ޣައްޒާ ހިފުމަށް އިސްރާއީލުން ދެމުންދާ ހަމަލާތައް

ފަލަސްތީނަށް އދ ގެ ފުރިހަމަ މެމްބަރުކަން ދޭން އާންމު މަޖިލީހުން ފާސްކޮށްފިއެވެ.

ފަލަސްތީނަށް އދ ގެ ފުރިހަމަ މެމްބަރުކަން ދޭން ފެންނަކަމަށް ވޯޓު ދީފައިވަނީ 143 ގައުމުންނެވެ. އެކަމާއި ދެކޮޅު ހެދީ 9 ގައުމަކުންނެވެ. އެއްވެސް ކޮޅަކަށް 25 ގައުމަކުން ވޯޓު ދީފައެއްނުވެއެވެ.

އައް ޝިފާ ހޮސްޕިޓަލުން މިއަދު ފެނުނު ކަށްވަޅުގެ ތެރެއިން 50ށް ވުރެ ގިނަ ހަށިގަނޑު ފެނިފައިވާކަމަށް ޣައްޒާގެ އެމަރޖެންސީ އޮޕަރޭޝަން ސެންޓަރުގެ ޑިރެކްޓަރ މުތަސިމް ސަލާހް ވިދާޅުވެއްޖެއެވެ.

އިސްރާއީލުގެ އަނިޔާވެރި އަސްކަރިއްޔާއިން އެތައް ދުވަހެއް ވަންދެން އައް ޝިފާ ހޮސްޕިޓަލު ހިސޯރުކުރުމަށްފަހު އެތަނުން ދިޔަފަހުން މީގެކުރިން ވަނީ މިފަދަ ދެ ކަށްވަޅު ފެނިފައެވެ. އެންމެ ފަހުން ފެނުނު ކަށްވަޅުގައި ވާ މީހުންނަކީ ދިރިތިއްބާ ވަޅުލާފައިވާ މީހުންކަމަށް މުތަސިމް ވިދާޅުވިއެވެ. އެގޮތުން ރިސެޕްޝަނާއި، އެމަރޖެންސީ ޑިޕާޓްމަންޓް ފަދަ އިސްރާއީލުން އެއްކޮށްކަހަލަ ގޮތަކަށް ހަލާކުކޮށްފައިވާ ތަންތަނުން ހަށިތައް ފެނިފައިވާކަމަށް އޭނާ ވިދާޅުވިއެވެ.

ޝަހީދުވެފައިވާ މީހުންގެ މައްޗަށް އިމާރާތުގެ ބައިތަކާއި ކުނިތައް އަޅާފައިވާކަމަށް އޭނާ ވިދާޅުވިއެވެ.

ބައެއް ހަށިތައް ފެނިފައިވަނީ އެމީހުން ރިސެޕްޝަނާއި އެމަރޖެންސީ އޭރިއާގައި އެނދުތައް މަތީގައި ތިއްބާކަމަށް އޭނާ ވިދާޅުވިއެވެ. އޭގެ މާނައަކީ އިސްރާއީލުގެ އަނިޔާވެރި އަސްކަރިއްޔާއިން އެތަންތަން ހަލާކުކޮށްފައިވަނީ ބަލި މީހުންނާއި ޒަޚަމްވެފައި ތިބި މީހުން އެނދުމަތީގައި ތިއްބާކަމަށް އޭނާ ވިދާޅުވިއެވެ.

އިސްރާއީލުން ރަފަހަށް ދެމުންދާ ހަމަލާތަކާއި ގުޅިގެން ކޮންމެ ގަޑިއިރަކުން 200 މީހުން ރަފަހު ދޫކޮށްދާކަމަށް އދ ގެ ފަލަސްތީނުގެ ރައްޔިތުންނާ ބެހޭ ރިލީފް އެޖެންސީން ބުނެފިއެވެ.

އެޖަމިއްޔާއިން ބުނީ ގިނަ އަދަދެއްގެ ބަޔަކު ދަނީ ޚާން ޔޫނުސް އާއި ޣައްޒާގެ މެދު ތެރެއަށް ބަދަލުވަމުންނެވެ. އަދި މިހާތަނަށް ހޯމަ ދުވަހުން ފެށިގެން 50،000 މީހުން ރަފަހު ދޫކޮށް އެކި ހިސާބުތަކަށް ގޮސްފައިވާކަމަށް އެޖަމިއްޔާއިން ބުނެއެވެ.

