ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ މައްޗަށް އިތުބާރު ނެތް ކަމަށް މަޖިލީހަށް ހުށަހަޅާ އެމައްސަލަ ތާވަލްކޮށްފައި ވަނިކޮށް، ޖުޑީޝަލް ސާރވިސް ކޮމިޝަން (ޖޭއެސްސީ)ގެ ބައްދަލުވުމުގައި މަސީހު ބައިވެރިވެވަޑައި ގަންނަވައިފި އެވެ.
ޖޭއެސްސީން ހޯމަ ދުވަހު ބޭއްވި ބައްދަލުވުމުގައި މަސީހު ބައިވެރިވެވަޑައިގެންނެވިއިރު، އެ ބައްދަލުވުމުގެ އެޖެންޑާގައި އޮތީ އެކޮމިޝަންގެ ރައީސް ކަމުގެ މަގާމަށް ބޭފުޅަކު އައްޔަން ކުރުމެވެ. އަދި ކްރިމިނަލް ކޯޓުގެ އިސްގާޒީ އަބްދުލްބާރީ ޔޫސުފް އެކޮމިޝަނަށް ހާޒިރު ވުމަށް އަންގާފައިވާއިރު، އެބައްދަލުވުން ބޭއްވޭ ގޮތް ނުވެފައި ވަނީ ވެސް އެކޮމިޝަނުގެ ރައީސަކު ކަނޑައެޅިފައިނުވާތީ އެވެ.
ޖޭއެސްސީގެ ރައީސް ކަމުގެ މަގާމުގައި ހުންނެވި ސުޕްރީމް ކޯޓުގެ ފަނޑިޔާރު އަލީ ހަމީދު ވަނީ އެމިކޮޝަނުގެ ރައީސް ކަމުގެ މަގާމުގެ އިތުރުން އެކޮމިޝަންގެ މެމްބަރު ކަމުން ވެސް ވަކިކުރައްވާފަ އެވެ.
ފަނޑިޔާރު އަލީ ހަމީދު ވަކިކުރެއްވުމަށް ފަހު، ސުޕްރީމް ކޯޓުން ޖޭއެސްސީގެ މެމްބަރު ކަމަށް އައްޔަން ކުރެއްވީ އެ ކޯޓުގެ ފަނޑިޔާރު އަބްދުﷲ އަރީފް އެވެ. ޖޭއެސްސީގެ މެމްބަރުކަން އަރީފް އައްޔަން ކުރައްވާފައިވާކަން ރައީސް އޮފީހުން ހާމަ ކޮށްފައިވަނީ ހޯމަ ދުވަހު އެވެ.
ޖޭއެސްސީގައި މަސީހު ހިމެނި ވަޑައިގަންނަވަނީ މަޖިލީހުގެ ރައީސްގެ ހައިސިއްޔަތުންނެވެ. މަސީހުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހަޅާފައިވަނިކޮށް، މަޖިލީހުގެ ރައީސްގެ ހައިސިއްޔަތުގެ ބައެއް ޒިންމާތަކުން، އެކަހެރިވެ ވަޑައިގަންވަންޖެހޭއިރު، ޖޭއެސްސީގެ ބައްދަލުވުންތަކުގައި ބައިވެރި ނުވެވޭނެ ކަމަށް ރައްޔިތުންގެ މަޖިލީހުގެ ބައެއް މެމްބަރުން ވިދާޅުވެއެވެ.
މަޖިލީހުގެ ތިމަރަފުށި ދާއިރާގެ މެމްބަރު މުހައްމަދު މުސްތަފާ ވިދާޅުވެފައި ވަނީ މަސީހުގެ އިތުބާރު ނެތްކަމުގެ މައްސަލަ ކުރިމަތީ އޮތްވާ މަޖިލީހުގެ ރައީސަށް ޖޭއެސްސީގެ ބައްދަލުވުމުގައި ބައިވެރިވެވަޑައި ނުގެންނެވޭނެ ކަމަށެވެ. އަދި މުސްތަފާ ވަނީ ގާނޫނީ ވަކީލުންތައް ކޮބައިތޯ ވިދާޅުވެ ސުވާލު އުފައްދަވާފަ އެވެ.
No confidence vote Kurimathee ohvaa Majilis Raees ah JSC ge bahdhalu vumuga baiveri eh nuveveyne..! Kobaa tho qaanoonee vakeelun thah?
— Mohamed Musthafa (@Thimarafushi) July 10, 2017
އެނގިފައިވާ ގޮތުގައި ޖޭއެސްސީގެ ހޯމަ ދުވަހުގެ ބައްދަލުވުން ކުރިއަށް ގެންދެވިފައިނުވުމާ ގުޅިގެން އިތުރު ބައްދަލުވުމެއް ހޯމަ ދުވަހުގެ ރޭ ބޭއްވުމަށް ވަނީ ނިންމަވާފަ އެވެ.
