ބަންޑާރަ ނައިބު މުހައްމަދު އަނިލްގެ އިތުބާރު ނެތްކަމަށް ގުޅިފައިވާ ޕާޓީތަކުން ހުށަހެޅި ނަމަވެސް، އެކަން ފާހެއް ނުކުރެވޭނެ ކަމަށް ސަރުކާރު ހިންގާ މައި ޕާޓީ، ޕީޕީއެމްގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރުގެ ގޮތުގައި ހުންނެވި އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވެއްޖެ އެވެ.
އަނިލްގެ އިތުބާރު ނެތްކަމުގެ މައްސަލަ 24 މެމްބަރުންގެ ސޮޔާއެކު މަޖިލީހަށް ހުށަހެޅީ މިދިޔަ ބުރާސްފަތި ދުވަހު އެވެ.
ފަލާހު ވިދާޅުވި ގޮތުގައި އަނިލްގެ އިތުބާރު ނެތްކަމަށް ގުޅިފައިވާ ޕާޓީތަކުން ހުށަހެޅީ ގާނޫނު އަސާސީއާ ހިލާފަށް އަނިލް އަމަލުކުރައްވާކަމަށް އެ ބޭފުޅުންނަށް ގަބޫލުކުރެއްވޭތީ ކަމަށާއި ނަމަވެސް އެއީ ހަގީގަތެއް ނޫން ކަމަށެވެ. އަނިލް މަގާމުން ދުރުކުރަން މަސައްކަތްކުރަނީ މި ސަރުކާރު ދިފާއުކުރަން މިހާރު އެންމެ ބޮޑަށް މަސައްކަތްކުރައްވާ ބޭފުޅަކީ އޭނާ ކަމަށްވާތީ ކަމަށް ފަލާހު ވިދާޅުވި އެވެ.
"އެ ބޭފުޅުންނަށް [އިދިކޮޅު ފަރާތްތައް] ނުދެއްކޭ އަނިލް ގާނޫނު އަސާސީއާ ހިލާފަށް ކުރެއްވި ކަމެއް ހުއްޖަތާއެކު. އެއީ އެއްވެސް ހަގީގަތެއް ނޫން. އެކަމެއް ނުވާނެ، އެ ވޯޓެއް ފާހެއް ވެސް ނުވާނެ،" ފަލާހު ވިދާޅުވި އެވެ.
މަޖިލިހުގެ ގަވައިދުގައިވާ ގޮތުން ވަޒީރެއްގެ އިތުބާރު ނެތްކަމުގެ މައްސަލައެއް ހުށަހަޅައިފި ނަމަ، މަޖިލިހުގައި ބަހުސް ފެށުމުގެ 14 ދުވަސް ކުރިން އެ ވަޒީރަކަށް އެކަން އަންގަންޖެހެ އެވެ. އަދި އެ ބަހުސްގައި އަނގަ ބަހުންނާއި ލިޔުމުން ދިފާއުވުމުގެ ހައްގު އެ ވަޒީރަކަށް ލިބިވަޑައިގަންނަވަ އެވެ.
ވަޒީރެއްގެ އިތުބާރު ނެތްކަމުގެ މައްސަލަ ފާސްވާނީ، ގަވައިދުގައިވާ ގޮތުން ޖުމްލަ މެމްބަރުންގެ އަޣުލަބިއްޔަތު ލިބުމުންނެވެ. އެއީ 43 މެމްބަރުންނެވެ.
ރައްޔިތުންގެ މަޖިލީހުގެ މެންބަރަކު މަޖިލީހަށް އިންތިޚާބުވި އިރު ހުންނެވި ޕާޓީ ނޫން އެހެން ޕާޓީއަކަށް ބަދަލުވުމުން، ވަކިވުމުން ނުވަތަ ޕާޓީން ވަކި ކުރުމުން މަޖިލީހުގެ މެންބަރުކަން ގެއްލޭނެ ކަމަށް ކަނޑައަޅައި ދިނުމަށް އެދި ދައުލަތުގެ ފަރާތުން ސުޕްރީމް ކޯޓަށް ހުށަހެޅުއްވި މައްސާލާގައި އަނިލަށް ބޮޑެތި ފާޑު ކިޔުންތައް އަމާޒުވެގެން ގޮސްފައިވެއެވެ.
އެ މައްސަލައިގައި ސުޕްރީމް ކޯޓުން ކުރި ހުކުމާ ގުޅިގެން ޕީޕީއެމުން ވަކިކުރަން ހުށަހަޅާ ކޮންމެ މެމްބަރެއްގެ ގޮނޑި އިލެކްޝަންސް ކޮމިޝަނުން ދަނީ ގެއްލުވާލަމުންނެވެ. މިހާތަނަށް ހަ މެމްބަރެއްގެ ގޮނޑި ގެއްލުވާލުމަށް ފަހު، މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ ވެސް ވަނީ މަޖިލީހުން ބޭރުކޮށްލައިފަ އެވެ.