ސުލްހައިގެ ވާހަކަތައް އިތުރަށް ކުރިޔަށްގެންދިޔުމަށް ހަމާސް ގެ ވަފުދު މިސްރަށް ގޮސްފައިވާކަމަށް އެ ޖަމާއަތުން ބުނެފިއެވެ.

ސުލްހައިގެ ވާހަކަތަކަށް ދޯހާއިން މިވަފުދު ގޮސްފައިމިވަނީ ސުލްހައިގެ ވާހަކަތައް މިހާރު ގޮސްފައިވާ ހިސާބުން ދެން ކުރިޔަށްދާނެ ގޮތްތަކާއި ގުޅޭގޮތުން މަޝްވަރާކުރުމަށެވެ. އެގޮތުން ޣައްޒާގައި އިސްރާއީލުން ހިންގަމުންދާ ގަތުލު އާންމު ނިމުމަކަށް ގެނައުމަށް އެެއްބަސްވުން ފުރިހަމަކުރުމަށް ވާހަކަތައް ކުރިޔަށްގެންދާނެކަމަށް ހަމާސް އިން ބުނެއެވެ.

ސުލްހައިގެ ވާހަކަތަކުގައި ބައިވެރިވާ ހަމާސްގެ ވަފުދު މިސްރުން ފުރާފައިވަނީ މިދިޔަ ހަފްތާ ތެރޭގައެވެ. އަދި ރޭގެ ވަގުތެއްގައި ހަމާސް އިން ވަނީ ހަމަލާ ދިނުން ހުއްޓާލަން އެއްބަސްވާކަން ހާމަކޮށްފައެވެ.

ވާހަކަތައް ކުރިޔަށްގެންދިޔުމަށް އިސްރާއީލުގެ ވަފުދުވެސް މިހާރު ވަނީ މިސްރަށް ގޮސްފައެވެ.

ރަފަހުގެ ބޯޑަރު އިސްރާއީލުގެ ބާރުގެ ދަށަށް ގެނައުމަކީ ހަމާސްގެ ބާރު ކަނޑުވާލުމަށް އަޅަންޖެހޭ މުހިންމު ފިޔަވަޅެއްކަމަށް އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ބުނެފިއެވެ.

ނަތަންޔާހޫ ބުނެފައިވަނީ ހަމާސް އަށް އަސްކަރީ ގޮތުން ޕްރެޝަރ އިތުރުކުރުމަކީ އަސީރުން މިނިވަންކުރުމަށް ކުރަންޖެހޭ ކަމެއްކަމަށެވެ. އަދި ހަމާސް އިން އެއްބަސްވެފައިވާ އެއްބަސްވުމުގައި އިސްރާއީލުގެ މުހިންމު ޑިމާންޑްތައް ނެތްކަމަށްވެސް ނަތަންޔާހޫ ވަނީ ބުނެފައެވެ.

އިސްރާއީލުން ވައިގެ މަގުން މީގެ މަހެއްހާ ދުވަސްކުރިން ދިން ހަމަލާއެއްގައި ލިބުނު ޒަޚަމްތަކާއި ގުޅިގެން އަސީރަކު މަރުވެފައިވާކަމަށް ހަމާސް އިން ބުނެފިއެވެ.

ހަމާސްގެ އަސްކަރީ ގޮފި ޤައްސާމް ބްރިގޭޑްގެ ސްޕޯކްސްޕާސަން އަބޫ އުބައިދާ ބުނީ މަރުވެފައިވަނީ އުމުރުން 70 އަހަރުގެ ޖޫޑީ ފިންސްޓަން ކިޔާ މީހެއްކަމަށެވެ. އޭނާ އާ އެއްތަނެއްގައި ހުރި އެހެން އަސީރަކަށްވެސް ސީރިއަސް އަނިޔާތަކެއް ލިބިފައިވާކަމަށް އަބޫ އުބައިދާ ވަނީ ބުނެފައެވެ.

ބެލެވޭ ގޮތުގައި ހަމާސްގެ އަތްދަށުގައި އަދިވެސް 130 އަސީރުން ތިބޭނެއެވެ.

ރޭގެ ވަގުތެއްގައި ހަމާސް އިން އެއްބަސްވި ހަމަލާ ބަދަލުކުރުން ހުއްޓާލުމުގެ އެއްބަސްވުމާއި ގުޅޭގޮތުން މަޝްވަރާކުރުމަށް އިސްރާއީލުގެ ޓީމެއް މިސްރަށް ދާނެކަމަށް އިސްރާއީލު ސަރުކާރުގެ ތަރުޖަމާނަކު ބުނެފިއެވެ.

