''މިއީ މަގޭ މަހަލްދީބު'' އަޑުން ޖައްވު ދަނީ ގުގުމަމުންނެވެ. ޓީޝާޓުތަކާއި، ތޮފިތަކާއި، ދިދަތަކުގައި ވެސް ލިޔަމުން ދަނީ މިއީ މަގޭ މަހަލްދީބެވެ. ކުރިން މަދުން ނޫނީ އަޑު ނީވުނު ނަމަވެސް މިހާރު މަހަލްދީބު މި ނަން މިވަނީ ވަރަށް ބޮޑަށް އާއްމު ވެގެން ގޮސްފައެވެ. އެގޮތުން މިދުވަސްވަރު ކޮންމެ ތާކަށް ދިޔަ ނަމަވެސް މިއަޑު ނީވި ނުދާނެއެވެ. މަހަލްދީބު މިނަން މިހައި ބޮޑަށް އާއްމު ވެގެންގޮސްފައި ވަނީ ހުކުރު ދުވަހު ރާއްޖޭގައި ފެށި ސާފް ޗެމްޕިއަންޝިޕުގެ ރާއްޖޭގެ ޕްރޮމޯޝަނަލް ކެމްޕެއިން މަގޭ މަހަލްދީބް ލޯންޗުކުރި ހިސާބުންނެވެ.
ސާފް ޗެމްޕިއަންޝިޕު ލޯންޗުކުރި ހިސާބުން މަގޭ މަހަލްދީބު މި ލަވަ ދިވެހިންނަށް ވަނީ ވަރަށް ބޮޑަށް ކަމުގޮސްފައެވެ. ދިވެހިންގެ ހިތްތަކާއި މިލަވަ ކުޅެލާފައިވާއިރު، ގިނަބައެއް މަގުބޫލުކަން މި ލަވައަށް ލިބިގެން ގޮސްފައިވެއެވެ.
ދަނޑުގައި ސަޕޯޓަރުން ފޯރިއަރުވަން ބޭނުންކުރާނެ ޝިއާރެއް ގޮތުގައި މަހަލްދީބު ކަނޑައަޅާފައިވާތީ އެކަމާއި ގުޅިގެން އެފްއޭއެމުން ބުނެފައިވަނީ މަހަލްދީބް ބޭނުންކުރުމަށް ނިންމާފައިވަނީ އަވައްޓެރި ގައުމުތަކުން ރާއްޖެއަށް މުޚާތަބުކުރަނީ މަހަލްދީބުގެ ނަމުން ކަމަށްވާތީ ކަމަށެވެ. މި އަހަރުގެ ސާފް ޗެމްޕިއަންޝިޕުގެ ކެމްޕެއިންގެ ސްލޯގަން އެއްގެ ގޮތުގައި ބޭނުންކުރާނީ، "ތިންވަނަ ފަހަރު، މީއެ ފަހަރު" އެވެ. އަދި ސާފް ޗެމްޕިއަންޝިޕްގެ ބްރޭންޑިންގައި ބޭނުންކޮށްފައިވާ ޑިޒައިންތަކުގައި ހިމަނާފައިވަނީ ރާއްޖޭގެ ކަނޑުގެ ދިރުންތަކެވެ. ލޯގޯ ޑިޒައިންގައި ވެސް ބޭނުންކޮށްފައިވަނީ ކަނޑުގެ ދިރުންތަކާއި މަސްތަކެވެ.
ނަމަވެސް ދިވެހިރާއްޖެއަށް މަގޭ މަހަލްދީބު ކިޔުނީ ކީއްވެގެންތޯ މިއީ ބައެއް މީހުން އުފައްދާ ސުވާލެކެވެ. ދިވެހިންގެ ލެއާ ގުޅިފައިވާ ގައުމީ ކުޅިވަރެއްގައި ޝިއާރެއްގެ ގޮތުގައި މަހަލްދީބު ހަމަޖެހިގެންދިޔައީ ކީއްވެތޯ ވެސް ސުވާލު އުފައްދައެވެ. އަދި މިއީ ދިވެހި ބަހެއްތޯ ބައެއް މީހުން ސުވާލު އުފައްދާފައިވެއެވެ.
