ހިނގަމުން މި ދަނީ އަހަރުގެ ތެރޭގައި މުސްލިމުންނާ ބައްދަލުކުރާ އެންމެ މާތް ދުވަސްތަކުގެ ތެރެއިން ދުވަސްތަކެކެވެ. ޛުލްޙިއްޖާ މަހުގެ ފުރަތަމަ 10 ދުވަހަކީ އަހަރުގެ އެހެން ދުވަސްތަކަށްވުރެ، އެ ދުވަސްތަކެއް މާތް ﷲ މަތިވެރިކުރައްވާ މާތް ކުރައްވާފައިވާ ދުވަސްތަކެކެވެ. އެހެންނަމަވެސް ރަމަޟާންމަހުގެ ފަހުދިހައިގެ ރޭތަކަކީ ޛުލްޙިއްޖާމަހުގެ ފަހު ދިހަ ރެއަށްވުރެ މާތްކަން ބޮޑު ރޭ ތަކެކެވެ.
ޛުލްޙިއްޖާ މަހުގެ އެންމެ މާތް 10 ދުވަސް ނިމިގެން ދަނީ އަޟްޙާ ޢީދުންނެވެ. މި ދުވަހުގައި އޮތީ ޢީދު ނަމާދު ކުރުމާއި، އުޟްޙިޔާ ކަތިލުމެވެ. އެއީ ޢީދު ދުވަހު ގެރި، ބަކަރި، އަދި ޖަމަލު ފަދަ ނަޢަމްސޫތްޕަކުން ﷲ ސުބުޙާނަހޫ ވަތަޢާލާއަށް ޤުރުބާންކުރުމެވެ. އެ ޤުރުބާނުގެ ސަބަބުން ﷲގެ ޙަޟްރަތަށް ކުއްތަންވުން ޙާޞިލް ކުރެވޭނެއެވެ. އެއީ ﷲގެ މަގުގައި މުދާ ހޭދަކުރުމާއި ނިކަމެތިންނަށް އިޙްސާންތެރިވުމެވެ. އެހެން ކަމުން އުޟްޙިޔާ ކަތިލުމަށް މުސްލިމުން ލޯބިކުރެއެވެ. އުޟްޙިޔާ ކަތިލަން ލިބޭނެ ފުރުޞަތަކަށް އިންތިޒާރުވެސް ކުރެއެވެ.
ކަން މިހެން އޮތް ނަމަވެސް، ދިރިއުޅުމުގެ މައިދާނުގައި ކުރިމަތިލާންޖެހޭ އެކި ކަހަލަ ގޮންޖެހުންތަކާއި ހުރަސްތަކާއެކު، އުޟްޙިޔާ ކަތިލުމުގެ ނަޞީބުން ބައެއް މީހުން މަޙްރޫމުވެދެއެވެ. ކުރިއަށް އޮތް ހަފުތާއަކީ އެ ހަފުތާއެއްގައި، ބަރަކާތްތެރި އަޟްޙާ ޢީދު ބައްދަލުކުރާ ހަފުތާއަށް ވާއިރު، ތޫނިސްގެ އަހުލުވެރިންގެ މެދުގައި އިންތިހާއަށް ވަނީ ކަންބޮޑުވުން އުފެދިފައެވެ. އާދަޔާ ޚިލާފު ހަނަފަސްކަމުގެ ސަބަބުން، ކަންބަޅިބަކަރި ފަދަ ނަޢަމްސޫފީގެ އަގުތައް ވަނީ އިންތިހާއަށް އުފުލިފައެވެ. އިޤްތިޞާދީ ކާރިސާއެއްގައި މިހާރުވެސް އޮތް ތޫނިސްގެ ކުރިމަގުގައި އަދިވެސް އޮތީ އިތުރު ބަނަ ވިލާތަކުން ބެދިފައި އޮތް ރާސްތާއެކެވެ.