ކުރިން އިސްރާއީލުން ވަނީ މި އެއްބަސްވުމުގައި އިސްރާއީލުން ބޭނުންވާ އެންމެ މައިގަނޑު ކަންކަން ނުހިމެނޭކަމަށް ބުނެފައެވެ. އަދި އެއްގަމު މަގުން ރަފަހަށް ވަނީ އަރާފައެވެ.

އިސްރާއީލުގެ އޮފިޝަލަކާ ހަވާލާދީ ރޮއިޓަރސް އިން ރިޕޯޓްކޮށްފައިވާ ގޮތުގައި އިސްރާއީލުން ޣައްޒާގައި ކުރިޔަށްގެންދާ ގަތުލުއާންމު ނިމުމަކަށް ގެންނާނީ ޣައްޒާގައި ހަރަކާތްތެރިވާ ހަނގުރާމަވެރި ޖަމާއަތްތަކުން ހަތިޔާރު ބަހައްޓާ އިސްރާއީލުގެ އަސީރުން މިނިވަންވުމުންނެވެ.

ބައިނަލްއަގްވާމީ ޖަމާއަތްތަކުގެ ތެރެއިން ރަފަހުގައި މިހާރު ހަރަކާތްތެރިވާ ޖަމާއަތްތަކުން އިސްރާއީލުން އަސްކަރީ އޮޕަރޭޝަން ހިންގަމުންދާ ސަރަހައްދުތަކުން ފޭބުމަށް އިސްރާއީލު ސަރުކާރުން ގޮވާލައިފިއެވެ.

އިސްރާއީލުން ތުހުމަތުކުރާ ގޮތުގައި ޣައްޒާއަށް ތަކެތި އެތެރެވާ މައި ބޯޑަރ ސަރަހައްދު ކަމުގައިވާ ރަފަހް ކްރޮސިންގ އިން އެތެރެވާ ތަކެއްޗަކީ ހަމާސް އާއި އެނޫންވެސް ހަނގުރާމަވެރި ޖަމާއަތްތަކުގެ ބޭނުމަށް ތަކެތި އެތެރެކުރާ ކްރޮސިންގ އެކެވެ.

އިސްރާއީލުން މިހާރު ވަނީ ރަފަހް ބޯޑަރ ކްރޮސިންގ ގެ ޣައްޒާ އާ ވީ ފަރާތް އިސްރާއީލުގެ ބާރުގެ ދަށަށް ގެނެސްފައެވެ. އެއާއެކު ޣައްޒާއަށް އެހީވަނުން ވަނީ އެއްކޮށްހެން ބަންދުވެފައެވެ. ނަމަވެސް އިސްރާއީލުން ބުނަމުން އަންނަނީ ޣައްޒާއަށް އެހީ ވަންނަމުންދާނެކަމަށެވެ.

އިސްރާއީލުން ރަފަހަށް އަމާޒުކޮށް ދެމުންދާ ވައިގެ ހަމަލާތަކުގައި ރަފަހުގެ މެދު ތެރޭގައި ހުރި މިސްކިތަކަށް އަމާޒުކޮށް މިސައިލް ހަމަލާ ދީފިއެވެ.

އެސަރަހައްދުގައި ހުރި އަލްޖަޒީރާގެ ނޫސްވެރިޔާ ބުނާ ގޮތުގައި މި ހަމަލާދިނީ މިސްކިތާ ކައިރި ހިސާބުގައި ހުރި މާރުކޭޓެއްގައި ގިނަ އަދަދެއްގެ ބަޔަކު ހަރަކާތްތެރިވަމުން ދަނިކޮށެވެ. އަދި މިއީ ކުރިޔަށް އޮތްތަނުގައި އެސަރަހައްދަށް ހަމަލާދޭނެކަން އެންގުމަށް ދިން އިންޒާރެކެވެ.

