ދުނިޔޭގެ ޖައްވީ ދާއިރާގެ އެކި ކަންކޮޅުތަކުން ލީޑަރުން ހިމެނޭ ބައިނަލްއަގުވާމީ ކަރމަން ޕްރޮޖެކްޓްގެ ފްލެގްޝިޕް އިވެންޓް ކަމަށްވާ "ކަރމަން ވީކް" އަށް ކަރމަން ފެލޯސްގެ އިސް ބޭފުޅުންގެ ވަފުދެއް ރާއްޖެ އަންނަ ގޮތަށް ހަމަޖެހިއްޖެއެވެ.

މޯލްޑިވްސް ސްޕޭސް ރިސާޗް އޯގަނައިޒޭޝަން (އެމްއެސްއާރުއޯ) އާއި ސިކްސް ސެންސަސް ލާމު ގުޅިގެން ކުރިއަށްގެންދާ މި ހަރަކާތް އޮންނާނީ ނޮވެމްބަރ 1ން 5 އަށެވެ. މޯލްޑިވްސް ސްޕޭސް ރިސާޗް އޯގަނައިޒޭޝަންގެ ޕާޓްނަރުންގެ ތެރޭގައި ސިކްސް ސެންސަސް ލާމު، މޯލްޑިވްސް އަންޑަރވޯޓަރ އިނިޝިއޭޓިވް، ޓްރާންސް މޯލްޑިވިއަން އެއާވޭސް އަދި އިންޓުއާ މޯލްޑިވްސް ހިމެނެވެ.  

ކަރމަން ފެލޯޝިޕް ވީކް 2023ގެ އެންމެ އަލިގަދަ އަދި އެންމެ މުހިންމު އިވެންޓަކީ މިނިސްޓްރީ އޮފް ހަޔަރ އެޑިއުކޭޝަން އަދި ދިވެހިރާއްޖޭގެ ޤައުމީ ޔުނިވަރސިޓީއާއި ގުޅިގެން ޖައްވީ ދާއިރާގެ ވަޒީފާތަކާއި ބެހޭގޮތުން 1 ނޮވެމްބަރ 2023 ހެނދުނު 09:30 އިން 11:00އަށް ދިވެހިރާއްޖޭގެ ޤައުމީ ޔުނިވަރސިޓީގެ އޮޑިޓޯރިއަމްގައި އެންމެނަށް ހުޅުވާލައިގެން ބާއްވާ ޕަބްލިކް ޕެނަލް ޑިސްކަޝަންއެވެ.  

ކޮންމެ އަހަރަކު ދުނިޔޭގެ ޖައްވީ ދާއިރާގައި އިސް މާހިރުން ބައިވެރިވާ ކަރމަން ފެލޯޝިޕް ވީކް މިއަހަރު ބާއްވަނީ ރާއްޖޭގެ އެންމެ ފާހަގަކޮށްލެވޭ ސަސްޓެއިނަބަލް ރިސޯޓް ސިކްސް ސެންސަސް ލާމުގައެވެ. މި ހަރަކާތުގެ އަމާޒަކީ، ސެޓެލައިޓް ޓެކްނޮލޮޖީގެ ބޭނުންހިފުމުގައި ބައިނަލްއަޤްވާމީ އެއްބާރުލުން ދައްކުވައިދިނުމާއި، މޫސުމަށް އަންނަ ބަދަލުތަކާ ބެހޭ ގޮތުން ކުރެވޭ މަސައްކަތްތައް ޓެކްނޮލޮޖީގެ އޭހީގައި އިތުރަށް ހަރުދަނާކުރުމެވެ.

ކަރމަން ފެލޯސްގެ 2023 ވަނަ އަހަރުގެ މާހިރުން ހޮވާފައިވަނީ ޖައްވުގައި ރަނގަޅު މުސްތަގުބަލެއް ބިނާކުރުމަށް ޕްރޮފެޝަނަލް ކާމިޔާބީތަކަށް ބަލައި ކަމަށާއި އޭގެ ތެރޭގައި އެސްޓްރޮނޯޓުންނާއި ސްޕޭސް އެޖެންސީގެ ޑިރެކްޓަރުންނާއި ކޯޕަރޭޓް ޑިރެކްޓަރުންނާއި ލީޑިން ވިޔަފާރިވެރިންނާއި އިންވެސްޓަރުންނާއި ރިސާޗަރުންނާއި އަދި 12 ގައުމެއްގެ އާޓިސްޓުން ހިމެނެއެވެ.

2023 ވަނަ އަހަރުގެ ކަރމަން ވީކްގައި ފުޅާ ދާއިރާއެއްގައި ވޯކްޝޮޕްތަކާއި، ބައިވެރިވެނިވި ހިޔާލުބަދަލުކުރާ ސެޝަންތަކާއި، ފީލްޑް ޓްރިޕްތަކާއި ލޯކަލް އައުޓްރީޗް އެންގޭޖްމަންޓްތައް ކުރިއަށްގެންދިއުމަށް ހަމަޖެހިފައިވާއިރު، އިނޮވޭޓިވް ޚިޔާލުތަކާއި ކްރޮސް ކަލްޗަރަލް ނޮލެޖް އެކްސްޗޭންޖްގެ މާހައުލެއް ޤާއިމުކުރުމަށް ވަނީ ހަމަޖެހިފައެވެ. އެގޮތުން ކްލައިމެޓް މޮނިޓަރިންގ ސިސްޓަމްތަކާއި، ކެޕޭސިޓީ ބިލްޑިންގ، ސްޕޭސް ޕޮލިސީ ޑިޒައިން އަދި ސްޕޭސް އެކްސްޕްލޮރޭޝަންގެ މިހާރުގެ ޙާލަތު ފަދަ މައުޟޫޢުތަކަށް ބައިވެރިންނަށް މަޢުލޫމާތު ހިއްސާކުރުމަށް ވަނީ ހަމަޖެހިފައެވެ.  

މޯލްޑިވްސް ސްޕޭސް ރިސާޗް އޯގަނައިޒޭޝަން، ކަރމަން ޕްރޮޖެކްޓް، ސިކްސް ސެންސަސް ލާމު އަދި މޯލްޑިވްސް އަންޑަވޯޓާ އިނީޝިއޭޓިވް ގުޅިގެން މި އިވެންޓުން ބޭރުން ވެސް މަސައްކަތް ކުރަމުން ގެންދިއުމަށް ވަނީ ހަމަޖެހިފައެވެ. މިގޮތުން ރާއްޖޭގެ މޫސުމީ މޮނިޓަރިންގެ ހަރުދަނާ ނިޒާމެއްގެ ގޮތުގައި "ޑިޖިޓަލް އާތު މޯލްޑިވްސް" ތަރައްގީ ކުރުމަށް ދިގު މުއްދަތުގެ މަސައްކަތްތަކެއް އަންނަނީ ކުރެވެމުންނެވެ.