އޭޑީކޭ ހޮސްޕިޓަލްގެ އައިސީޔޫގައި ބާއްވައިގެން ފަރުވާ ދެއްވަމުން ގެންދަވާ ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމްގެ ހާލުކޮޅު ދުވަހަކަށްވުރެ ދުވަހެއް ދަށްވެ، އެމަނިކުފާނުގެ ފުރާނަފުޅަށް ނުރައްކާތެރިވެފައިވާ ކަމަށް އެ މަނިކުފާނުގެ ވަކީލުން ވިދާޅުވެއްޖެ އެވެ.

މި މަހުގެ 16 ވަނަ ދުވަހުގެ ރެއިން ފެށިގެން ގާސިމަށް އޭޑީކޭގެ އައިސީޔޫގައި ފަރުވާ ދެމުން އަންނައިރު، ވަކީލުން ހޮނިހިރު ދުވަހު ނެރުއްވި ބަޔާނެއްގައި ވިދާޅުވެފައިވަނީ އެ މަނިކުފާނުގެ ފުރާނަފުޅަށް ނުރައްކާވާ ކަމަށް ކަމާބެހޭ ފަރާތްތަކުގައި ތަކުރާރުކޮށް ދަންނަވައި، އެމަނިކުފާނަށް ބޭސްފަރުވާކުރުމަށް ރާއްޖެއިން ބޭރަށް ވަޑައިގަތުމުގެ ހުއްދަ ލިބިފައިނުވާތީ އެމައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް ހުށަހަޅަފައިވާ ކަމަށެވެ.

"އެކޮމިޝަނަށް ލިބޭ ޤާނޫނީ ބާރުގެ ދަށުން އެމައްސަލައާގުޅިގެން އަވަސް ފިޔަވަޅުތަކެއް އަޅައިދިނުމަށްވެސް އެކޮމިޝަނުގައި ވަނީ އެދިފައެވެ،" ވަކީލުންގެ ބަޔާނުގައިވެ އެވެ.

އެ ބަޔާނުގައި ވިދާޅުވެފައި ވަނީ ޤާނޫނުއަސާސީގެ 21 ވަނަ މާއްދާގެ ނައްޞުގައި ކޮންމެ މީހަކަށްމެ ދިރިހުރުމުގެ ހައްގާއި، އަމިއްލަ މިނިވަންކަމާއި، ނަފުސު ރައްކާތެރިކުރުމުގެ ހައްގު ލިބިގެންވާ ކަމަށް ބަޔާންކޮށްފައި ވާއިރު، އެ ހައްގަކީ ދިވެހި ރައްޔިތެއްގެ ހައިސިއްޔަތުން އޮނަރަބަލް ޤާސިމް އިބްރާހީމްއަށް ވެސް އެއްވެސް ތަފާތުކުރުމެއްނެތި ހަމަހަމަކަމާއެކު ލިބެންޖެހޭ ހައްގެއް ކަމަށެވެ.

"ނަފުސު ރައްކާތެރިކުރުމުގެ ހައްގުން އޮނަރަބަލް ގާސިމް އިބްރާހީމް މަހްރޫމްކުރެވިފައިވާއިރު، އެމަނިކުފާނުގެ ފުރާނަފުޅާމެދު ނަގަންޖެހިދާނެ ޒިންމާއަކަށް ޖެހިލުންވުމެއް ނެތި، ދުސްތޫރީ ހައްގުތައް ދިވެހި ރައްޔިތުންނަށް ކަށަރަވަރުކޮށްދިނުމާއި އިންސާނީ ކަރާމަތާއި ހަމަހަމަކަން ނެގެހެއްޓުމަށް ޤާނޫނުއަސާސީން އެބަޔަކާ މަތިކޮށްފައިވާ ފަރާތްތައް ޒިންމާދާރުކަމާއެކު އެވާޖިބު އަދާކުރުމަށް ގޮވާލަމެވެ،" ބަޔާނުގައިވެ އެވެ.

ގާސިމާމެދު އިންސާފުވެރިކަމާއި އިންސާނިއްޔަތުކަމާއެކު މުއާމަލާތުކުރެއްވުމަށާއި، ދިވެހިރައްޔިތެއްގެ ޙައިސިއްޔަތުން ކަށަވަރުކޮށްދޭންޖެހޭ ހައްގުތައް އެމަނިކުފާނަށް ތަނަވަސްކޮށްދިނުމަށް ބަޔާނުގައި ގޮވާލާފައިވެ އެވެ. އަދި ގާނޫނާ އެއްގޮތްވާ ގޮތުގެ މަތިން، އެމަނިކުފާނާމެދު ކަންތައްތައް ކުރެއްވުމަށާއި، އެމަނިކުފާނުގެ ބޭސްފަރުވާ ފުރިހަމަ ކުރެއްވުމަށް ރާއްޖެއިން ބޭރަށް ވަޑައިގަތުމަށް، އެމަނިކުފާނުގެ ޕާސްޕޯޓު ދޫކޮށްލުމަށް ދައުލަތުގެ ކަމާ ބެހޭ މުއައްސަސާތަކަށް ވަކީލުން ވަނީ އިލްތިމާސް ކުރައްވާފަ އެވެ.  

"މިކަމުގައި ޤާނޫނީ ގޮތުން އޮނަރަބަލް ޤާސިމް އިބްރާހީމްއަށާއި އެމަނިކުފާނުގެ ޢާއިލާއަށް ފުރިހަމައަށް އެއްބާރުލުންދެއްވައި އޮނަރަބަލް ޤާސިމް އިބްރާހީމްގެ ހައްގުތައް ކަށަވަރުކޮށްދެއްވުން އެދި، އިންސާނީ ޙައްޤުތައް ކުރިއެރުވުމަށް ޤާނޫނުއަސާސީން އެކަށައަޅާފައިވާ މިނިވަން މުސްތަޤިއްލު ހިއުމަން ރައިޓްސް ކޮމިޝަނަށް ގޮވާލަމެވެ،" ބަޔާނުގައިވެ އެވެ.

ހިތްޕުޅުގެ އާލާސްކަންފުޅެއްގައި ފަރުވާ ހޯއްދަވަމުން ގެންދަވާ ގާސިމް ރާއްޖޭން ބޭރަށް ގެންދިއުމުގެ ހުއްދަ ދެއްވުމަށް ކްރިމިނަލް ކޯޓަށް ހުށަހެޅި ސިޓީތަކަށް ޖަވާބު ނުލިބިގެން ސުޕްރީމް ކޯޓުގެ ހުއްދަކަށް ވެސް މިހާރު ވަނީ ހުށަހަޅުއްވާފަ އެވެ. ނަމަވެސް އަދިވެސް ޖަވާބެއް ނުދެ އެވެ. 

ގާސިމް ފުރަތަމަ އެޑްމިޓްކުރީ ޖުލައި 16 ވަނަ ދުވަހު މެޑިކާ ހޮސްޕިޓަލްގަ އެވެ. ގާސިމް ރާއްޖޭން ބޭރަށް ފުރުން ހުއްޓުވީ، ފަރުވާ ހޯއްދެވުމަށް ރާއްޖޭން ބޭރަށް ވަޑައިގަތުމަށް އެއާޕޯޓްގައި ހުންނަވަނިކޮށެވެ. އެއަށް ފަހު އޭނާ ގެންދަވަނީ އޭޑީކޭ ހޮސްޕިޓަލްގެ އައިސީޔޫގައި ފަރުވާ ހޯއްދަވަމުންނެވެ.