ޤާނޫނުއަސާސީގައި ބަޔާންކޮށްފައިވަނީ ޤާނޫނުގެ ކުރިމަތީގައި އެންމެންވެސް ހަމަހަމަ ކަމަށެވެ. ޤާނޫނުން ލިބިދޭ ޙައްޤުތައް ލިބިދިނުމުގައި ތަފާތު ކުރުމެއް ނޯންނާނެ ކަމަށެވެ.
އެހެންނަމަވެސް ކަން ހިނގަނީ އެހެންތޯއެވެ؟ ޝަރުއީ ކޯޓުތަކުން ކުރާ ޙުކުމްތައް ތަންފީޒީ އިދާރާތަކުން ތަންފީޒު ކުރުމަށް ބަލާލިނަމަވެސް ފެންނަން އޮތީ ބޮޑެތި ތަފާތުކުރުންތަކެކެވެ.
ދާދި ފަހުން ހައިކޯޓުގައި ކުރިއަށް ދިޔަ އަޑުއެހުމެއްގައި ދެކެވުނު ވާހަކައެކެވެ. މަސްތުވާތަކެތީގެ މައްސަލައެއްގައި އުމުރަށް ޖަލަށް ލާފައިވާ މީހަކަށް މިދިޔަ ސަރުކާރުގައި މާފު ދިން ވާހަކައާއި، އެކަމާ ޕްރޮސެކިއުޓަރ ޖެނެރަލް އޮފީހުންވެސް އަދި ޝަރީއަތުންވެސް ހިތްހަމަ ނުޖެހޭ ވާހަކައެވެ.
އޭނާއަށް އިއްވާފައިވާ ޙުކުމާއި ގުޅިގެން މާފު ދެވެން އޮތީވެސް ޚާއްސަ ޙާލަތްތަކެއްގައެވެ. އެއީވެސް އިއްވާފައިވާ ހުކުމެއްގެ ހަތަރުބައިކުޅަ އެއްބައި ތަންފީޒު ކޮށްފައިވާނަމައެވެ. ނަމަވެސް އޭނާއަށް މާފު ލިބުނުއިރު ޙުކުމުގެ ހަތަރުބައިކުޅަ އެއްބައި ތަންފީޒުކޮށް ނިމިފައެއްވެސް ނުވެއެވެ.
އެކަމާ ނުރުހުންވެ ފަނޑިޔާރުންވެސް ވަނީ ޕީޖީން ދައުވާކޮށްގެން ރާއްޖޭގެ މަސްތުވާތަކެތި އެތެރެކުރާ މީހުން ޕްރޮސިކިއުޓް ކުރުމަށް، ކޯޓުތަކުން ދައުވާތަކެއް ސާބިތުކުރުމުން ހުކުމް ތަންފީޒު ނުކުރެވޭނަމަ، މިއީ ކީއްކުރަން ކުރާ ކަމެއްތޯ ސުވާލު ކުރައްވާފައެވެ. ފަނޑިޔާރު ވަނީ މިއީ ކޯޓުތައް މެދުވެރިކޮށް ކީއްކުރަން ކުޅޭ ޑްރާމާއެއްތޯވެސް އައްސަވާފައެވެ؟
ހަގީގަތަކީ މިއީ އަބަދުވެސް ކަން ހިނގާ އުސޫލުކަމެވެ. ކޮންމެ ސަރުކާރެއް އޮތް ކަމުގައިވީނަމަވެސް ފެންނަމުންދަނީ ހައްގުތަކާއި މިނިވަންކަމާއި ޒިންމާތަކަކީ ވަކި ބަޔަކަށް އޮންނަ ކަމެއް ކަމެވެ. އެބަޔަކު ބޭނުންވާ ގޮތަށް ފުއްގަނޑެއްހެން މޮޑެން އޮންނަ އެއްޗެއް ކަމެވެ.
މިއަދުވެސް ފެންނަނީ އެ މަންޒަރެވެ. ކުރީގެ ރައީސް އަބްދުﷲ ޔާމީނަށް އިއްވާފައިވާ ޙުކުމް އެމަނިކުފާނު ތަންފީޒު ކުރައްވަމުން އެ ގެންދަވަނީ ބައެއް ފަހަރު ޖަލްސާތަކުގެ އޯޑިއަންސްގައި އިންނަވައެވެ. ބައެއް ފަހަރު ހުޅުމާލޭގައި ބާއްވާ ކެމްޕޭނު ޖަލްސާތަކުގައި އިންނަވައެވެ. ބައެއް ފަހަރު ސިޔާސީ ޕާޓީތަކުގެ ޙަރަކާތްތަކުގައި އިންނަވައެވެ. ސުވާލަކީ މިއީ ޤާނޫނުގައި އެ ބުނާ ހަމަހަމަކަންތޯއެވެ؟
ޝަރުއީ ކޯޓުތަކުން ކުރާ ޙުކުމްތައް ތަންފީޒު ކުރުމަކީ އެބަޔަކު އޭރަކު ބޭނުންވި ގޮތަކަށް، ބޭނުންވި މިންގަނޑަކަށް ކުރަން އޮންނަ ކަމެއްތޯއެވެ؟
ޖަލުގައި އެކި މައްސަލަތަކުގައި ޙުކުމް ތަންފީޒު ކުރަމުންދާ އާންމު ރައްޔިތުންނާއި އެމީހުންގެ އާއިލާތަކަށް މިއީ އިންސާފުވެރި ގޮތެއްތޯއެވެ؟
ސަރުކާރު ތެރެއިން ނުވަތަ ދައުލަތުގެ އިދާރާއެއްގެ ތެރެއިން ނުވަތަ ޤާނޫނުގެ ބާގަނޑެއްގެ ތެރެއިން ބޮޑެތި ޙުކުމްތަކުގައި ތިބޭ މީހުން މިނިވަންވާއިރު، އަނެއްކޮޅުން ދައުލަތުގެ މަތީ މަޤާމުތައް ފުރުއްވާފައިވާ މީހުންނަށްވެސް މިކަންކަން އޮންނަނީ ނިކަން ފަސޭހަކޮށެވެ. މިއީ އަޖައިބެއް ކަހަލަ އިންސާފެކެވެ.
