ހދ. ކުޅުދުއްފުށީގައި ބޭއްވި ފުރަތަމަ ޔޫތް ލީޑަރޝިޕް ޕްރޮގްރާމު ނިންމާލައިފި އެވެ.
ހދ. ކުޅުދުއްފުށީގައި ބޭއްވި މި ޕްރޮގްރާމަކީ ޔުނައިޓެޑް ނޭޝަންސް ޑިވެލޮޕްމެންޓް ޕްރޮގްރާމް ( ޔޫއެންޑީޕީ) އާއި ދިރާގާއި ގުޅިގެން ބޭއްވި ހަރަކާތެކެވެ.
ހދ އަތޮޅުގައި ކުރިއަށްގެންދިޔަ މި ހަރަކާތުގައި 13 ކުދިން ބައިވެރިވެފައިވެ އެވެ. މިމަހުގެ 9 އަކުން 14 ވަނަ ދުވަހު ނިޔަލަށް ޔޫތް ލިޑަރޝިޕް ޕްރޮގްރާމު ކުރިއަށް ގެންގޮސްފައިވާ އިރު މި ޕްރޮގްރާމަކީ ކޮންމެ އަހަރު ބޭއްވުމަށް ރޭވިގެން ކުރިއަށްގެންދާ ހަރަކާތެކެވެ.
މި ހަރަކާތުގެ މަގްސަދަކީ އިޖްތިމާއީ ކަންކަމުގައި މީހުން ބައިވެރިވާލެއް އިތުރު ކުރުމައި މިފަދަ އިޖްތިމާއީ ކަންކަމުގައި މީހުން ބައިވެރިވާ ވަރު އިތުރުކުރުން ހިމެނެ އެވެ.
މި ޕްރޮގްރާމުގެ ތެރެއިން ތަފާތު ހުނަރުތައް ދަސްކޮށްދިނުމުގެ ސެޝަންތަކާއި، އިސްނަގައިގެން ކަންކަން ހިންގާނެ ގޮތްތަކުގެ އިތުރަށް ދިރާގުން ކުރިއަށްގެންދިޔަ ޚާއްސަ ސެޝަންތަކެއް ވެސް ވަނީ ބާއްވާފަ އެވެެ. މީގެ އިތުރަށް މޯލްޑިވްސް ރެޑް ކްރިސެންޓުން އިންތިޒާމްކޮށްގެން ފަސް އެއިޑް ސެޝަންތަކެއްވެސް ބައިވެރިންނަށް ވަނީ ނަގާދީފަ އެވެ.
މިފަދަ ހަރަކާތްތަކުގެ ތެރެއިން އާންމު ރައްޔިތުންގެ އަޑު މުޖުތަމައުގައި އުފުލުުމަށާއި ކަންކަން ރާވާ ހިންގުމުގައި އާއްމުންގެ ބައިވެރިވުން އިތުރުކުވެގެންދާނެކަމަށް ޔޫއެންޑީޕީން ފާހަގަކުރެ އެވެ.
މި ހަރަކާތް ނިންމުމުގެ ރަސްމިއްޔާތުގައި ވާހަކަދައްކަވަމުން އދ އިން ރާއްޖެއަށް ކަނޑައަޅުއްވާފައިހުންނަވާ ރެޒިޑެންޓް ކޯޑިނޭޓަރ ޝޯކޯ ނޯޑާ ވިދާޅުވީ، މި ބޭއްވުނު ޔޫޓް ލިޑަރޝިޕް ޕްރޮގްރާމުގެ ތެރެއިން ގިނަ ޒުވާނުންގެ ހިލާފަށް ދެނެގަނެވި،މުޖުތަމައުއަށް ރަގަޅު ބަދަލުތަކެއް ގެނައުމަށް އެކުގައި މަސައްކަތް ކުރެވިގެންދާނެ ކަމަށެވެ.
މި ރަސްމިއްޔާތުގައި ދިރާގުގެ ޗީފް މާކެޓިން އޮފިސަރ އިޒެބެލް ހަޖްރީ ވިދާޅުވީ، ޒުވާނުނުންނަށް ތަފާތު އެތަށް ޓެކްނޮލޮޖީތައް ބޭނުންކޮށްގެން ހެޔޮ ބަދަލުތައް ގެނައުމަށް މަސައްކަތް ކުރުމަށް ދިރާގުން ގިނަ މަސައްކަތްތަކެއް ކުރާ ކަމަށެވެ.
