ޕާޓީ ބައިބައިކުރަން އުޅޭ ކަމަށް ބުނެ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ސެނެޓަރު މުޙައްމަދު މަލީހު ޖަމާލް ސަސްޕެންޑްކޮށްފިއެވެ.
އޭނާ ސަސްޕެންޑް ކުރިކަން ހާމަކޮށްފައިވަނީ ޕީޕީއެމްގެ ނައިބު ރައީސުން ކަމަށްވާ އަހުމަދު ޝިޔާމް އާއި ޣައްސާން މައުމޫން ސޮއި ކުރައްވައި މަލީހަށް ފޮނުއްވި ސިޓީއެއްގައެވެ. އޭނާ ސަސްޕެންޑް ކުރީ އަންގާރަ ދުވަހުގެ ރޭ ޕީޕީއެމްގެ ނަމުގައި ނޫސްވެރިންގެ ބައްދަލުވުމެއް ބާއްވައި ދެއްކެވި ވާހަކަތަކާ ގުޅިގެންނެވެ.
މަލީހަށް ޕީޕީއެމުން ފޮނުވި ސިޓީގައި ބުނެފައިވަނީ އޭނާ އިސްވެ ހުންނަވައިގެން ޕާޓީ ބަދުނާމުކޮށް ބައިބައި ކުރުމުގެ މަސައްކަތްތަކެއް ކުރަމުންދާކަން ލީޑަރޝިޕަށް ފާހަގަކުރެވިފައިވާ ކަމަށެވެ. އެގޮތުން، ޕާޓީގެ ލީޑަރޝިޕް ނުވަތަ ސެނެޓަށް އެންގުމެއް ނެތި އަމިއްލައަށް ކޮމިޓީތައް އުފައްދަވައި ޕާޓީގެ އަސާސީ ގަވާއިދާ ޚިލާފަށް އެއްވެސް މަޝްވަރާކުރުމެއް ނެތި ޕާޓީގެ ނަމުގައި ނޫސްވެރިންގެ ބައްދަލުވެއް ބާއްވައި ޕާޓީ ބަދުނާމު ކުރުމަށާއި ބައިބައި ކުރުމަށް މަސައްކަތް ކުރައްވާފައިވާ ކަމަށެވެ.
އެހެންކަމުން، ޕީޕިއެމްގެ އަސާސީ ގަވާއިދުގެ ދަށުން ލީޑަރޝިޕަށް ލިބޭ ބާރުގެ ދަށުން މަލީހު ޕާޓީގެ ހަރަކާތްތަކުން ސަސްޕެންޑްކޮށް، އޭނާގެ މައްސަލަ ސުލޫކީ ކޮމިޓީއަށް ފޮނުވާފައިވާ ކަމަށް އެ ސިޓީގައި ވަނީ ބުނެފައެވެ. އެ ކޮމިޓީން ގޮތެއް ނިންމަންދެން ޕާޓީގެ އެއްވެސް ހަރަކާތެއްގައި އެއްވެސް ގޮތަކަށް ބައިވެރިވެގެން ނުވާނެ ކަމަށް ވެސް މަލީހަށް ވަނީ އަންގާފައެވެ.
އަންގާރަ ދުވަހުގެ ރޭ މަލީހު އިސްކޮށް ހުންނަވައި ބޭއްވެވި ކުއްލި ނޫސްވެރިންގެ ބައްދަލުވުމުގައި ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔަމީން އެކުލަވާލެއްވި ސްޓިއަރިން ކޮމިޓީއެއް ހިންގުމާ ހަވާލުވެވަޑައިގެންފައިވާ ކަމަށް ވަނީ އިއުލާނުކުރައްވާފައެވެ. އަދި މި ސަރުކާރުން އިއުލާން ކުރި އިންޑިއާ ސިފައިންގެ އަދަދަކީ ސައްހަ އަދަދެއް ނޫން ކަމަށް ވެސް މި ނޫސްވެރިންގެ ބައްދަލުވުމުގައި ވަނީ ބުނެފައެވެ.