- ޣައްޒާގެ އެންމެ ދެކުނުގައި އޮންނަ ރަފަހަށް ވަދެވޭ ސަރަހައްދު އިސްރާއީލުގެ ބާރުގެ ދަށަށް ގެނައުން

- އިސްރާއީލުން ތުހުމަތުކުރާ ގޮތުގައި އެސަރަހައްދު ބޭނުންކުރަމުން އަންނަނީ ހަމާސް އިން

-ރަފަހު ކްރޮސިންގ ހުރަސްކުރުމަށް އދ ގެ މުވައްޒަފުންނަށް އިސްރާއީލުން ހުރަސްއަޅާފައިވާކަމަށް އދ ން ބުނުން

އިސްރާއީލުން ޣައްޒާގެ އެންމެ ދެކުނުގައި އޮންނަ ސިޓީ ކަމުގައިވާ ރަފަހަށް ހަމަލާ ދޭން ފަށައިފިއެވެ.

އިސްރާއީލު އަސްކަރިއްޔާއިން ބުނީ ވަކި ތަންތަނަށް އަމާޒުކޮށްގެން އިސްރާއީލު އަސްކަރިއްޔާއިން ހަމަލާދެމުން އަންނަކަމަށެވެ. އެކަމުގެ ތަފްސީލުތައް ދެމުން ގެންދާނެކަމަށްވެސް އިސްރާއީލު އަސްކަރިއްޔާއިން ބުނެއެވެ.

ހަމަލާ ބަދަލުކުރުން ހުއްޓާލުމަށް ހަމާސް އިން އެއްބަސްވުމާއި ގުޅިގެން އެއެއްބަސްވުމާއި ގުޅޭގޮތުން ވާހަކަ ދެއްކުމަށް އިސްރާއީލުގެ ފަރާތުން މީހުން ފޮނުވުމަށް އިސްރާއީލުގެ ހަނގުރާމައާ ބެހޭ ކެބިނެޓުން ނިންމައިފިއެވެ.

ނަމަވެސް އިސްރާއީލުން ރަފަހުގައި އަސްކަރީ އޮޕަރޭޝަން ކުރިއެކޭ އެއްގޮތަށް ކުރިޔަށްގެންދިޔުމަށްވެސް ހަނގުރާމަ އާ ބެހޭ ކެބިނެޓުން ވަނީ ނިންމާފައެވެ. އިސްރާއީލުން ބުނާގޮތުގައި ރަފަހުގައި އިސްރާއީލުގެ އޮޕަރޭޝަން ކުރިޔަށް ގެންދަނީ ހަމާސްގެ އަސްކަރީ ބާރު ކަނޑުވާލާ އިސްރާއީލުން މިހަނގުރާމައިން ހާސިލުކުރަން ބޭނުންވާ ލަނޑުދަނޑިތައް ހާސިލުކުރުމަށެވެ.

ހަމަލާ ބަދަލުކުރުން ހުއްޓާލުމަށް ހަމާސް އިން އެއްބަސްވުމާއެކު ހަމާސްގެ އަތްދަށުގައި ތިބި އިސްރާއީލުގެ ރައްޔިތުންގެ އާއިލާތަކުން ތަލް އަވީވްގެ މަގުތަކަށް ނިކުމެ މުޒާހަރާކުރަން ފަށައިފިއެވެ.

ހަމަލާ ބަދަލުކުރުން ހުއްޓާލުމަށް އެމީހުން ގޮވަމުންދާއިރު އެކަމަށް އެއްބަސްނުވެއްޖެނަމަ މުޅި އިސްރާއީލު އަނދާ އަޅިއަށް ހަދާލާނެކަމަށްވެސް ބައެއް އާއިލާތަކުން އަންނަނީ ގޮވަމުންނެވެ.

ހަމަލާ ބަދަލުކުރުން ހުއްޓާލަން ހަމާސް އިން އެއްބަސްވުމާއެކު ޣައްޒާގެ ރައްޔިތުން އަންނަނީ އުފާފާޅުކުރަމުންނެވެ. ވަކިން ޚާއްސަކޮށް ރަފަހުގައި ތިބި އެތައް ހާސް ރައްޔިތުންނެއް އަންނަނީ އެމީހުންގެ ގެދޮރަށް އަނބުރާ ދެވޭނެތީވެ އެކަމުގެ އުފާފާޅުކުރަމުންނެވެ.

ހަމަލާ ބަދަލުކުރުން ހުއްޓާލުމަށް ހަމާސް އިން އެއްބަސްވި އެއްބަސްވުން އެމެރިކާއިން ދިރާސާކުރަމުން އަންނަކަމަށް އެމެރިކާގެ ސްޓޭޓް ޑިޕާޓްމަންޓްގެ ސްޕޯކްސްޕާސަން މިލާ ވިދާޅުވެއްޖެއެވެ.

