ޖުމްހޫރީ ޕާޓީގެ ލީޑަރ ގާސިމް އިބްރާހީމްގެ މައްޗަށް ދެވަނަ ފަހަރަށް ވެސް ތުހުމަތުކޮށްފައިވާ ރިޝްވަތު ދޭން އުޅުނު ކަމަށް ބުނާ މައްސަލާގައި ދައުވާ ނުކުރަން ޕީޖީއިން ނިންމައިފިއެވެ.
އެކަން ވަނީ ޕްރޮސެކިއުޓަރ ޖެނެރަލްގެ އޮފީހުން ޤާސިމްގެ ޤާނޫނީ ވަކީލުންގެ ޓީމަށްވެސް އަންގާފައެވެ. ޤާސިމްގެ ޤާނޫނީ ވަކީލް ހިސާން ހުސައިންވެސް ވަނީ ރާއްޖެ އެމްވީއަށް އެކަން ކަށަވަރުކޮށް ދެއްވާފައެވެ.
އެ މައްސަލައާމެދު ޕީޖީން ނިންމި ގޮތެއް ސާފު ކުރުމަށް ގާސިމްގެ ވަކީލުން އެދުމުން ޕީޖީން ޤާސިމްގެ ވަކީލު އަހުމަދު ޝަފީގަށް ފޮނުވި ސިޓީގައި ބުނެފައިވަނީ އެ މައްސަލާގައި ދައުވާ ނުކުރަން ނިންމާފައިވަނީ އެކަށިގެންވާ ހެކި ނެތުމުން ކަމަށެވެ. އަދި ދައުވާ ނުކުރަން ނިންމާ މިމަހުގެ 10 ވަނަ ދުވަހު މޯލްޑިވްސް ޕޮލިސް ސާވިސްއަށް އެ މައްސަލަ އަނބުރާ ފޮނުވާލާފައިވާ ކަމަށް ވެސް ޕީޖީންވަނީ ބުނެފައެވެ.
އެގޮތުން އެސިޓީގައި ބުނެފައިވަނީ އެއޮފީހަށް ހުށަހެޅުނު ޤާސިމް އިބްރާހީމް ރައްޔިތުންގެ މަޖިލީހުގެ ރައީސްއާއި ނައިބު ރައީސްގެ އިތުބާރު ނެތްކަމަށް ފާސްކުރުމަށް މަޖިލީހަށް ހުށަހެޅޭނީ 42 މެންބަރުންގެ ސޮޔާއި އެކުކަމަށް 2017 އޭޕްރީލް 10 ވަނަ ދުވަހު މަޖިލީހުން ފާސްކުރުމާއި ގުޅިގެން މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ވެއްދުމަށް މެންބަރުންގެ ސޮއި ހޯދުމަށް ޤާސިމް އިބްރާހީމް މަޖިލީހުގެ އެކިއެކި މެންބަރުންނަށް އެކިގޮތްގޮތުން ނުފޫޒު ފޯރުވައި ޤާނޫނާ ޚިލާފަށް މަސައްކަތްތަކެއް ކުރެވެމުންދާކަމަށް ތުހުމަތު ކުރެވޭ މައްސަލައިގާ ޤާސިމް އިބްރާހީމްގެ މައްޗަށް ޖިނާއީ ދައުވާ ކުރެވޭވަރަށް ހެއްކާއި ޤަރީނާ ހުރިކަމަށް ނުފެންނާތީ އެމައްސަލައިގާ ދައުވާ ނުކުރުމަށް ނިންމައި އެމައްސަލަ ވަނީ މިމަހުގެ 10 ވަނަ ދުވަހު މޯލްޑިވްސް ޕޮލިސް ސަރވިސްއަށް އަނބުރާ ފޮނުވާލާފައި ކަމަށެވެ.
