ޖުމްހޫރީ ޕާޓީގެ ޑެޕިއުޓީ ލީޑަރު އަދި ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު ޢަބްދުﷲ ރިޔާޒް އާއި އެ ޕާޓީގެ ސެކެޓްރީ ޖެނެރަލް އަޙުމަދު ސަމީރު ފުލުހުންގެ އިދާރާއަށް ހާޒިރުކޮށްފިއެވެ.

ބުރާސްފަތި ދުވަހުގެރޭ މި ދެބޭފުޅުން ފުލުހަށް ހާޒިރު ކޮށްފައިވާއިރު، ޢަބްދުﷲ ރިޔާޒްގެ ވަކީލެއްގެ ގޮތުގައި ވަޑައިގެންނެވި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ޙުސައިން ވަކީލެއްގެ ގޮތުގައި ބަލައި ނުގަތުމަށްވެސް ފުލުހުން ވަނީ ނިންމާފައެވެ.

ފުލުހަށް ވަޑައިގަތުމަށްފަހު ޢަބްދުﷲ ރިޔާޒް ވިދާޅުވީ، އެބޭފުޅާގެ މައްޗަށް ފުލުހުން ކުރަނީ، މި ޖުލައި މަހުގެ 24 ވަނަ ދުވަހު، ފުލުހުންގެ ސަފުތައް ފަޅާލައި، ރައްޔިތުންގެ މަޖިލީހަށް ވަނުމުގެ ތުޙުމަތު ކަމަށެވެ. ރިޔާޒް ވިދާޅުވީ، ރިޔާޒްގެ ވަކީލެއްގެ ގޮތުގައި ވަޑައިގެންނެވި މެންބަރު އަލީ ޙުސައިންގެ މައްޗަށްވެސް ފުލުހުން މި ތުޙުމަތު ކުރާކަން ބުރާސްފަތި ދުވަހުގެރޭ ހާމަކޮށްފައިވާ ކަމަށާއި، އެހެންކަމުން ރިޔާޒްގެ ވަކީލެއްގެ ގޮތުގައި އަލީ ޙުސައިން ބަލައި ނުގަތުމަށް ފުލުހުން ނިންމާފައިވާ ކަމަށެވެ.

އެ ތުހުމަތާއި ގުޅިގެން ފުލުހަށް ހާޒިރުވުމުގެ އަމުރެއް އަލީ ހުސައިނަށް އަދި ފޮނުވާފައެއް ނުވެއެވެ.

އިތުރު ވަކީލެއް ހަމަޖައްސައި، 29 ޖުލައިވާ ހޮނިހިރު ދުވަހުގެރޭ 8:15 އަށް ފުލުހަށް ހާޒިރުވުމަށް އަންގައި، ފުލުހުން މިހާރު ވަނީ ރިޔާޒަށް ޗިޓު ހަވާލުކޮށްފައެވެ.

ރިޔާޒް ވިދާޅުވީ، މި މައްސަލައަކީ އެއްވެސް އަސާސެއް ނެތް މައްސަލައެއް ކަމަށް ދެކިލައްވާ ކަމަށާއި، މިހާރު ފުލުހުންގެ ފަރާތުން މި ފެންނަމުންދަނީ، ފުލުހުން ލައްވައި ކުރުވާ ގައިރު ޤާނޫނީ އަމަލުތަކެއް ކަމަށެވެ.

ބުރާސްފަތި ދުވަހުގެރޭ ޖުމްހޫރީ ޕާޓީގެ ސެކެޓްރީ ޖެނެރަލް އަޙުމަދު ސަމީރުވެސް ފުލުހަށް ހާޒިރުކޮށްފައިވާއިރު، ސަމީރު ހާޒިރުކޮށްފައިވަނީ، ޖުމްހޫރީ ޕާޓީގެ ޖަގަހަ އާއި އޮފީސް ބަލައި ފާސްކުރަމުންދިޔައިރު، ފުލުހުންގެ މަސައްކަތަށް ހުރަސްއަޅައި ކޯޓުން ފުލުހުންނަށް ދިން އަމުރު ތަންފީޒުކުރުމަށް ހުރަސް އެޅިކަމުގެ ތުހުމަތުގައެވެ.

ބުރާސްފަތި ދުވަހުގެރޭ ފުލުހަށް ވަޑައިގަތުމަށްފަހު، ސަމީރު ވިދާޅުވީ، ފުލުހުން އެފަދައިން ތުހުމަތު ކުރި ނަމަވެސް، ފުލުހުންނަށް ދޭން ޖެހޭ އެއްބާރުލުން ފުރިހަމައަށް ދެއްވާފައިވާނެ ކަމަށެވެ.

މި މައްސަލައާއި ގުޅިގެން ވަކީލެއްގެ އެހީ ބޭނުންވާކަން ހާމަކުރެއްވުމުން، ވަކީލަކާއި އެކު 28 ޖުލައިވާ ހުކުރު ދުވަހުގެ މެންދުރުފަހު 5 ޖަހާއިރު ފުލުހަށް ހާޒިރުވާން ވަނީ އަންގާފައެވެ.