ކޮވިޑް-19: އެންމެ ފަހުގެ

ކޮވިޑް-19 އާއި ގުޅިގެން ވަޒީފާތައް ގެއްލުމާއި މުސާރަތައް ކުޑަކުރުން ފަދަ މައްސަލަތައް ރަޖިސްޓްރީކުރުމަށް ޖޮބް ސެންޓަރުން ހުޅުވާލާފައިވާ ޕޯޓަލްގައި މިހާތަނަށް އާއިރު 723 މީހަކު ރަޖިސްޓްރީކޮށްފައިވާ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެ އެވެ.

އާދިއްތަ ދުވަހު 4 ރިސޯޓަކާއި 15 ސަފާރީއެއްގައި ތިބި މުވައްޒަފުން ފޭބުމުގެ ހުއްދަ ދީފައިވާކަމަށް ކޮވިޑް-19 ގެ ޓާސްފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

މިހާތަނަށް އާއިރު ކަރަންޓީނު ފެސިލިޓީތަކުގައި ތިބި މީހުންގެ ތެރެއިން 73 މީހަކު ދޫކޮށްލާފައިވާކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް ޢަޒީޒު ވިދާޅުވެއްޖެއެވެ.

ނޮވެލް ކޮރޯނާވައިރަސް ނުވަތަ ކޮވިޑް-19 ދުނިޔޭގައި ހަލުއި ކަމާއެކު ދަނީ ފެތުރެމުންނެވެ. ހުސްވި އަހަރުގެ ޑިސެމްބަރު މަހު ފަހުކޮޅު ޗައިނާގެ ވޫހާން އިން ތައާރަފްވި މި ބަލި އެންމެ 3 މަހެއްހާ ދުވަހުގެ ތެރޭގައި މުޅި ދުނިޔެއަށް ފެތުރި މިލިއަނަކަށް ވުރެ ގިނަ މީހުންނަށް ބަލި ވަނީ ޖެހިފައެވެ. މި ނުރައްކަލުން ސަލާމަތްވުމަށް ކުރަމުންދާ މަސައްކަތުގައި އަދިވެސް ކޮޅެއް، މެދެއް ފެންނާކަށް ނެތެވެ. މިހާރު އުފެދެނީ އެންމެ ސުވާލެކެވެ. މި ބައްޔަށް ވެކްސިންއެއް އުފެއްދޭނީ ކިހާ ދުވަހަކުން ބާވައޭ، އަދި އޭގެ އަގަކީ ކޮބައިބާވައޭ؟

ބޭންކް އޮފް މޯލްޑިވްސް (ބީއެމްއެލް) ގެ ބާޒާރު ބްރާންޗް ފިޔަވައި އެހެން ހުރިހާ ބްރާންޗާއި ސަރވިސް ސެންޓަރުތައް މިމަހުގެ 6 ، 7 އަދި 9 ވަނަ ދުވަހު ހުޅުވާނެކަމަށް ބީއެމްއެލްއިން ބުނެފިއެވެ.

ބްރާންޗަށް ވަޑައިގެންނެވުމުގެ ބަދަލުގައި އިންޓަރނެޓް ބޭންކިންގ އަދި އޭޓީއެމް ބޭނުންކުރުމަށް ބޭންކް އޮފް މޯލްޑިވްސް (ބީއެމްއެލް) އިން އިލްތިމާސްކޮށްފިއެވެ.

މޯލްޑިވްސް ކަރެކްޝަނަލް ސަރވިސްގެ ޖަލުތަކުގައި މަސައްކަތްކުރާ ފަރާތްތަކަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކޮވިޑް-19 އިން ރައްކާތެރިވުމާ ބެހޭގޮތުން ތަމްރީން ޕްރޮގްރާމެއް މާފުށީ ޖަލުގައި ކުރިއަށް ގެންގޮސްފިއެވެ.

