ޓެކްސް ބަޔާންތަކާ އެކު ހުށައަޅާ ފައިނޭންޝަލް ސްޓޭޓްމަންޓްތައް އޮޑިޓްނުކުރާ ގޮތަށް ހަމަޖައްސަން ވިސްނާ ކަމަށް ބުނެ މީރާގެ އިސް ވެރިޔަކު އެކައުންޓެންޓުންނަށް ވަރުގަދަ އިންޒާރެއް ދެއްވައިފި އެވެ.

ފައިނޭންޝަލް ސްޓޭޓްމަންޓް  ހުށަހަޅަން ނުޖެހޭ ގޮތަށް އުސޫލް ބަދަލު ކުރެވިދާނެ ކަމަށް، މީރާގެ އޮފިޝަލް ވިދާޅުވީ މީރާގެ ރަޖިސްޓާޑް އޮޑިޓަރުންނާއި، ޓެކްސް އޭޖެންޓުން ތިއްބަވާ "އެކައުންޓެންޓްސް އޮފް މޯލްޑިވްސް" ވައިބަރ ގްރޫޕްގަ އެވެ.

އިންޒާރުގެ އެ މެސެޖުގައި ވަނީ މީރާއިން އެކައުންޓިން އާއި އޮޑިޓްގެ ފަންނު ހަލާކުކުރާ ކަމަށް ތުހުމަތު ކުރަމުން ދާތީ އޮޑިޓްކޮށްފައިވާ ފައިނޭންޝަލް ސްޓޭޓްމަންޓްތަކާ ނުލައި މީރާއިން ޓެކްސް ބަޔާންތައް ގަބޫލުކުރަން ވިސްނާކަމުގައެވެ. އެއީ ޓެކްސް ދައްކާ ފަރާތްތަކުން އުފާވާނެ ކަމެއް ކަމަށް ވެސް އޮފިޝަލް ވިދާޅުވެފައި ވެއެވެ. އަނެއް މެސެޖުގައި ވަނީ، އޮޑިޓްކޮށްފައިވާ ފައިނޭންޝަލް ސްޓޭޓްމަންޓްތަކާ ނުލައި ޓެކްސް ބަޔާންތައް ހުށައަޅާ ގޮތަށް ނިންމުމުން ޓެކްސް އޭޖެންޓުންނާއި އޮޑިޓަރުންނަށް ކުރާނެ އަސަރާ މެދު ވިސްނަމުން ގެންދާކަމުގައެވެ.

މި ގޮތަށް އޮފިޝަލް ވިދާޅުވުމުން، ބައެއް އޮޑިޓަރުން ވަނީ ކަންބޮޑުވުން ފާޅުކޮށްފައެވެ.

މީރާގެ އިސް އޮފިޝަލަކު މިގޮތަށް އިންޒާރު ދެއްވީ އޮޑިޓް އަދި އެކައުންޓިންގެ ފަންނަށް ދަތިވާ ގޮތަށް މީރާއިން އަމަލުކުރާ ކަމަށް، "އެކައުންޓެންޓްސް އޮފް މޯލްޑިވްސް" ވައިބާ ގްރޫޕެއްގައި އޮޑިޓަރުންތަކެއް ވާހަކަ ދައްކަވާފައި ވަނިކޮށެވެ.

އޮޑިޓް ނުކުރާ ފައިނޭންޝަލް ސްޓޭޓްމަންޓްތައް މީރާއިން ގަބޫލުކުރަން ފަށައިފި ނަމަ، އެ ބަޔާންތަކުގެ ސައްހަކަން ބެލުމަށްޓަކައި މީރާގެ އޮޑިޓަރުން އަލުން އޮޑިޓް ކުރަންޖެހޭނެ ކަމަށް، ބައެއް އޮޑިޓަރުން ވިދާޅުވި އެވެ.

މިހާރު އޮންނަ އުސޫލުން ނަމަ، އަހަރަކު 10 މިލިއަން ރުފިޔާއަށް ވުރެ އިތުރަށް އާމްދަނީ ލިބޭ ކޮންމެ ވިޔަފާރިއަކުން ފައިނޭންޝަލް ސްޓޭޓްމަންޓްތައް މީރާއިން ގަބޫލުކުރާ އޮޑިޓަރަކު ލައްވާ އޮޑިޓް ކުރުމަށް ފަހު ޓެކްސް ބަޔާނާ އެކު ހުށައަޅަންޖެހެއެވެ. މިއީ އޮޑިޓަރުންނަށް އާމްދަނީ ލިބޭ ވަރަށް ބޮޑު ވަސީލަތެކެވެ.