ކުރީގެ ރައީސް އަބްދުﷲ ޔާމީނަށް އެމަނިކުފާނުގެ ވަކީލުންނާ ބައްދަލު ކުރެއްވުމުގެ ފުރުސަތު ނުދެއްވުމަށް މޯލްޑިވްސް ކަރެކްޝަނަލް ސަރވިސްއިން ނިންމީ އެ ފަރާތްތަކުން ގެންދިޔަ ލިޔެކިއުންތައް ދެއްކުމަށް ދެކޮޅު ހެދުމުންނެވެ.

ޔާމީނުގެ ވަކީލުން ވަޑައިގެންނެވީ ރިޔާސީ އިންތިޚާބަށް ކުރިމަތިލައްވާ ފޯމު ހިފައިގެންކަމަށް ބައެއް ނޫސްތަކުން ރިޕޯޓު ކޮށްފައިވެއެވެ. އެހެންނަމަވެސް، ޖަލުތަކާއި ޕެރޯލްގެ ޤާނޫނަށް ޔާމީނުގެ ސަރުކާރުން ގެނެސްފައިވާ އިސްލާޙުގައިވާ ގޮތުން މިއީ ކުރެވޭނެ ކަމެއް ނޫނެވެ. ސަބަބަކީ ސިޔާސީ ޕާޓީއެއްގެ ޙަރަކާތެއްގައި ޤައިދީއަކަށް އެއްވެސް ގޮތަކަށް ބައިވެރިވެވޭކަށް ނޯންނާނެކަމަށް ޔާމީނުގެ ވެރިކަމުގައި ޤާނޫނު އިސްލާޙުކޮށް ކަޅާއި ހުދުން ލިޔެފައިވާތީއެވެ.

އަދި ހަމައެއާއެކު، ޤައިދީންނާއި ބަންދު މީހުންނަށް ލިބޭ ލިއެކިއުންތައް ބަލައި ފާސް ކުރުމުގެ އިހުތިޔާރު ޑައިރެކްޓަރ އޮފް ޕްރިޒަންސްއަށް ލިބިގެންވާކަމަށްވެސް އެ ޤާނޫނުގައި ބުނެއެވެ.

ޖަލުތަކާއި ޕެރޯލް ޤާނޫނުގެ 86 ވަނަ މާއްދާގައި ބަޔާންކޮށްފައިވަނީ ޤައިދީންނާއި ބަންދު މީހުންނަށް ލިބޭ، ނުވަތަ އެމީހުން ފޮނުވާ ސިޓީ ފަދަ ތަކެތި ކިޔައި، އަޑުއަހައި، ރެކޯޑުކޮށް، ބަލައި ފާސް ކުރުމުގެ އިހުތިޔާރު ޑައިރެކްޓަރ އޮފް ޕްރިޒަންސްއަށް ލިބިގެންވާކަމަށެވެ.

އެހެންނަމަވެސް، ޔާމީނުގެ ވަކީލުން ވަނީ ލިއެކިއުންތައް ޗެކް ކުރުމަށް ދިނުމަށް ދެކޮޅު ހައްދަވާފައެވެ. އެކަން ކަރެކްޝަންސްއިން ކަށަވަރު ކޮށްދެއެވެ.

ކަރެކްޝަންސްއިން ބުނީ، ރައީސް ޢަބްދުﷲ ޔާމީން ޢަބްދުލް ގައްޔޫމްގެ ވަކީލުން ބައްދަލުވުމަށް ގެނައި ތަކެތި އާންމު އުސޫލުން ބަލާ ފާސްކުރުމަށް އެދުމުން އެކަމަށް ދެކޮޅު ހާދާފައި ވާތީ, ބައްދަލުވުން ކެންސަލްކުރެވިފައިވާ ކަމަށެވެ.

ޔާމީނުގެ ވެރިކަމުގައި ޖަލުތަކާއި ޕެރޯލް ޤާނޫނަށް ގެނައި އިސްލާޙުގައިވާ ގޮތުން، ސިޔާސީ ޕާޓީތަކާއި ޖަމިއްޔާތަކަށް އާންމު މެމްބަރެއްގެ ޙައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލުވެރި ފަރާތެއްގެ ގޮތުގައި ހުރުމާއި، އެ ތަންތަނުން ހިންގާ ޙަރަކާތްތަކުގައި ބައިވެރިވުމުގެ ޙައްޤުވެސް ޙުކުމެއް ތަންފީޒު ކުރުމަށްޓަކައި ޖަލުގައި ބަންދުކޮށްފައި ހުންނަ މުއްދަތުގައި ލިބިގެން ނުވެއެވެ.

މާނައަކީ ޔާމީނަށް ހަގީގަތުގައި ސިޔާސީ އެއްވެސް ޙަރަކާތެއްގައި އެއްވެސް މިންވަރަކަށް ބައިވެރިވުމުގެ ފުރުސަތެއްވެސް ނޯންނާނެއެވެ. ކެނޑިޑެސީ ހުށައެޅުމަކީ ހަމަ ގައިމުވެސް ސިޔާސީ ޕާޓީއެއްގެ އެންމެ ބޮޑު އެއް ޙަރަކާތަށް ވާނެއެވެ.

އޭރު މި އިސްލާޙު ގެނައީ ކުރީގެ ރައީސް މުޙައްމަދު ނަޝީދަށް 2018 ވަނަ އަހަރުގެ އިންތިޚާބުގައި ވާދަ ކުރުމުގެ ފުރުސަތުތައް ބަންދުކޮށްލުމުގެ ގޮތުންކަމަށް ތުހުމަތު ކުރެވިފައިވެއެވެ. ނަމަވެސް، އެ އިސްލާޙުގެ ބުރަ އާޚިރުގައި ޔާމީނަށްވެސް މިވަނީ އުފުއްލަވަން ޖެހިވަޑައިގެންފައެވެ.

ދެން އޮތީ އިލެކްޝަންސް ކޮމިޝަނަކީ ދައުލަތުގެ އިދާރާއަކަށްވާއިރު، ޔާމީނަށްވެސް ދައުލަތުގެ އިދާރާއަކަށް ފޯމާއި ލިއެކިއުން ހުށައެޅިދާނެކަމަށް ބުނާ ނުކުތާއެވެ. ޤައިދީންނަށް ޤާނޫނީ ވަކީލާއި، ކޯޓުތަކާއި، ސަރުކާރުގެ އިދާރާތަކާމެދު ސިޓީ ބަދަލު ކުރެވިދާނެއެވެ. ނަމަވެސް އެގޮތުން ފޮނުވޭ ލިއެކިއުންތައް ބެލުމުގެ ބާރުވެސް ޑައިރެކްޓަރ އޮފް ޕްރިޒަންސްއަށް ލިބިގެންވާކަމަށް އެ ޤާނޫނުގައިވެއެވެ.