މުސްލިމުން އެކަކު އަނެކަކަށް އިހުތިރާމުކުރުމުގެ ތެރޭގައި އެހެން މީހުންގެ ސިއްރުތައް ވަންހަނާކުރުން ވާކަމަށް ހުކުރު ޚުތުބާގައި ބުނެފިއެވެ.

"އިހުތިރާމުކުރުން" މި މައުޟޫއަށް އިއްވި ހުކުރު ޚުތުބާގައި ވަނީ އެކަކު އަނެކަކަށް އިހްތިރާމުކުރުމަށް މާތް ﷲ އަންގަވާފައިވާކަމަށް ބުނެފައެވެ. މިއަދު މި މުޖުތަމައުގައި އިހުތިރާމުނުކުރުމުގެ ނުބައި އާދަ ވަރަށް ބޮޑަށް ފެތުރިފައިވާކަމަށާއި، އެކަކު އަނެކަކަށް އިހުތިރާމުކުރުމަކީ ދީނުގެ މަތިވެރި އަޚުލާގުގެ ތެރޭގައި ހިމެނޭ ކަމެއް ކަމަށް ޚުތުބާގައި ބުނެފައިވެއެވެ.

އިހުތިރާމުކުރުމުގެ ތެރޭގައި އިޖުތިމާއީ ގޮތުން އެކަކު އަނެކަކަށް އިހުތިރާމުކުރުންވާ ކަމަށާއި، މިގޮތުން ދީނީ ގޮތުން ފާހަގަކުރެވޭ މުނާސަބާތަކުގައި ތަހުނިޔާ ކިޔުމާއި، ހަދިޔާ ބަދަލުކުރުމާއި، ހިތާމަތަކުގައި ތައުޒިޔާ ކިޔުމާއި، އުފަލާއި ހިތާމައިގައި ބައިވެރިވުމާއި، ދަތިކަމެއް ކުރިމަތިވުމުން އެކަމުން ސަލާމަތްވުމަށް އެހީވުން އިހުތިރާމުކުރުމުގެ ތެރޭގައި ހިމެނޭ ކަމަށް ޚުތުބާގައި ބުނެފައިވެއެވެ.

މީގެ އިތުރުން އެހެން މީހުންގެ ސިއްރުތައް ވަންހަނާކުރުންވެސް އިހުތިރާމުކުރުމުގެ ތެރޭގައި ހިމެނޭ ކަމަށާއި، މީހުންގެ ވާހަކަތައް ވަގަށް އަޑުއަހައި ފާޅުކުރުމާއި، މީހުންގެ ފޮޓޯތަކާއި ވީޑިއޯތައް އާންމުކުރުމަކީ އިހުތިރާމުގެ ދާއިރާއިން މުޅިން ބޭރު ކަންކަން ކަމަށް ޚުތުބާގައި ބުނެފައިވެއެވެ.

މީގެ އިތުރުން ޖަލްސާތަކާއި ބައްދަލުވުންތަކުގައި ހިނގާ ކަންތައްތަކާއި، ދެކެވޭ ވާހަކަތަކަކީވެސް އެއަށް އިހުތިރާމުކުރަންޖެހޭ ސިއްރުތަކެއް ކަމަށް ޚުތުބާގައި ބުނެފައިވެއެވެ. މި ޒަމާނުގައި ފެނިގެންދަނީ މިއާ ޚިލާފު މަންޒަރެއް ކަމަށް ޚުތުބާގައި ވަނީ ބުނެފައެވެ.

އިހުތިރާމުކުރަންޖެހޭ ކަންތައްތަކުގެ ތެރޭގައި ތިބާއާއި އެހެންމީހުންގެ ވަގުތުވެސް ހިމެނޭ ކަމަށް ޚުތުބާގައި ބުނެފައިވެއެވެ. ވަގުތަކީ ތިބާގެ ރައުސުލްމާލު ކަމަށާއި، ބުއްދިވެރިއަކީ ވަގުތުގެ އަގު ދަންނަ މީހާ ކަަމަށް ޚުތުބާގައި ބުނެފައިވެއެވެ. އޭނާގެ ވަގުތުން ފަޅި ސިކުންތެއްވެސް ދުނިޔެއާއި އާޚިރަތަށް ފައިދާހުރި ކަމަކަށް މެނުވީ ހޭދަ ނުކުރާނެ ކަމަށް ޚުތުބާގައި ވަނީ ފާހަގަކޮށްފައެވެ.