އޮކްޓޯބަރ މަހުން ފެށިގެން އިންޑިއާއިން ހަކުރު ބޭރުކުރާ މިންވަރު މަދުކުރުމަށް ނިންމާފައިވާ ކަމަށް ސަރުކާރުގެ މަސްދަރުތަކާއި ހަވާލާދީ ނޫސްތަކުގައި ރިޕޯޓްކޮށްފިއެވެ.
އޮކްޓޯބަރުގައި ހަކުރު ބޭރުކުރާ މިންވަރު މަދުކޮށްފި ނަމަ މިއީ މިއަހަރުގެ ތެރޭގައި އެގައުމުން ހަކުރު ބޭރުކުރާ މިންވަރު މަދު ކުރި ދެވަނަ ފަހަރަށް ވެގެންދާނެއެވެ. އަދި މިކަމުގެ ސަބަބުތަކުގެ ތެރޭގައި ގައުމުގެ ތެރޭގައި ހަކުރު ބޭނުންވާ ވަރަށް ބެހެއްޓުމާއި، އަގުތައް އެއްވަރެއްގައި ހިފެހެއްޓުމަށް ކުރާ މަސައްކަތްތައް ހިމެނޭ ކަމަށް ކަމާއިބެހޭ ފަރާތްތަކާއި ސަރުކާރުގެ މަސްދަރުތަކާއި ހަވާލާދީ ނޫސްތަކުގައި ރިޕޯޓްކޮށްފައިވެއެވެ.
ދުނިޔޭގައި އެންމެ ގިނައިން ހަކުރު އުފައްދާ އިންޑިއާއިން މި އަހަރުގެ އޮކްޓޯބަރުން ފެށިގެން އެއް އަހަރު ދުވަހަށް ހަކުރު ބޭރުކުރާ މިންވަރު 7 މިލިއަން ޓަނުން 6 މިލިއަން ޓަނަށް ދަށްކޮށްފާނެ ކަމަށް ބެލެވެއެވެ. ސަރުކާރުން މިކަމާއި ގުޅިގެން ރަސްމީކޮށް އަދި ވަކިއެއްޗެއް ބުނެފައެއް ނުވެއެވެ.
އަދި މިއާއެކު އިންޑިއާއިން ހަކުރު ބޭރުކުރާ މިންވަރު މަދުކޮށްފި ނަމަ ހަކުރުގެ އަގު ބޮޑުވެގެން ހިނގައިދާނެ ކަމަށް ވިޔަފާރިވެރިން ވަނީ ބުނެފައެވެ.