ތާރީޚު ދިރާސާކުރާ ފަރާތްތަކުން ވިދާޅުވާ ގޮތުގައި މަހަލްދީބު ތިން ގޮތަކަށް ކިޔައެވެ. ރާއްޖޭގެ ބަދަލުގައި "ދީބު" ބޭނުންކުރާއިރު، އިންޑިއާއިން ދިވެހިރާއްޖެއަށް މަހަލްދީބް ކިޔަނީ ރާއްޖެއިން އަންހެނުންނަށް އިހުތިރާމްކޮށް އަންހެނުން ޚާއްސަ ސަމާލުކަމެއް ދޭތީއެވެ. އެއީ މެހެލާގެ ނަމުން އިންޑިއާއިން އަންހެނުންނަށް މުޚާތަބު ކުރާތީއެވެ. އެކަމުގައި މުހައްމަދު ލުތުފީގެ ރައުޔުއަކީވެސް މަހަލްދީބަކީ ''އަންހެނުންގެ ރާއްޖެ'' އެވެ.
އަދި ލަންކާ ބަހުން މާލްއަކީ ކަނޑު މަހަށް ކިޔާ ނަމަށްވާތީ ލަންކާ މީހުން ރާއްޖެއަށް ކިޔައީ މާލްދީބެއެވެ. އެގޮތުން ޢަބްދުލްހަކީމް ޙުސައިން މަނިކުގެ ރައުޔުއަކީ މާލްދީބަކީ ''މަސްވެރިންގެ ރާއްޖެ'' މިއެވެ.
އޭގެ އިތުރުން، މުތްތަކަށް ނިސްބަތްކޮށްވެސް މަހަލް ކިޔާ އުޅެއެވެ. ރާއްޖެ އުފެދިފައިވާ ގޮތުން، ހިންދު ކަނޑުގައިވާ ޖަޒީރާ މުތްތަކެއްގެ ގޮތުގައި އެތުރިފައިވާތީ މުތްތަކުގެ މާނަގައިގައިވެސް މަހަލްދީބު ކިޔާ އުޅެއެވެ. މަހަލްދީބުގެ މާނައާ ބެހޭ ގޮތުން އިބްރާހީމް ޝިހާބުގެ ރައުޔަކީ ''ޖަޒީރާތަކުގެ ހާރު" އެވެ.
މީގެ އިތުރުން ގައުމީ ނިޝާނުގެ ރުކުރުގެ ތިރީގައި ވެސް އަރަބި ބަހުން ލިޔެފައިވަނީ ''އައްދައުލަތުލް މަހަލްދީބިއްޔާ'' އެވެ.
އެހެންކަމުން ދިވެހިރާއްޖެއަށް މަހަލްދީބު ކިޔުން މާ ފުރިހަމަ ކަމަށް ތާރީޚަށް އަގުހުރި ޚިދުމަތްތަކެއް ކުރައްވަމުން ގެންދަވާ ބޭފުޅުން ވިދާޅުވެއެވެ. ޚާއްސަކޮށް ސާފް ޗެމްޕިއަންޝިޕުގެ ފަދަ ވާދަވެރި މުބާރާތްތަކުގައި "މޯލްޑިވްސް ހޮޕް ހޮޕް" ކިޔުމުގެ ބަދަލުގައި މަގޭ މަހަލްދީބު ކިޔުން މާ ފުރިހަމަ އެވެ. އަދި މިއީ ކުޅުންތެރިންނަށް ވެސް ލިބޭ ހިތްވަރެއްގެ ގޮތުގައި ބައެއް މީހުން ސިފަކޮށްފައިވެއެވެ.
