މޫނު ނިވާކޮށްގެން ތިބި ގްރޫޕަކުން ވަޅިން ހަމަލާދިން ޒުވާނާ މަރުވެއްޖެ އެވެ.

ހަމަލާދީ ފައިވަނީ ހަދީބީ މަގުގައި ހުރި ލިޓަސް ސާވިސް ސެންޓަރު ތެރޭގައި ހުރި ޒުވާނަކަށެވެ. 

 މިހާދިސާގައި ޒަހަމްވި ޒުވާނާ މަރުވިކަން އޭޑީކޭ ހޮސްޕިޓަލުގެމެނޭޖިންގް ޑިރެކްޓަރ އަހްމަދު އަފްއާލް ވަނީ ކަށަވަރު ކޮށްދީފަ އެވެ.

ހޯމަ ދުވަހުގެ ރޭ 9:10 ހާއިރު ޒަހަމްކޮށްލި މި ޒުވާނާގެ މޭގެ އެކިތަންތަނަށް ހަމަލާދީފައިވެ އެވެ.

މަންޒަރު ފެނުނު ބައެއް މީހުން ބުނި ގޮތުގައި ޒުވާނާ އަށް ހަމަލާދިނީ ތިން ސައިކަލުގައި ދިޔަ ބައެވެ.

"އޭނާގެ މޭގެ އެތައް މިތަނަށް ހުރީ ވަޅި ޖަހާފައި. ލޭގެ ކޯރެއް އޮތީ ހެދިފައި. " މައުލޫމާތު ދިންމީހާ ބުންޏެވެ.

މައުލޫމާތު ލިބޭ ގޮތުގައި މިހާދިސާގައި މަރުވެފައިވަނީ ރ. މީދޫއަށް ނިސްބަތްވާ ޒުވާނެކެވެ. މުހައްމަދު އަނަސް ނަމަކަށް ކިޔާ މި ޒުވާނާގެ އުމުރަކީ 25 އަހަރެވެ.

އަނަސް ބޭބެއެއް ރާއްޖެއެމްވީއަށް ކިޔާދިން ގޮތުގައި މަރުވި ޒުވާނާ ވަޒީފާ އަދާކުރަނީ ލޯންޗެއްގައި ކަމަށާއި ލިޓަސްއަށް ގޮސްފައިވަނީ ރައްޓެއްސަކާ ބައްދަލުކުރުމަށް ކަމަށެވެ.

އޭނާއަކީ އާންމުކޮށް ވެސް އެތަނަކަށް ގޮސް އުޅޭ ކުއްޖެއް ކަމަށާއި މިރޭ އެ ހާދިސާ ހިނގައިފައިވަނީ އެތަނަށް އޭނާ ދިޔަތާ ބައި ގަޑިއިރުވެސް  ނުވަނީސް ކަމަށް އޭނާގެ ބޭބެ ބުންޏެވެ.

 މިހާދިސާ ހިނގައިފައިވާ އިރު ބުރާސްފަތި ދުވަހު ވެސް ވަނީ ވަޅިން ހަމަލާ ދީފައެވެ. އެ ޒުވާނާ މަރުވެފައި ވަނީ ހޮނިހިރު ދުވަހު ހަވީރު އެވެ. މަރުވި ޒުވާނާއަކީ ހއ. ތަކަންދޫ އިބްރާހިމީ ހިޔާ، ނަދީމް އަބުދުއްރަހްމާން އެވެ.