ޖަރުމަނުގެ ގައުމީ ފުޓްބޯޅަ ޓީމުގެ ކެޕްޓަންކަން މިޑްފީލްޑަރު ހޯޝުއާ ކިމިޗަށް ދީފި އެވެ.

އޭނާ އަށް ކެޕްޓަންކަން ދީފައިވާއިރު މީގެ ކުރިން އެކި ފަހަރު ތަކުގެ މަތިން ބަޔާން މިއުނިކްގެ ކުޅުންތެރިޔާ ވަނީ 19 ފަހަރު ގައުމީ ކެޕްޓަންކަމުގެ ޒިންމާ އުފުލައިފަ އެވެ. އޭނާ އަށް ދާއިމީ ގޮތެއްގައި ކެޕްޓަންކަން ދިނީ ސީނިއާ ތިން ކުޅުންތެރިއަކު ބައިނަލް އަގްވާމީ ފުޓްބޯޅައިން ރިޓަޔާކުރުމުންނެވެ. އެއީ އެންމެ ފަހުގެ ޔޫރޯގައި ކެޕްޓަންކަންކުރި އިކާއީ ގުންޑޮގަން އާއި އޭގެ ކުރިން މިދިޔަ އަށް އަހަރު ކެޕްޓަކަން ކުރި ގޯލްކީޕަރު މެނުއަލް ނޯޔާ އާއި ތަޖުރިބާކާރު މިޑްފީލްޑަރު ޓޯނީ ކްރޫސް އެވެ.

އުމުރުން މިހާރު 29 އަހަރު ކިމިޗް ވަނީ މިހާތަނަށް ގައުމީ ޓީމަށް 91 މެޗު ކުޅެދީފަ އެވެ. އޭނާ އަށް ކެޕްޓަކަންދިންކަން އިއުލާނުކުރަމުން ކޯޗު ހޫލިއަން ނާގެލްސްމަން ބުނީ ކިމިޗް އަކީ ޓީމުގެ ކެޕްޓަންކަން ކުރަން ވަރަށް އެކަށީގެންވާ އަދި އެކަމަށް ފުރިހަމައަށް ތައްޔާރުވެފައިވާ ކުޅުންތެރިއެއް ކަމަށެވެ.

ކިމިޗަށް ގައުމީ ކެޕްޓަންކަން ދިންއިރު އޭނާ އަކީ ކުޅޭ ކުލަބުގެ ކެޕްޓަނެއްނޫނެވެ. ބަޔާންގެ ކެޕްޓަނަކީ އަދިވެސް ނޯޔާ އެވެ. ނަމަވެސް ނާގެލްސްމަން ބުނީ ކިމިޗް ގައުމީ ޓީމުގެ ބޭންޑް 19 ފަހަރު އަޅާފައިވުމަކީ ވަރަށް ބޮޑު ހިތްހަމަޖެހުމެއް ކަމަށެވެ.

ޖަރުމަނުގެ 17 އަހަރުން ދަށުގެ ޓީމަށް 2011 ވަނަ އަހަރު ކުޅެން ފެށި ކުޅުންތެރިޔާ އުމުރުފުރާގެ ގައުމީ ޓީމުތައް ކަޑައްތުކޮށް ސީނިއާ ޓީމަށް އެންމެ ފުރަތަމަ ކުޅުނީ 2016 ވަނަ އަހަރު އެވެ. އޭނާ އަކީ ދުނިޔޭގެ އެންމެ ގިނަ ކޯޗުން މިހާރު ސޮއިކުރުވަން ތައްޔާރުވަމުން އަންނަ އެއް ކުޅުންތެރިޔާ އެވެ. އެއީ ބަޔާންގެ ކޮންޓްރެކްޓް މި ސީޒަނާއެކު ހަމަވާތީ އެވެ. އޭނާގެ ސޮއި ހޯދަން މަސައްކަތް ކުރާ ކުލަބުތަކުގެ ތެރޭގައި ސްޕޭނުގެ ބާސެލޯނާ އާއި ރެއާލް މެޑްރިޑް އަދި މެންޗެސްޓާ ސިޓީ ލިވަޕޫލް ހިމެނެ އެވެ. މީގެ ތެރެއިން ސިޓީގައި ހުރި ކޯޗު ޕެޕް ގާޑިއޯލާ އަކީ ބަޔާންގައި ކިމިޗަށް ކޯޗުކޮށްދީފައިވާ އޭނާ އިތުބާރުކުރާ ކޯޗެކެވެ. އަަދި ބާސެލޯނާގެ ކޯޗު ހަންސީ ފްލިކަކީ ވެސް ބަޔާން އާއި ޖަރުމަނުގެ ގައުމީ ޓީމުގައި ކިމިޗްގެ ކޯޗެކެވެ. މިހެންވެ ބަޔާން ދޫކޮށްލާނަމަ އޭނާ ދިއުން އެންމެ ގާތީ މިއިން ކުލަބަކަށް ކަމަށް ގިނަ ބަޔަކު ދެކެ އެވެ.