އެއްބަސްވުން މުރާޖާކުރަން ނަގާނެ ވަގުތެއް އެމެރިކާއިން ހާމައެއްނުކުރެއެވެ. ނަމަވެސް އެއީ އެމެރިކާއިން އެންމެ އިސްކަމެއްދީގެން ކުރާނެ ކަންތައްކަމަށްވެސް މިލާ ވިދާޅުވިއެވެ.

ހަމަލާ ބަދަލުކުރުން ހުއްޓާލުމާ ގުޅޭގޮތުން ދެކެވުނު ވާހަކަތަކުގައި މެދުވެރިއެއްގެ ރޯލު އަދާކުރި ފަރާތްތަކުން ހަމަލާ ބަދަލުކުރުން ހުއްޓާލުމުގެ އެއްބަސްވުން އެމެރިކާގެ ރައީސް ޖޯ ބައިޑަން ތަންފީޒުކުރައްވާނެކަމަށް ބުނެފައިވާކަމަށް ހަމާސް އިން ބުނެފިއެވެ.

ހަމާސްގެ ޑެޕިޔުޓީ ލީޑަރ އަލް ޖަޒީރާ އާ ވާހަކަދައްކަވަމުން ވިދާޅުވީ ހުދު ބައިޑަން ވަނީ މިއެއްބަސްވުން ތަންފީޒުކުރެއްވުމުގައި އަމަލީ ގޮތުން ކުރެވެން ހުރި މަސައްކަތްތައް ކުރައްވާނެކަމަށް ވިދާޅުވެފައިކަމަށް އެފަރާތްތަކުން ބުނެފައިވާކަމަށެވެ. އެކަމާއި ގުޅޭގޮތުން އެމެރިކާއިން އަދި ވަކި އެއްޗެއް ނުބުނެއެވެ.

ޚަލިލް އަލް ހައްޔާ އަލް ޖަޒީރާ އާ ވާހަކަދައްކަވަމުން ވިދާޅުވީ ފުރަތަމަ ފޭސްގެ ދަށުން ގެދޮރު ގެއްލިފައިވާ ޣައްޒާގެ ރައްޔިތުން އަނބުރާ އެމީހުންގެ ގެދޮރަށް ދާނެކަމަށާއި އަދި އެހީގެ ސާމާނު އޭގެތެރޭގައި ބޭހާއި ތެޔޮވެސް ހިމެނޭގޮތަށް ޣައްޒާއަށް އެތެރެކުރެވެމުންދާނެކަމަށެވެ.

މީގެއިތުރުން ހަމާސްގެ އަތްދަށުގައި ތިބި ކޮންމެ އަސީރެއްގެ ބަދަލުގައި އިސްރާއީލުގެ ޖަލުތަކުގައި ތިބި ފަލަސްތީނުގެ އަންހެނުންގެ ތެރެއިން 50 އަންހެނުން މިނިވަންކުރާނެއެވެ. އަދި ދެވަނަ ފޭސްގައި ހަމާސްގެ އަތްދަށުގައި ތިބި އިސްރާއީލުގެ އަސީރުންގެ ތެރެއިން ފިރިހެން އަސީރުން މިނިވަންކުރާނެއެވެ. އަދި އޭގެ ބަދަލެއްގެ ގޮތުގައި އިސްރާއީލު ޖަލުތަކުގައި ތިބި ފަލަސްތީނުގެ ރައްޔިތުން މިނިވަންކުރާނެއެވެ.

ތިން ވަނަ ފޭސް އަކީ ޣައްޒާ އަލުން އާރާސްތުކުރުމުގެ ފޭސް އެވެ. އެއީ ތިން އަހަރާއި ފަސް އަހަރާ ދެމެދު ކުރިޔަށްދާ ފޭސް އެކެވެ.

ހަމަލާ ބަދަލުކުރުން ހުއްޓާލުމަށް ހަމާސް އިން އެއްބަސްވި އެއްބަސްވުމަށް ތުރުކީގެ ބޮޑުވަޒީރު ރަޖަބް ތޮއްޔިބު އުރުދުޣާން މަރުޚަބާ ވިދާޅުވެ އެކަމަށް އިސްރާއީލުންވެސް އެއްބަސްވުމަށް އުރުދުޣާން ގޮވާލައްވައިފިއެވެ.

އަދި އުރުދުޣާން ވަނީ ހުޅަނގުގެ ގައުމުތަކަށް އެކަމަށް އިސްރާއީލަށް ޕްރެޝަރ ކުރުމަށްވެސް ގޮވާލައްވާފައެވެ.

