ވެކްސިން ފުރިހަމަކޮށްފައި ތިބި ނަމަވެސް ސައުދީ އަރަބިއްޔާއަށް އެތެރެވާ ހުރިހާ އެންމެން 48 ގަޑިއިރުނުވާ ނެގެޓިވް ޕީސީއާރު ނުވަތަ އެންޓިޖެން ޓެސްޓެއްގެ ނަތީޖާއާއެކު ވަންނަންޖެހޭ ގޮތަށް ސައުދީން އުސޫލަށް ބަދަލު ގެނެސްފިއެވެ.
ސައުދީން ބުނީ މިއުސޫލަށް ސައުދީގެ ރައްޔިތުންވެސް އަމަލުކުރަން ޖެހޭނެކަމަށެވެ. ސައުދީން ވަނީ މީގެކުރިން ވެކްސިން ފުރިހަމަކުރިކަމަށް ބަލާނީ ބޫސްޓަރ ޑޯޒް ޖެހުމުންކަމަށްވެސް ކަނޑައަޅާ އުސޫލަށް ބަދަލު ގެނެސްފައެވެ. ސައުދީ އަރަބިއްޔާގެ މިނިސްޓްރީ އޮފް އިންޓީރިއަރ އިން ބުނެފައިވަނީ އެޤައުމުގެ ކޮންޓެކްޓް ޓްރޭސިންގ އެޕްލިކޭޝަން "ތަވައްކަލްނާ" ގައި ވެކްސިން ފުރިހަމަވެފައިވާކަމަށް ބަލާ މިންގަނޑަށް ފެބްރުއަރީ 1 އިން ފެށިގެން ބަދަލު އަންނާނެކަމަށެވެ.
މިއުސޫލަށް އަމަލުކުރަން ފެށުމުން ވެކްސިން ފުރިހަމަކޮށްފައިވާ މީހުންނަށް ނޫނީ އާންމު ތަންތަނާއި، ފެސިލިޓީތަކާއި، ކުޅިވަރުކުޅެ މުނިފޫހިފިލުވާ ތަންތަނާއި، މަތިންދާ ބޯޓާއި އާންމު ދަތުރުފަތުރުގެ ނިޒާމު ބޭނުންނުކުރެވޭގޮތަށް ސައުދީން ވަނީ ނިންމާފައެވެ.
ސައުދީގެ އިންޓީރިއަރ މިނިސްޓްރީގެ ސްޕޯކްސްމަން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ މިއުސޫލާ ޚިލާފުވި 24،319 މައްސަލައެއް ފާއިތުވި ހަފްތާގެ ތެރޭގައި ރިޕޯޓްކޮށްފައިވާކަމަށެވެ.
ސައުދީގެ އިންޓީރިއަރ މިނިސްޓްރީގެ ސްޕޯކްސްމަން ވިދާޅުވީ ސައުދީން ބޭރަށް ދަތުރުކުރާ މީހުންވެސް ބޫސްޓަރ ޑޯޒް ޖަހަން ޖެހޭނެކަމަށެވެ. އެގޮތުން ފެބްރުއަރީ މަހުގެ 9 ވަނަ ދުވަހުން ފެށިގެން ސައުދީން ބޭރަށް ދަތުރުކުރެވޭނީ ބޫސްޓަރ ޑޯޒް ޖަހައިގެން ކަމަށް ވިދާޅުވިއެވެ.
ސައުދީގައި މިހާރު ފެންނަ ކޭސްތަކުގެ އަދަދު ވަނީ ދަށަށްދާން ފަށާފައެވެ. ސައުދީގައި މިހާތަނަށް 58 މިލިއަން މީހުން ވަނީ ދެ ޑޯޒް ފުރިހަމަކޮށްފައެވެ.