އަޟްޙާ ޢީދު ގާތްވާ ވަރަކަށް ކަންބަޅިބަކަރީގެ ބައިގަނޑުތައް ތޫނިސްގެ އެކި ސިޓީތަކުން މީގެ ކުރިން ފެނެއެވެ. ހައިވޭތަކުގެ ހަތަރު އަނގޮޅިތަކުގައި ކަންބަޅިތަކަށް ކާންދީ ހަދަންވެސް މީހުން ތިބޭ މަންޒަރު ފެނެއެވެ. ރަށްފުށުގެ ހިސާބުތަކުގައި ހުއިހައްޕައިގެން ގެންގުޅުނު ކަންބަޅިބަކަރިތައް، މައި ސިޓީއަށް ގެނެއެވެ. ނަމަވެސް، މިއަހަރު ފެންނަމުންދާ މަންޒަރުތަކާއި އިވޭ އަޑުތައް ތަފާތެވެ. އަވަށްތަކުގެ ތެރެއިން ކަންބަޅިބަކަރިތައް ގޮވާ އަޑު ކިރިއާ އިވޭފަދައެވެ.
ރިޟާއަކީ އުޟްޙިޔާގެ ގޮތުގައި ކަންބަޅިބަކަރި ކަތިލުމަށް ކޮންމެހެން ބޭނުންވާ މީހެކެވެ. ނަމަވެސް، އޭނާގެވެސް ޝަކުވާއަކީ އަގުބޮޑުވުމެވެ. ރިޟާ ވިސްނައިގެން ހުރީ އަތްފޯރާ އަގެއްގައި ނެތީވިއްޔާ ލޯނެއް ނަގައިގެންވެސް ކަންބަޅިބަކަރިއެއް ގަންނާށެވެ.
މިދިޔަ އަހަރު 750 ދީނާރަށް ވިއްކި ވަރުގެ ކަންބަޅިބަކަރިއެއް ތޫނިސްގައި މިއަދު ލިބެންހުރީ 900 ދީނާރަށެވެ. އެއީ ގާތްގަނޑަކަށް 300 އެއްހާ ޑޮލަރެވެ. މަހެއްގެ މައްޗަށް، މުސާރައިގެ ގޮތުގައި ރިޟާއަށް ލިބެނީވެސް އެންމެ 950 ދީނާރެވެ.
އަހަރެންގެ މަހު މުސާރައަކީ 950 ދީނާރު. އަހަންނަށް ކަމުދާ ކަހަލަ ކަންބަޅިއެއް ފެނިގެން ސޭޓު ގާތު އަގު އަހާލީމަ ބުނީ 900 ދީނާރަށޯ. ދެން އަހަރެން އަތުގަ އޮންނާނީ ކޯންޗެއް؟ އެންމެ 50 ދީނާރު. 50 ދީނަރަށް ކޯންޗެއް ގަނެވޭނީ؟ މިއަހަރު ކަންބަޅިބަކަރީގެ އަގު ފިސާރި ބޮޑު. މިދިޔަ އަހަރު އަހަރެން ކަންބަޅިބަކަރިއެއް ގަތީ 750 ދީނާރަށް. މި އަހަރު، ހަމަ އެހާކަންވަރުގެ އެއްޗެއް މިއުޅެނީ 900 ދީނާރަށް. ނިކަން ދެކިބަލަ އަގުތައް އުފުލުނު ވަރު. އިންފްލޭޝަން ވަރަށް މަތީގަ އުޅެނީ. 1000 ދީނާރުން އެއްޗެއް ޚަރަދެއް ޚަލާޞްކޮށްނުލެވޭ.ރިޟާ؛ ތޫނިސްގެ ރަށްވެއްސެއް
ކަނޑުމައްޗަށް އަންހެން ދަރިފުޅު އަރުވައިގެން ބާޒާރު މަތީގައި ޙަރަކާތްތެރިވަމުން ދިޔަ އެކަކީ ޚާލިދު ފަރުޚީއެވެ. ކަންބަޅިބަކަރިތައް ބަލަމުން ގޮސް، މިއަހަރު އުޟްޙިޔާ ކަތިލުމުގެ ތަނަވަސްކަން އޭނާގެ އަތުގައި ނެތްކަން ޤަބޫލުކުރަން ޚާލިދަށް އެންމެ ފަހުން މަޖުބޫރިވިއެވެ.
