ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގެ ސިޔާސީ މަގާމުތަކުގެ ޖުމްލަ އަދަދު އަދިވެސް ހާމަނުވާ ކަމަށް ސަރުކާރުން ބުނެފިއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ސިޔާސީ މަގާމުތަކުގެ ޖުމްލަ އަދަދު ހާމަކޮށްދިނުމަށް އެދިފައެވެ. މީގެ ކުރިން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ފިނޭންސް މިނިސްޓަރު ޑރ. މުހައްމަދު ޝަފީގުއާ އެސުވާލު ކުރުމުން ސިޔާސީ މަގާމުތަކުގެ ޖުމްލަ އަދަދު ނެތުމުން ފަހުން ހާމަ ކުރާނެ ކަމަށް ވިދާޅުވެފައިވާކަން ނޫސްވެރިޔާ ފާހަގަކުރިއެވެ.
މި ސުވާލަށް ޖަވާބު ދެއްވަމުން ފިނޭންސް މިނިސްޓަރު ޑރ. މުހައްމަދު ޝަފީގު ވަނީ ސުވާލާ ނުގުޅޭ ވާހަކަތަކެއް ދައްކަވާފައެވެ. މިނިސްޓަރު ޝަފީގު ވިދާޅުވީ ސިޔާސީ މަގާމުތަކުން ބޭފުޅުން ކެނޑެމުންދާ ކަމަށާއި، ސީދާ އަދަދުނެތް ކަމަށެވެ. އަދި މިނިސްޓަރު ޝަފީގު ވިދާޅުވީ ބޭނުންވަނީ ފުރިހަމަ މައުލޫމާތު ދޭންޖެހޭ ކަމަށާއި، އެ އިތުބާރު ގެއްލެން ބޭނުންނުވާ ކަމަށެވެ.
'ދެވަނަ ސުވާލުގައި ފާހަގަކުރެއްވި ކަންތައްތަކުގެ ތެރޭގައި ސިޔާސީ މުވައްޒަފުންގެ ވާހަކަ ފާހަގަކުރައްވައިފި. އެ އަޅުގަނޑު އެދުވަހު ދެންނެވިން ސީދާ ފިގަރ ނެތޭ. މިހާރު ވެސް އަޅުގަނޑު ފާހަގަކުރަން ބޭނުންވަނީ މިގާމުތަކުން ކެނޑެމުން ވެސް އެބަދޭ. އެހެންވީމަ އަޅުގަނޑަށް މިހެން ދަންނަވަން ވަގުތުން ތިބޭފުޅުން އަނެއްކާ ވެސް އެ އަދަދާ ދޭތެރޭގައި ތިބޭފުޅުން އަނެއްކާ ވެސް ސުވާލު ކުރާނެ. އެހެންވީމަ އަޅުގަނޑު ބޭނުންވަނީ ތިބޭފުޅުންނަށް ފުރިހަމަ މައުލޫމާތު ދޭން. އިތުބާރު ކުރެވޭ މައުލޫމާތެއް ދޭންފިނޭންސް މިނިސްޓަރު ޑރ. މުހައްމަދު ޝަފީގު
ރައީސް މުއިއްޒުގެ މިސަރުކާރަށް 9 މަހަށް ވުރެ ގިނަ ދުވަސްވެގެންދިޔައިރު ސިޔާސީ މަގާމުތަކަށް ބޭފުޅުން އައްޔަން ކުރެއްވުން ނިމުމަކަށް އައިސްފައިނުވެއެވެ. މިސަރުކާރުން ގެންގުޅެމުންދާނީ ހާމަކަން ބޮޑު ސިޔާސަތެއް ކަމަށް ރައީސް މުއިއްޒު ވިދާޅުވި ނަމަވެސް މިއަދާ ހަމައަށް ސިޔާސީ މަގާމުތަކުގެ ޖުމްލަ އަދަދު ހާމަކޮށްފައިނުވެއެވެ. އަދި 700ށް ވުރެ ސިޔާސީ މަގާމުތައް އިތުރު ނުކުރާނެ ކަމަށް ރައީސް މުއިއްޒު ވިދާޅުވި ނަމަވެސް މިއަދަދު ފަހަނައަޅާ ގޮސްފައިވާ ކަމަށް ސަރުކާރުގެ އިދިކޮޅު ސިޔާސީ ޕާޓީތަކުން ދަނީ ބުނަމުންނެވެ.
