އިންޓަ މިއާމީއާ ގުޅުނު ލިއޮނެލް މެސީ އަށް މޭޖާ ލީގު ސޮކާގައި "ފަސޭހައެއް ނުވާނެ" ކަމަށް ޑީސީ ޔުނައިޓެޑްގެ ކޯޗު ވޭން ރޫނީ ބުނެފިއެވެ.

ޓައިމްސް އޮފް ލަންޑަނަށް ދިން އިންޓަވިއުއެއްގައި މެންޗެސްޓާ ޔުނައިޓެޑްގެ ލެޖެންޑް ރޫނީ ބުނީ އެމްއެލްއެސްއަށް ގިނަ ކުޅުންތެރިން އައިސް އެޑަޕްޓް ކުރަން އުނދަގޫވާ ކަމަށާއި މެސީ އަށްވެސް އެ އުނދަގޫ ކުރިމަތިވެދާނެކަމަށެވެ.

ރޫނީ ބުނީ ހުރިހާ ކަމެއްވެސް އޮތީ މެސީއަށް ޓަކައި ހަމަޖެހިފައިކަމަށެވެ. އެގޮތުން މެސީ އާއެކު ބާސެލޯނާގައި ކުޅެފައިވާ ބުސްކޭޓްސް އެ ޓީމަށް ސޮއިކޮށްފައިވާއިރު، ޖޯޑި އަލްބާވެސް އެ ޓީމާ ގުޅުމާ ގާތްވެފައިވާއިރު، އިނިއެސްޓާ ނުވަތަ ސުއަރޭޒްވެސް ގުޅިދާނެކަމަށް ރޫނީ ބުންޏެވެ. އަދި އެ ޓީމުގެ ކޯޗަކަށް މެސީ އިތުބާރުކުރާ ކޯޗެއް ކަމަށްވާ ޓާޓާ މާޓިނޯ ހަމަޖައްސާފައިވާ ވާހަކަވެސް ރޫނީ ފާހަގަކުރިއެވެ.

ރޫނީ ބުނި ގޮތުގައި އެމްއެލްއެސް އާ ގުޅުނު ގިނަ ކުޅުންތެރިންނަށް އެ ލީގު ވެފައިވަނީ އުނދަގޫ ލީގަކަށެވެ. އޭގެތެރޭގައި ދަތުރުކުރުމާއި، އެކި ސިޓީތަކުގެ ޙާލަތްތައް ތަފާތުވުން ހިމެނޭކަމަށް އޭނާ ފާހަގަކުރިއެވެ.

14 އަހަރު ދުވަސް ޔުނައިޓެޑަށް ކުޅުމަށްފަހު ރޫނީ އެމްއެލްއެސްގެ ޑީސީ ޔުނައިޓެޑަށް ބަދަލުވީ 2018 ވަނަ އަހަރުއެވެ. 2020 ވަނަ އަހަރާ ހަމައަށް ދެ އަހަރު ދުވަހުގެ ތެރޭގައި އޭނާ ވަނީ ޑީސީ ޔުނައިޓެޑަށް 52 މެޗު ކުޅެދީ 25 ލަނޑު ކާމިޔާބުކޮށްފައެވެ. އޭނާ ކޯޗުގެ މަގާމަށް އެނބުރި އައިސްފައިވަނީ މިދިޔަ އަހަރުގެ ޖުލައި މަހުއެވެ.

ޕީއެސްޖީގައި ދެ އަހަރު ހޭދަކުރުމަށްފަހު މެސީ އިންޓަ މިއާމީއާ ގުޅުމަށް ނިންމީ މިދިޔަ މަހުއެވެ. އިންޓަ މިއާމީ އާއެކު ސޮއިކުރި އެއްބަސްވުމުގެ މުއްދަތު ހަމަވާނީ 2025 ވަނަ އަހަރުއެވެ. އިންޓަ މިއާމީގެ ކުޅުންތެރިއެއްގެ ގޮތުގައި މެސީ ދައްކާލާފައިވަނީ އާދިއްތަ ދުވަހުއެވެ.

އިންޓަ މިއާމީ އިން ބުނީ މެސީ އަށް އެންމެ ފުރަތަމަ ފުރުސަތު ލިބޭނީ މި މަހުގެ 21 ވަނަ ދުވަހު ލީގު ކަޕްގައި މެކްސިކޯގެ ކްރޫޒް އަޒުލްއާ ދެކޮޅަށް ކުޅޭ މެޗުގައި ކަމަށެވެ.