އެއަރ ފްރާންސުން ރާއްޖެއަށް ކުރާ ދަތުރުތަކުގައި ލަންކާއަށް ޓްރާންސިޓްވާ ގޮތަށް ދަތުރުތައް ފަށަން ނިންމައިފިއެވެ.
ފިނި މޫސުމާ ދިމާކޮށް މިއަހަރުގެ ނޮވެމްބަރު 1ން ފެށިގެން އެއަރ ފްރާންސްގެ ދަތުރުތައް ރާއްޖެއަށް ކުރުމަށް އެ އެއަރލައިނުން ވަނީ ނިންމާފައެވެ. އެގޮތުން ހަފުތާ އަކު ތިން ފަހަރު ފްރާންސްގެ ޕެރިސް ޗާލްސް ދުގުލް އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށް ކުރަން ރާވާފައިވާ ދަތުރުތަކުގައި ލަންކާއަށް ޓްރާންސިޓްވާން ވަނީ ނިންމާފައެވެ.
މި އަހަރުގެ ނޮވެމްބަރުން ފެށިގެން އަންނަ އަހަރުގެ މާޗްމަހާ ހަމައަށް ކުރަން ރާވާފައިވާ މިދަތުރުތައް ހަފުތާ އަކު ތިން ދުވަހު ކުރުމަށް ވަނީ ނިންމާފައެވެ. މި ދަތުރުތަކުގައި އެ އެއަރލައިނުން ބޭނުން ކުރާނީ ބޮއިން 787-9 މަރުކާގެ ބޯޓުތަކެވެ.
މިދިޔަ އަހަރުގެ ފިނި މޫސުމާ ދިމާކޮށް ޑިސެމްބަރ 19 ވަނަ ދުވަހުން އެއަރ ފްރާންސްގެ ދަތުރުތައް ރާއްޖެއަށް ކޮށްފައިވާއިރު، ފްރާންސް އަކީ މިހާރު ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ 10 ގައުމުގެ ލިސްޓުގެ 9 ވަނަ ގައި އޮތް ގައުމެވެ. އެގައުމުން 10،000ށް ވުރެ ގިނަ ފަތުރުވެރިން ވަނީ ރާއްޖެ އައިސްފައެވެ. އަދި ފިނި މޫސުމާ ދިމާކޮށް ކުރަން ރާވާފައިވާ މި ދަތުރުތަކާއިއެކު މިއަހަރުގެ ތެރޭގައި އެގައުމުން ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެއެވެ.