ހަމަލާ ބަދަލުކުރުން ހުއްޓާލުމަށް ހަމާސް އިން އެއްބަސްވުމާއެކު އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ އަށް އޮތް ޕްރެޝަރ ބޮޑުވަމުންދާކަމަށް މަސްރަހު ދިރާސާކުރާ ފަރާތްތަކުން ބުނެފިއެވެ.

ނަތަންޔާހޫ އަންނަނީ ޣައްޒާގައި ދެކުނުގައި އޮންނަ ރަފަހް އަށް އެރުމުގެ އެންމެ ފަހުގެ ތައްޔާރީތައްވަމުންނެވެ. ރަފަހް ދޫކޮށްދިޔުމަށް އިސްރާއީލުގެ އަސްކަރިއްޔާއިން މިއަދު އެސަރަހައްދުގައި ދިރިއުޅޭ ރައްޔިތުންނަށް އަންގާފައިވާއިރު ހަމާސް އިން މިވަނީ ހަމަލާބަދަލުކުރުން ހުއްޓާލުމަށް އެއްބަސްވެފައެވެ.

މިއެއްބަސްވުން ދިރާސާކުރުމުގެ މަސައްކަތް އިސްރާއީލުން ކުރަމުން އަންނައިރު ހަނގުރާމައިން ހާސިލުކުރަން ބޭނުންވި އެއްވެސް ކަމެއް ހާސިލުނުވެ ހަނގުރާމަ ހުއްޓާލަން ނަތަންޔާހޫ އަށް ޖެހިއްޖެނަމަ މިއީ އޭނާގެ ސިޔާސީ ކެރިއަރ ގައި ޖެހޭ ސިއްކައެއްކަމަށް އަލް ޖަޒީރާއާ ވާހަކަދައްކަމުން އިސްރާއީލުގެ ކުރީގެ ޑިޕްލޮމެޓިކް ވަނީ ވިދާޅުވެފައެވެ. އަދި މި އެއްބަސްވުން ނަތަންޔާހޫ ބޮލާލާ ޖަހައިފިނަމަ ބައިނަލްއަގްވާމީ ޕްރެޝަރ ނަތަންޔާހޫއަށް މިހާރަށްވުރެ ބޮޑުވެގެންދާނެކަމަށްވެސް ޑިޕްލޮމެޓް ބުނެފައިވެއެވެ. ވަކިން ޚާއްސަކޮށް އިންޓަރނޭޝަނަލް ކްރިމިނަލް ކޯޓުގައި މައްސަލަ ކުރިޔަށްދިޔުމާއި ފަލަސްތީނަކީ ވަކި ދައުލަތެއްގެ ގޮތުގައި ބަލައިގަތުމަށް އދ ގައި ކުރިޔަށްދާ ކަންތައްތަކާއެކު ނަތަންޔާހޫއަށް މިއެއްބަސްވުން ބޮލާލާ ޖަހަން އުނދަގޫވާނެކަމަށް އޭނާ ބުނެއެވެ.

ހަމަލާ ބަދަލުކުރުން ހުއްޓާލުމަށް ހަމާސް އިން އެއްބަސްވި އެއްބަސްވުމުގައި ހިމެނެނީ މައިގަނޑު 3 ފޭހެކެވެ. އެއީ 42 ދުވަހުގެ މުއްދަތަކަށް ހަމަލާ ބަދަލުކުރުން ހުއްޓާލާފައި އޮންނަ މުއްދަތުގެ ތެރޭގައި ކުރިޔަށްދާނެ ކަންކަމެވެ.

އޭގެތެރޭގައި ފުރަތަމަ ފޭސްގައި ހިމެނެނީ ޣައްޒާގެ އުތުރާއި ދެކުނު ބައިކުރުމަށްފަހު އިސްރާއީލުން ހަދައިގެން އުޅޭ މަގުން އިސްރާއީލުގެ އަސްކަރިއްޔާ ފޭބުމެވެ.

ދެވަނަ ފޭސްގައި ހިމެނެނީ ދާއިމީ ގޮތެއްގައި ހަމަލާ ބަދަލުކުރުން ހުއްޓާލުމަށް އެއްބަސްވުމާއެކު އަސީރުން ބަދަލުކުރުމެވެ. މިއާއެކު ޣައްޒާއިން އިސްރާއީލުގެ އަސްކަރިއްޔާ ފޭބުމެވެ.

