މިމަހުގެ ހަވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބު 2017 ގެ ވަގުތީ ނަތީޖާ އިއުލާންކޮށް ހޮނިހިރު ދުވަހުގެރޭ ނިންމާލުމަށް ރޭވުމަށް ފަހު, ވަގުތީ ނަތީޖާ އިއުލާންކުރުން މާދަމާއަށް ފަސްކޮށްފި އެވެ.

އިލެކްޝަންސް ކޮމިޝަންގެ އޮފިޝަލަކު ރާއްޖެ އެމްވީއަށް ވަނީ އެކަން ކަށަވަރުކޮށް ދެއްވާފައެވެ. އަދި އެކޮމިޝަނުން ވަނީ އެކަން ޓްވީޓްވެސް ކޮށްފައެވެ.

އިލެކްޝަންސް ކޮމިޝަނުން ވަގުތީ ނަތީޖާ އިއުލާންކުރަން ފަށާފައިވަނީ މިދިޔަ އަންގާރަ ދުވަހު ހެނދުނުއެވެ.

އިލެކްޝަންސް ކޮމިޝަންގެ މެންބަރު އަހުމަދު އަކުރަމް ކުރިން ވިދާޅުވެފައިވަނީ ކައުންސިލް އިންތިޚާބުގެ ވަގުތީ ނަތީޖާ ހޮނިހިރު ދުވަހުގެރޭ އިއުލާންކޮށް ނިންމާލެވޭނެކަމަށެވެ. އެގޮތުންމިހާތަނަށް އިއުލާންކުރެވިފައިނުވާ 21 ދާއިރާގެ ވަގުތީ ނަތީޖާ ހޮނިހިރު ދުވަހުގެރޭ އިއުލާންކުރާނެކަމަށް އަކުރަމް ވިދާޅުވިއެވެ. ނަމަވެސް މިހާރު ހަމަޖައްސާފައިވަނީ އާދީއްތަ ދުވަހު (މާދަމާ) ހެނދުނު 9:30 ފެށިގެން ނަތީޖާ އިއުލާން ނުކުރެވި ހުރި ހުރިހާ ދާއިރާއެއްގެ ނަތީޖާ އިއުލާންކޮށް ނިންމާލުމަށް ކަމަށް އިލެކްޝަންސް ކޮމިޝަނުން ވަނީ ބުނެފައެވެ.

މިފަހަރުގެ އިންތިޚާބުގެ ވަގުތީ ނަތީޖާ އިއުލާންކުރުން ލަސްވާކަމަށް ބައެއް ފަރާތްތަކުން ބުނާ ބުނުމަށް ރައްދު ދެއްވާ އަކްރަމް ވިދާޅުވީ އެންމެ ފަހުން ބޭއްވި ކައުންސިލް އިންތިޚާބުގެ ވަގުތީ ނަތީޖާ އިއުލާންކުރެވިފައިވަނީވެސް 9 ދުވަސް ފަހުން ކަމަށެވެ. އެހެންކަމުން އިންތިޚާބު ބޭއްވިތާ ހަފްތާއެއްގެ ތެރޭގައި ހުރިހާ ދާއިރާއެއްގެ ވަގުތީ ނަތީޖާތައް އިއުލާންކޮށް ނިންމާލުމަކީ ލިބުނު ކުރިއެރުމެއްކަމަށް އަކުރަމް ވިދާޅުވިއެވެ.

އަކުރަމް ވިދާޅުވީ ކައުންސިލް އިންތިޚާބުގެ ވަގުތީ ނަތީޖާތައް އިއުލާންކޮށް ނިންމި ނަމަވެސް އިންތިޚާބާއި ގުޅިގެން ހުށައަޅާފައިވާ ޝަކުވާތައް ބެލުމަށްފަހު އަލުން އެއްވެސް ދާއިރާއެއްގެ ނަތީޖާ އިތުރަށް ޗެކްކުރަން ޖެހިއްޖެނަމަ އެކަމެއް ކުރާނެކަމަށެވެ.

މިއިންތިހާބުގައި 1497 ކެންޑިޑޭޓުން ވާދަކޮށްފައިވެއެވެ. ވޯޓްލުމުގެ ހައްގު 255،987 މީހުންނަށް ލިބިފައިވީ ނަމަވެސް އިންތިހާބުގައި ވޯޓްލާން ނިކުމެފައިވަނީ ނިސްބަތުން މަދު އަދަދެކެވެ. އަދި މިއިންތިހާބުގައި ވޯޓްލުމަށް 422 ވޯޓް ފޮށި ބެހެއްޓިއިރު މިއިންތިހާބަށް ހާއްސަކޮށްގެން 431،939 ވޯޓް ކަރުދާސްކޮޅު ވަނީ ޗާޕްކޮށްފަ އެވެ.

މިފަހަރުގެ އިންތިހާބުގައި ޖުމްލަ 653 ކައުންސިލަރުން އިންތިހާބު ކުރާނެ އެވެ. މީގެ ތެރޭގައި ހިމެނެނީ 179 ރަށު ކައުންސިލަށް 563 ކައުންސިލަރުންނާއި 18 އަތޮޅު ކައުންސިލަށް 67 ކައުންސިލަރުންނާއި މާލެ އާއި އައްޑޫ އަދި ފުވައްމުލަކު ސިޓީ ކައުންސިލަށް 23 ކައުންސިލަރުންނެވެ.

މިހާތަނަށް އައިއިރު ލިބިފައިވާ ނަތީޖާތަކަށް ބަލާއިރު އިދިކޮޅު އެމްޑީޕީން ވަނީ ސަރުކާރުގެ މައްޗަށް ކުރި ހޯދާފައެވެ.