ރައީސް ޑރ.މުހައްމަދު މުއިއްޒުއަކީ އަނިޔާ އާއި ނާއިންސާފަށް ތާއިދު ކުރައްވާ ބޭފުޅެއް ނޫން ކަމަށް ސަގާފަތާއި ތަރިކައާބެހޭ ވަޒީރު އާދަމް ނަޞީރު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ މިނިވަން ދުވަހުގެ ރަސްމީ ޖަލްސާގައި ވާހަކަދައްކަވަމުންނެވެ. ފަލަސްޠީނުގެ މުސްލިމުން ދިރިއުޅެމުންގެންދަނީ ބިރުވެރިކަމާއި ނާމާންކަމުގައި ކަމަށް ފާހަގަކުރައްވާ، އާދަމް ނަސީރު ވިދާޅުވީ ފަލަސްޠީނުގެ މިނިވަންކަމަށް މި ސަރުކާރުން އަބަދުވެސް ގޮވާލާނެ ކަމަށެވެ.
ވަޒީރު ވަނީ ފަލަސްޠީނުގެ މުސްލިމް އަޚުންނަށް ދެމުންގެންދާ ލާއިންސާނީ ޙަމަލާތަކުގެ މައްޗަށްވެސް ވާހަކަފުޅުގައި އަލިއަޅުވާލައްވާފައެވެ. ރައްޔިތުންނަށް މިނިވަންކަމާއި، އެތަނުގައި އަމާންކަން ޤާއިމްކުރުމަށް ރައީސް ޑރ. މުޢިއްޒާއި އެމަނިކުފާނުގެ ސަރުކާރުން އަބަދުވެސް ގޮވާލައްވަމުންދާކަމަށް ވަޒީރު ވިދާޅުވިއެވެ. އަދި ހަމައެހެންމެ ރައީސް މުޢިއްޒަކީ އަނިޔާއާއި ލާއިންސާނީ ކަންކަން ދުނިޔޭގެ އެއްވެސްތަނެއްގައި އޮތުމަށް އެދިވަޑައިގަންނަވާ ބޭފުޅެއް ނޫންކަމަށް އާދަމް ނަސީރު ވަނީ ވިދާޅުވެފައެވެ. އެ މައްސަލައިގައި ރައީސް ގެންގުޅުއްވާ ސިޔާސަތަށް އާދަމް ނަސީރު ވަނީ އަލިއަޅުވާލައްވާފައެވެ.
މީގެ އިތުރުން ޤައުމެއް މިނިވަންވަނީ ގިނަ ބަޔަކު ހިންމަތާއި މިންނަތުންކުރާ ބުރަ މަސައްކަތްތަކުގެ ސަބަބުން ކަމަށް އެމަނިކުފާނު ވަނީ ވިދާޅުވެފައެވެ. އަދި މިނިވަންކަން ހޯދުމަށް ގަދަ އަޒުމާއި އެކު މަސައްކަތްކުރަން ޖެހޭ ކަމަށް ވެސް ވިދާޅުވިއެވެ. އެހެންކަމުން މިނިވަންކަން ދެމެހެއްޓުމަށް ރައީސް ގެންގުޅުއްވަނީ ހަރުދަނާ ސިޔާސަތުތަކެއް ކަމަށް ވެސް އެމަނިކުފާނު ވިދާޅުވިއެވެ. ރައީސަށް ތައުރީފްކުރައްވާ އެމަނިކުފާނު ވިދާޅުވީ މިނިވަންކަން ދެމެހެއްޓުމަށް ރައީސް ކުރައްވަނީ އުންމީދީ މަސައްކަތްތަކެއް ކަމަށެވެ.
އާދަމް ނަސީރު ވިދާޅުވީ މިނިވަން ކަމުގެ ލަފްޒަކީ ލުއި ލަފްޒެއް ނަމަވެސް އޭގެ ފުންމިން ނޭނގޭ ގުރުބާނީއެއް ކަމަށެވެ. އެ ހިސާބަށް އައީ ވޭނާ ހުނާއި ރުއިމުގެ ޒަމާންތަކެއްވަންދެންވީ ގުރުބާނީގެ ސަބަބުން ކަމަށް އެމަނިކުފާނު ވިދާޅުވިއެވެ.
