރުވީ 21 އަަހަރުގެ މުހައްމަދު ލީވާން އެވެ. މި ޒުވާނާ މަރުވީ އެކްސިޑެންޓުގައި ލިބުނު އަނިޔާތަކަށް ވެންޓިލޭޓަރުގައި ފަރުވާ ދެމުން ދަނިކޮށްށެވެ.

ރާއްޖެއެމްވީއަށް އައިޖީއެމްއެޗްގެ އޮފިޝަލް ވިދާޅުވީ މިޒުވާނާއަށް ފަރުވާ ދެމުންދަނިކޮށް އާދިއްތަ ދުވަހުގެ ރޭ ދަންވަރު 1:00 ހާއިރު މަރުވެފައިވާ ކަމަށެވެ.

މި އެކްސިޑެންޓް ހިނގާފައިވަނީ 4 ސެޕްޓެންބަރު 2024 ވީ ބުދަ ދުވަހުގެ ރޭ 00:53 ހާއިރުއެވެ. ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތީ ކާރަކާ ސައިކަލެއް ޖެހި ހިނގި އެކްސިޑެންޓުގައި ދެ ވެހިކަލަށް ވެސް ބޮޑެތި ގެއްލުންތަކެއް ވަނީ ލިބިފައެވެ.

މި އެކްސިޑެންޓް ފުލުހުން އިތުރަށް ތަހުގީގު ކުރަމުންދާއިރު، މާލެސިޓީގައި ޚާއްސަކޮށް ހުޅުމާލޭގައި ދަނީ ނުރައްކާތެރި އެކްސިޑެންޓްތައް ހިނގަމުންނެވެ. އެގޮތުން މިދިޔަ ހުކުރުވިލޭރޭ ދަންވަރު ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި 23 އަހަރުގެ ޒުވާން ފިރިހެނެއް ވަނީ މަރުވެފައެވެ.