ތިން ވަނަ ފޭސްގައި ހިމެނެނީ ޣައްޒާއަށް އިސްރާއީލުން އަޅާފައިވާ ދަތިކުރުމުގެ ފިޔަވަޅުތައް އެއްކޮށް ނައްތާލުމެވެ. އެއީ ޣައްޒާ އެއްކޮށް ބަންދުކޮށްގެން އިސްރާއީލުން އުޅޭ އުޅުން ނިމުމަކަށް ގެނައުމެވެ.

އިސްރާއީލާއި ހަމާސް އާ ދެމެދު ކުރިޔަށްދާ ހަމަލާ ބަދަލުކުރުން ހުއްޓާލުމަށް ހުށަހަޅާފައިވާ ހުށަހެޅުމަށް ހަމާސް ޖަމާއަތުން އެއްބަސްވެފައިވާކަމަށް ހަމާސް އިން ބުނެފިއެވެ.

ހަމާސްގެ ޕޮލިޓިކަލް ބިޔުރޯގެ ހެޑް ޤަތަރުގެ ބޮޑުވަޒީރު އަދި މިސްރުގެ އިންޓެލިޖެންސް ކަންތައްތަކާއި ބެހޭ މިނިސްޓަރާއި ފޯނުން ގުޅުއްވާ ވަނީ ހަމަލާ ބަދަލުކުރުން ހުއްޓާލުމަށް ހަމާސް އިން އެއްބަސްވާކަމަށް ވިދާޅުވެފައެވެ.

މިދިޔަ އަހަރުގެ އޮކްޓޯބަރ މަހުން ފެށިގެން ޣައްޒާގައި އިސްރާއީލުން ހިންގަމުން އަންނަ ޤަތުލުއާންމު ހުއްޓާލާފަދަ އެއްވެސް އެއްބަސްވުމަށް އެއްބަސްނުވާނެކަމަށް އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ބުނެފިއެވެ. ނަތަންޔާހޫ މިމޭރުމުން ވާހަކަދައްކާފައިމިވަނީ އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން އިސްރާއީލަށް މިހާރު ކުރަމުންގެންދާ ދަތުރުގެ ތެރެއިން ބްލިންކަން އާ ބައްދަލުކޮށެވެ.

އިސްރާއީލުގެ މީޑިޔާއިން ރިޕޯޓްކޮށްފައިވާ ގޮތުގައި ހަމާސް އިން ހަނގުރާމަ ހުއްޓާލުމަށް ހުށަހަޅާ އެއްވެސް ހުށަހެޅުމަކަށް އިސްރާއީލުން އެއްބަހެއް ނުވާނެއެވެ. އަދި އޭގެ ބަދަލުގައި އިސްރާއީލުން އޮތީ ރަފަހަށް އަރައިގަތުމަށް ތައްޔާރަށްކަމަށް ނަތަންޔާހޫ ބުނެފައިވެއެވެ.

ޣައްޒާއަށް އިސްރާއީލުން ދެމުންދާ ހަމަލާތައް ހުއްޓާލުމަށް އދ ގެ އާންމު މަޖިލީހުން ފާސްކޮށްފިއެވެ. މިގަރާރާ އެއްކޮޅަށް 153 ގައުމުން ވޯޓުދިންއިރު ވަކިކޮޅަކަށް ވޯޓު ނުދެނީ 23 ގައުމުންނެވެ. އަދި ގަރާރާ ދެކޮޅަށް 10 ގައުމަކުން ވޯޓު ދީފައިވެއެވެ.

މިގަރާރަށް އަމަލުކުރަން ލާޒިމްނުވާއިރު އދ ގެ ސަލާމަތީ މަޖިލީހުން ހަމަލާތައް ދިނުން ވަގުތުން ހުއްޓާލުމަށް ފާސްކުރަން މަސައްކަތްކުރި ގަރާރު އެމެރިކާއިން ވަނީ ވީޓޯކޮށްފައެވެ.

އޮކްޓޯބަރ މަހުގެ 7 ވަނަ ދުވަހުން ފެށިގެން އިސްރާއީލުން މެދުކެނޑުމެއްނެތި ޣައްޒާއަށް ދެމުންދާ ހަމަލާތައް ހުއްޓާލުމަށް ގޮވާލާ އދ ގެ ސަލާމަތީ މަޖިލީހުގައި ނެގި ވޯޓު އެމެރިކާއިން ވީޓޯކޮށްފިއެވެ.

