ރައްޔިތުންގެ މަޖިލީހުގެ މެމްބަރުންގެ އަދަދު 87 އަށްވުރެ އިތުރު ނުވާނެހެން އެ އަދަދު އެ ހަމައިގައި ހިފެހެއްޓުމަށް ތާއީދުކުރާ ކަމަށް ރައްޔިތުންގެ މަޖިލީހުގެ ގިނަ މެމްބަރުން ވިދާޅުވެއްޖެއެވެ.

ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ހުށަހެޅުއްވި އިސްލާހުގައި ބުނެފައިވަނީ މަޖިލީހުގެ މެމްބަރުންގެ އަދަދަކަށް ވާން ޖެހޭނީ 87 ކަމަށެވެ. އަދި އިންތިޚާބީ ދާއިރާތަކުގެ ގޮތުގައި 87 އިންތިހާބީ ދާއިރާ ކަނޑައަޅާ އެ އިން ކޮންމެ އިންތިހާބީ ދާއިރާއަކުން އިންތިހާބު ކުރަން ވާނީ އެންމެ މެމްބަރަކު ކަމަށް ގާސިމް ހުށަހެޅުއްވި އިސްލާހުގައި ވަނީ ހިމަނާފައެވެ. އެ އިސްލާހަށް ތާއީދުކުރެއްވި މެމްބަރުން ވަނީ އެ އިސްލާހަކީ މުހިންމު އިސްލާހެއް ކަމަށް ވިދާޅުވެފައެވެ. މިހާރު ޤާނޫނު އަސާސީ އޮތީ ދައުލަތުގެ ޚަރަދު ވަރަށް ބޮޑުވާގޮތަށް ކަމަށާއި އެއީ ދުރު މުސްތަގުބަލަށް ބަލާއިރު އެންމެ ރަނގަޅު ގޮތް ނޫން ކަމަށް ވެސް މެމްބަރުން ވިދާޅުވިއެވެ.

އެހެންނަމަވެސް ބައެއް މެމްބަރުން ވަނީ އެ އިސްލާހުގެ ސަބަބުން ރައްޔިތުންގެ އަޑު ކެނޑިގެން ހިނގައިދާނެ ކަމަށް ވިދާޅުވެފައެވެ. އަދި އެއީ ދައުލަތުގެ ބާރު ބޮޑުވެ ރައްޔިތުންގެ ބާރު ކުޑަވާ ކަމެއްގެ ގޮތުގައި އެ މެމްބަރުން ވަނީ ސިފަކުރައްވާފައެވެ.

މިހާރު ގާނޫނުއަސާސީގައިވާ ގޮތުން ކޮންމެ އިދާރީ ދާއިރާއެއްގައި ރަޖިސްޓަރީކޮށްފައިވާ އާބާދީގެ ފުރަތަމަ 5،000 މީހަކަށް ނުވަތަ 5،000 މީހުން ހަމަނުވާ ކޮންމެ އިދާރީ ދާއިރާއަކަށް ދެ މެމްބަރުން ހުންނަން ޖެހެއެވެ. އަދި އިދާރީ ދާއިރާއެއްގައި ރަޖިސްޓަރީކޮށްފައިވާ އާބާދީ 5،000 އަށް ވުރެ އިތުރުވާ ނަމަ އާބާދީގެ ފުރަތަމަ 5،000 މީހުންނަށް ވުރެ އިތުރުވާ ކޮންމެ 5،000 މީހަކަށް މެމްބަރަކު އިންތިހާބު ކުރަން ޖެހެއެވެ.