އަގުތައް ވަރަށް ބޮޑު. މީ މިކަން މިހެން ދިމާވި ފުރަތަމަ އަހަރު. މީގެ ކުރިން މިހެނެއް ނުވޭ. މިދިޔަ އަހަރު ފައިބައިގެން ދިޔަ ގޮތުން، މި އަގުގަ މިއެއްޗިހި ވިއްކުމުގެ ޙައްޤު އެމީހުންނަށް އެބަ އޮތް. ހޫނު މޫސުމުގެ ދުވަސްވަރު ވާރޭ ވެހުން ލަސްވުމާ، ނަޢަމްސޫފިތަކަށް ކާންދޭ ސާމާނުގެ އަގުތައް އިންތިހާއަށް އަގުބޮޑުވެގެން ދިޔަ. ހަމަ ދަނޑުވެރިޔާ މަސައްކަތްކޮށް، ވަރުބަލިވާ ގޮތަށް، އަހަރެމެންވެސް ވަރުބަލިވޭ. އަހަރެމެންނަކަށް ގަނެވޭ އަގެއްގަ ނޫން މިހިރީ. ގަނެވޭ ވަރުގެ ތަނަވަސްކަން ނެތިއްޔާ ކަންބަޅިބަކަރި ނުގަނޭ. މީ މުޙައްމަދު ރަސޫލާﷲ صلى الله عليه وسلمގެ ސުންނަތެއް. ފަރުޟެއް ނޫން.ޚާލިދު ފަރުޚީ؛ ތޫނިސްގެ ރަށްވެއްސެއް
މުޅި ދުނިޔެ އިނދަޖައްސައިލި ކޮވިޑް-19ގެ ބަލިމަޑުކަން ކުރިމަތިވިއިރުވެސް ތޫނިސްގެ އިޤްތިޞާދު އޮތީ ނާޒުކު ފައްތަރެއްގައެވެ. އެފަދަ ހާލެއްގައި އޮއްވައި ކޮވިޑް-19ގެ ކޮޅިގަނޑުގައި ޖެހި، ދައުލަތުގެ މާލިއްޔަތު ހުލިވިއެވެ. ދުނިޔޭގެ ފެންވަރުގައި އުފުލެމުން ދިޔަ އަގުތަކާ ވާދަކޮށް، އެ ނުރައްކަލުން ޤައުމު ހިމާޔަތްކުރުމުގައި ތޫނިސްގެ ސަރުކާރު ފެއިލްވިއެވެ.
ޢުމުރުން 38 އަހަރުގެ ނަބީލް ރަހީމީއަކީ ތޫނިސްގެ ދަނޑުވެރިއެކެވެ. އޭނާ ކިޔައިދިން ގޮތުގައި އާދަޔާ ޚިލާފު ހަނަފަސްކަމާ ގުޅިގެން، އޭނާގެ ގޮދަނާއި ބާރުލީ ދަނޑުތައް މުޅިން ހަލާކުވީއެވެ. ކަންބަޅިތަކަށް ކާންދިނުމަށް ބޭނުންވާ އެކި ކަހަލަ ބާވަތްތައް ގަތުމަށް ބޮޑު ޚަރަދެއް ކުރަން މަޖުބޫރުވިއެވެ. ނަމަވެސް ނަޢަމްސޫފިތަކަށް ބޭނުންވާ ކާނާގެ ބާވަތްތައް ގަނެވޭނެ ތަނަވަސްކަން އޭނާގެ އަތުގައި ކިރިޔާ ހުރިފަދައެވެ.
ނަބީލް މިހާރުވެސް ހުރީ އޭނާ ގެންގުޅޭ 350 ކަންބަޅިބަކަރީގެ ތެރެއިން 200 ކަންބަޅިބަކަރި ވިއްކާލަން ނިންމައިގެންނެވެ. އެ ކަންބަޅިބަކަރިތައް ގެންގުޅޭނެ ތަނަވަސްކަން، މިއަދު އޭނާ އަތުގައި ނެތީމައެވެ. މިދިޔަ އަހަރުގެ އަޟްޙާ ޢީދުގައި ކަތިލުމަށް ތޫނިސްގައި 1.2 މިލިއަން ކަންބަޅިބަކަރި ނެރުނުއިރު، މިއަހަރު އެ ޢަދަދު އުޅެނީ ގާތްގަނޑަކަށް 850000 ގައެވެ. ތޫނިސްގައި ދަނޑު ހައްދައި، ނަޢަމްސޫފި ގެންގުޅޭ މީހުންގެ ޙައްޤުތައް ހިމާޔަތްކުރުމުގެ ގޮތުން، ތޫނިސްގެ ދަނޑުވެރިންގެ ޔޫނިއަނުން ވަނީ އެ ޤައުމަށް ކަންބަޅިބަކަރި އިމްޕޯޓްކުރަން އިންކާރުކޮށްފައެވެ.