އޮކްޓޯބަރ މަހުގެ 7 ވަނަ ދުވަހު ހަމާސް އިން އިސްރާއީލަށް އަމާޒުކޮށް ފޮނުވާލި ރޮކެޓް ހަމަލާތަކުގެ ތެރެއިން ބައެއް ރޮކެޓްތައް އިސްރާއީލުގެ މެދު ތެރޭގައި ހުރި ނިޔުކުލިއަރ މިސައިލް ބަހަައްޓާފައި ހުރި ބޭސްއަކަށް އަމާޒުވިކަމަށް ނިއު ޔޯރކް ޓައިމްސް އިން ހާމަކޮށްފިއެވެ.

ރޮކެޓް އެ ބޭސްގައި ހުރި މިސައިލް އަށް ސީދާ އަމާޒުވެފައިނުވާކަމަށާއި ނަމަވެސް ރޮކެޓް ވެއްޓުމުގެ ސަބަބުން އަލިފާން ކަނި ބުރާ މިސައިލް ބަހައްޓާފައި ހުރި ބޭސް އާ ދިމާލަށް އަލިފާންގަނޑު ގޮސްފައިވާކަމަށް ބުނެފައިވެއެވެ.

އިސްރާއީލުން މިހާތަނަށް އައިއިރު އެގައުމުގައި ނިޔުކުއަލިޔަރ ހަތިޔާރު ހުރިކަމަށް ބުނެފައެއް ނުވެއެވެ. ނަމަވެސް އިސްރާއީލުގެ ވިސްލްބްލޯވަރސްގެ އިތުރުން އެމެރިކާގެ އޮފިޝަލުން ވަނީ އިސްރާއީލުގައި ނިޔުކުލިޔަރ ހަތިޔާރު ހުރިކަން ކަށަވަރުކޮށްފައެވެ.

ޣައްޒާއަށް އިސްރާއީލުން ދެމުންދާ ހަމަލާތައް ހުއްޓާނުލާހާ ހިނދަކު ހަމާސްގެ އަތްދަށުގައި ތިބި އެއްވެސް އަސީރެއް ދޫކޮށްނުލާނެކަމަށް ހަމާސްގެ ޑެޕިޔުޓީ ހެޑް ސަލާހް އަލް އަރޫރީ ވިދާޅުވެއްޖެއެވެ.

އަލްޖަޒީރާ އާ ވާހަކަދައްކަވަމުން ސަލާހް އަލް އަރޫރީ ވިދާޅުވީ ހަމަލާތައް ހުއްޓާލުމާއި ގުޅޭ އެއްވެސް މަޝްވަރާއެއް މިހާރު ކުރިޔަށްނުދާކަމަށެވެ. އަދި އަސީރުން ބަދަލުކުރުމާއި ގުޅޭ އެއްވެސް މަޝްވަރާއެއް އިސްރާއީލުން ޣައްޒާއަށް ދެމުންދާ ހަމަލާތައް ހުއްޓާނުލާހާ ހިނދަކު ކުރިޔަށްނުދާނެކަމަށެވެ.

އިސްރާއީލުން ބުނަމުން އަންނަނީ އަދިވެސް އަންހެނުންނާއި ކުޑަކުދިން ހަމާސްގެ އަތްދަށުގައި ތިބިކަމަށެވެ. އެކަމާއި ގުޅޭގޮތުން ހަމާސް އިން ބުނީ ހަމާސްގެ އަތްދަށުގައި ތިބި ހުރިހާ އަންހެނުންނާއި ކުޑަކުދިން ދޫކޮށްލާފައިވާކަމަށެވެ. ދެން ވާކީ ތިބީ އިސްރާއީލު ސިފައިންނާއި ސިފައިންނަށް އެކި ގޮތްގޮތުން ޚިދުމަތްކުރާ މީހުންކަމަށެވެ.

އެހެންކަމުން ދެން ތިބި އަސީރުން މިނިވަންކުރެވޭނީ އިސްރާއީލު ޖަލުތަކުގައި ތިބި ހުރިހާ ފަލަސްތީނު ރައްޔިތުން މިނިވަންކޮށް ހަމަލާ ދިނުން ހުއްޓާލުމުންކަމަށް އޭނާ ވިދާޅުވިއެވެ. އަދި ހަނގުރާމަވެރިން ތިބީ ހުރިހާ ގޮތަކަށްވެސް ތައްޔާރުވެގެންކަމަށް ވިދާޅުވިއެވެ.