ކޮވިޑް-19 އިން ރައްކާތެރިވުމުގެ ގޮތުން އަޅާފައިވާ ފިޔަވަޅެއްގެ ގޮތުން މާލެ ހިމެނޭ ސަރަހައްދުގައި ހިންގަން ފަށާފައިވާ ކާފިއުގެ ގަޑީގައި އާދިއްތަ ދުވަހު ބޭރަށް ނިކުމެ އުޅުނު އެކަކު ޖޫރިމަނާ ކޮށްފައިވާކަމަށް ފުލުހުން ބުނެފިއެވެ.

ޖެންޑަރ މިނިސްޓްރީން މިހާރުވެސް ފޯރުކޮށްދެމުން ގެންދާ އިޖިތިމާޢީ ރައްކާތެރިކަމުގެ ޚިދުމަތްތައް މެދު ނުކެނޑި މިހާރުވެސް ފޯރުކޮށްދެމުން ގެންދާކަމަށް ޖެންޑަރ މިނިސްޓަރ އައިޝަތު މުހައްމަދު ދީދީ ވިދާޅުވެއްޖެ އެވެ. ކޮވިޑް-19 ގެ ޓާސްފޯހުން ކުރިޔަށްގެންދާ ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ ޗައިލްޑް ހެލްޕް ލައިން 1412 އާއި ސޯޝަލް ސަރވިސް އާއި ގުޅޭ އެހެނިހެން މަސައްކަތްތައް ފެމިލީ ޕްރޮޓެކްޝަން ސަރވިސްގެ މަސައްކަތްތައް ކުރިޔަށްދާ ކަމަށެވެ. ކުޑަކުދިންނާއި ޚާއްސަ އެހީއަށް ބޭނުންވާ މީހުންގެ މަރުކަޒުގެ މަސައްކަތްތައްވެސް ކުރިޔަށްދާ ކަަމަށް މިނިސްޓަރ ވިދާޅުވި އެވެ. އާންމުކޮށް ކުރިޔަށްދާ ގޮތަށް ބަދަލެއް ނެތި ކުރިޔަށްދާ ކަމަށް މިނިސްޓަރ ވިދާޅުވި އެވެ.

ދުވަސްވީ މީހުންނަށް ޚާއްސަ ކްލިނިކެއް މިއަދު ހުޅުވާފައިވާކަމަށް މަބްރޫކް ވިދާޅުވެއްޖެ އެވެ. މިހާރު ކުރިޔަށްދާ ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އުމުރުން ދުވަސްވީ މީހުންގެ އާންމު ބަލިތަކަށް މިކުލިނިކުން ފަރުވާދޭނެކަމަށެވެ. މިތަން ހުންނާނީ ދަރުމަވަންތަ ހޮސްޕިޓަލްގެ ތިންވަނަ ފަންގިފިލާގައި ކަމަށް މަބްރޫކް ވިދާޅުވި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ސްރީލަންކާގައި ކަރަންޓީނުކޮށްފައި އޮތް ޓީސީ ސްޕޯޓްސް ކްލަބު ރާއްޖެ ގެނެސްފި އެވެ.

ޓީސީ ޓީމު އާދީއްތަ ދުވަހުގެރޭ ރާއްޖެ ގެނައީ، ރާއްޖެ ނާދެވިފައި ތިބި ދިވެހިންން ގެނައުމަށް ގައުމީ އެއާލައިން މޯލްޑިވިއަންއިން ކުރި ހާއްސަ ދަތުރުގައެވެ.

ރާއްޖޭގައި މިހާރު 23 ފްލޫ ކުލިނިކެއް ހިންގަމުންދާކަމަށް މަބްރޫކް ވިދާޅުވި އެވެ. މިތަންތަނުން ޖުމްލަ 5959 މީހަކަށް ޚިދުމަތް ދީފައިވޭ. ފާއިތުވި 24 ގަޑިއިރު 142 މީހަކަށް ޚިދުމަތްދީފައިވާކަމަށް މަބްރޫކް ވިދާޅުވި އެވެ.

