މޯލްޑިވްސް ޕޮލިސް ސާވިސް އިން ތަހުގީގު ކުރަމުންދާ މަސައްލައަކާ ގުޅިގެން މޮނާޒާ ނައީމުގެ ދަރި މުޒައްފަރު މުހައްމަދު ނައީމް (މުޖޫ) ހޯދަން އިއުލާން ކޮށްފިއެވެ.

ފުލުހުން ހޯމަ ދުވަހު ނެރުނު ނޫސްބަޔާނެއްގައި ބުނެފައި ވަނީ ކ. މާލެ، މ. ވެލިދޫގޭ މުޒައްފަރު މުހައްމަދު ނައީމް (37 އަހަރު) އަކީ ފުލުހުންގެ ތަހުގީގަށް ހާޒިރު ކުރަން ބޭނުންވާ މީހެއް ކަމަށެވެ.

ފުލުހުންގެ ބަޔާނުގައި ބުނެފައިވާ ގޮތުގައި މުޒައްފަރުގެ ނައީމް ރާއްޖެއިން ބޭރުގައި ދިރިއުޅެމުންދާ ކަމަށް މައުލޫމާތު ލިބިފައި ވާތީ އޭނާގެ މައްޗަށް ތުހުމަތު ކުރެވޭ މައްސަލާގައި ކުރެވޭ ތުހުމަތުތަކަށް ދިފާއުގައި ވާހަކަ ދެއްކުމުގެ ފުރުސަތު ދިނުމުގެ ގޮތުން މި މަހުގެ 29 ވަނަ ދުވަހުން ފެށިގެން 14 ދުވަސް ތެރޭގައި މޯލްޑިވްސް ޕޮލިސް އަށް ހާޒިރުވުމަށް އަންގާ ކަމަށެވެ.

މީގެ އިތުރުން ފުލުހުންގެ ބަޔާނުގައި ބުނެފައި ވަނީ މުޒައްފަރު މި މަހުގެ 29 ވަނަ ދުވަހުން ފެށިގެން 14 ދުވަސް ތެރޭގައި ފުލުހުންގެ އިދާރާ އަށް ހާޒިރު ނުވެއްޖެ ނަމަ މުޒައްފަރު ނައީމްގެ މައްޗަށް ތުހުމަތު ކުރެވޭ މައްސަލައާއި ގުޅިގެން މިހާތަނަށް ލިބިފައިވާ ހެއްކާއި ގަރީނާތަކުގެ މައްޗަށް ބިނާކޮށް މުޒައްފަރުގެ ޢައިރު ހާޒިރުގައި ތުހުމަތު ކުރެވޭ މައްސަލައިގައި ދައުވާ ކޮށްދިނުމަށް އެދި ޕްރޮސިކިޔުޓާ ޖެނަރަލްގެ އޮފީހަށް ފޮނުވާނެ ކމަށެވެ.

މުޒައްފަރު ނައީމް ހޯދުމަށް ފުލުހުން އިއުލާން ކޮށްފައިވާއިރު އޭނާ ހޯދަނީ ފުލުހުން ތަހުގީފގު ކުރަމުންދާ ކޮން މައްސަލައެއްގައި ކަމެއް ފުލުހުން ހާމައެއް ނުކުރެއެވެ.

މުޖޫ ހޯދާއ އިރު އޭނާއަކީ ސޯޝަލް މީޑިއާގައި ވަރަށް އެކްޓިވް ފަރާތެކެވެ. އަދި އިސްލާމް ދީނަށް ރައްދުވާ ގޮތަށް ތަފާތު ވާހަކަތައް ދައްކާފައި ވެއެވެ.  އަދި ސޯޝަލް މީޑިއާގައި އޭނާއަކީ ދީން ގަބޫލުނުކުރާ މީހެއް ކަމަށް ބުނެފައި ވެއެވެ.