ތ. އަތޮޅު އާބާދީ އެންމެ ބޮޑު ރަށް، ތިމަރަފުށީ ރައްޔިތުން ރަމަޟާން މަހަށް މަރުހަބާ ކިޔަން ޖެހިފައިވަނީ ކަނު އަނދިރީގަ އެވެ.
އެ ރަށުން ރާއްެޖެއެމްވީއާ ވާހަކަ ދެއްކި ބައެއް މީހުން ބުނި ގޮތުގައި ރަށުން ކަރަންޓް ކެނޑުނީ މިއަދު ހަވީރު 5:00 ހާއިރު ކަމަށެވެ. ޖަނަރޭޓަރަށް ދިމާވި މައްސަލަ ހައްލުކުރުމުގެ މަސައްކަތް ކުރަމުން ދިޔަ ނަމަވެސް، މައްސަލަ ހައްލު ކުރެވި އަލުން ކަރަންޓް ދެވޭނެ ވަގުތެއް އަދި ނޭނގޭ ކަމަށް ރާއްޖެއެމްވީއާ ވާހަކަ ދެއްކި ބައެއް މީހުން ބުންޏެވެ.
ޖަނަރޭޓަރު މަރާމާތު ކުރުން ލަސްވަނީ، އިންޖީނު ގޭގައި އެ މަަސައްކަތް ދަންނަ މީހަކަށް ހުރި އެކަކު ގޭގައި މަޑުކުރަން އަންގާފައި ހުރުމުން ކަމަށެވެ. އޭނާ ގޭގައި މަޑުކުރަން އެނގީ ކައުންސިލް އިންތިހާބުގެ ވޯޓާ ގުޅިގެން ކަމަށްވެ އެވެ.
ތިމަރަފުށީގައި ކަރަންޓް ނެތުމުގެ ސަބަބުން، އާންމު ދިރިއުޅުމަށާއި ވިޔަފާރިތަކަށް ވެސް ބޮޑެތި ދަތިތަކާ ވަނީ ކުރިމަތިވެފަ އެވެ.
ތިމަރަފުށިން ކަރަންޓް ކެނޑިފައިވާއިރު، ހޮނިހިރު ދުވަހަކީ ރަމަޟާން މަހުގެ ފުރަތަމަ ދުވަހެވެ.
މިކަމާ ގުޅޭ ގޮތުން ފެނަކަ ކޯޕަރޭޝަނުގެ ބަހެއް ލިބޭ ގޮތް ވަނީ ނުވެފަ އެވެ.
