ބުދަ ދުވަހުގެ ހަވީރާއި ރޭގަނޑު ބޯކޮށް ވާރޭ ވެހުމުގެ ސަބަބުން ސިވިލް ކޯޓުގެ ބައެއް ސެކްޝަންތަކާއި އިދާރީ ބައެއް މަސައްކަތްތަކަށް ބުރޫއަރާފައިވާ ކަމަށް އެކޯޓުން ބުނެފި އެވެ.
ސިވިލް ކޯޓުން ނެރެފައިވާ އިއުލާނެއްގައި ބުނެފައިވަނީ ބުދަ ދުވަހު ކުރި ވިއްސާރައިގައި ސިވިލް ކޯޓުގެ ޝަރީއަތްކުރާ މާލަންތަކަށާއި ސެކްޝަންތަކަށް ފެން ފައިބައި އެތެރޭގެ ތަޅުންމަތީގައި ފެންބޮޑުވެ، ބައެއް ސިސްޓަމްތަކަށާއި، ލިޔެކިޔުންތަކަށާއި ތަކެއްޗަށް ވަރަށް ބޮޑަށް ގެއްލުން ވެފައިވާ ކަމަށެވެ.
އެހެންކަމުން ސިވިލް ކޯޓުގައި ޝަރީއަތްކުރާ ބައެއް ސެކްޝަންތަކާއި އިދާރީ ބައެއް ސެކްޝަންތަކުގެ މަސައްކަތް ކުރިއަށް ގެންދެވެންނެތުމާއެކު އެ ސެކްޝަންތަކުގެ ޝަރީއަތްތަކާއި އިދާރީ މަސައްކަތްތައް ހުއްޓުމަކަށް އައިސް މެދުކަނޑާލަން ޖެހިފައިވާ ކަމަށް ސިވިލް ކޯޓުގެ އެ އިއުލާނުގައި ވެއެވެ.
މީގެއިތުރުން، އެ އިއުލާނުގައި ވަނީ އެ ސެކްޝަންތަކުގެ ޝަރީއަތްތަކުގެ މަސައްކަތްތަކާއި އިދާރީ މަސައްކަތްތައް ކުރިއަށް ގެންދެވޭނީ ލިބުނު ގެއްލުމުގެ ކަންތައްތައް ރަނގަޅުކޮށް ހައްލުކޮށްގެން ކަމުގައިވާތީ، އެ ކޯޓުގެ ހިދްމަތް ލިބިގަތުމަށް އަންނަފަރާތްތަކުގެ މައުލޫމާތައްޓަކައި މިކަން އާއްމުކޮށް އަންގައި އިއުލާނު ކުރާކަމަށެވެ.
ސިވިލް ކޯޓުގެ އޮފިޝަލެއް "ރާއްޖެއެމްވީ"އަށް މައުލޫމާތު ދިންގޮތުގައި ވާރޭވެހުމުގެ ސަބަބުން ބޮޑަށް ގެއްލުން ލިބިފައިވަނީ ސިވިލް ކޯޓުގެ އެންމެ މައްޗަށް ހުރި ފްލޯތަކަށެވެ.