މިހާތަނަށް ޖޮބް ޕޯޓަލްގައި 723 މީހަކު ރަޖިސްޓްރީކޮށްފައިވާ ކަމަށް މަބްރޫކް ވިދާޅުވެއްޖެ އެވެ. މިހާރު ކުރިޔަށްދާ ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ މީގެތެރެއިން 58 މީހުންނަކީ އަމިއްލަ މަސައްކަތްކުރާ މީހުންކަމަށް މަބްރޫކް ވިދާޅުވި އެވެ. ވަޒީފާއިން ކަނޑާލާފައިވާ 185 މީހުނާއި މުސާރަކުޑަކޮށްފައިވާ 113 މީހުންނާއި ނޯޕޭއަށް ދިޔުމަށް އަންގާފައިވާ 245 ބައި ސެލަރީ އަށް މުސާރަ ކުޑަކޮށްފައިވާ 72 މީހުންނާއި ސަސްޕެންޑް 64 މީހުންނާއި ބޭސިކް ސެލަރީ އަށް މުސާރަކުޑަކޮށްފައިވާ 44 މީހުން ހިމެނޭކަމަށް މަބްރޫކް ވިދާޅުވި އެވެ.

މިއަދު 9 ސަފާރިއަކާއި 15 ރިސޯޓެއްގައި ތިބި މުވައްޒަފުން ފޭބުމުގެ ހުއްދަ ދީފައިވާކަމަށް ކޮވިޑް-19 ގެ ޓާސްފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

މޮނިޓަރިންގެ ހާލަތުގައި އޮތް ރިހިވެލި އަދި ކޮންސްޓެންސް މޫފުށި މޮނިޓަރިންގެ ހާލަތުން ވަނީ ނަގާފައިވާ ކަމަށް މަބްރޫކް ވިދާޅުވި އެވެ. އަދި އެތަންތަނުން އައިސޮލޭޓް ކުރަންޖެހޭ މީހުން އައިސޮލޭޓް ކުރެވިފައިވާކަމަށް މަބްރޫކް ވިދާޅުވި އެވެ.

އައިސޮލޭޝަންގައި ތިބީ 12 މީހުން

ކަރަންޓީނުގައި ތިބީ 809 މީހުން

ކަރަންޓީނު ފެސިލިޓީތަކުން 73 މީހުން ވަނީ ދޫކޮށްލާފައި

މިއަދު 187 ސާމްޕަލެއް ނަގާފައިވޭ ކަރަންޓީނުގައި ތިބި މީހުންގެ ތެރެއިން

43 މީހެއްގެ ސާމްޕަލެއް މިހާރު ވެސް ނެގުމުގެ މަސައްކަތް ދަނީ ކުރަމުން

ޖުމްލަ ސާމްޕަލް: 1573 ސާމްޕަލް

ޕޮޒިޓިވް: 19 ސާމްޕަލް

ނެގެޓިވް : 1489 ސާމްޕަލް

ހަވީރު 4 ޖެހުމާއި ހަމައަށް 65 ސާމްޕަލެއްގެ ނަތީޖާ ނުލިބޭ

ޕޮޒިޓިވް: 19 މީހުން

ރަނގަޅު : 13 މީހުން

ފަރުވާދެމުންދާ : 4 މީހުން

2 މީހަކު ރާއްޖެއިން ބޭރުގައި

ގެވެށި އަނިޔާ އަދި ކުޑަކުދިންނަށް ކުރާ އަނިޔާގެ އެއްވެސް މައްސަލައެއް އޮތްނަމަ ރިޕޯޓްކުރުމަށް ޖެންޑަރ މިނިސްޓަރ އެދިވަޑައިގެންފި އެވެ. މިހާރު ކުރިޔަށްދާ ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ އެފަދަ މައްސަލަތައް ހޮޓްލައިނަށް ހުށަހެޅުމަށް އެދިވަޑައިގަންނަވާކަމަށެވެ.

މިހާރު ދުނިޔޭގައި ހަލުވި ކަމާއެކު ފެތުރެމުންދާ ނޮވެލް ކޮރޯނާވައިރަސް (ކޮވިޑް-19) ރޯގާ ޖެހިގެން ލީބިއާގެ ކުރީގެ ބޮޑުވަޒީރު މަޙްމޫދު ޖިބްރީލް ނިޔާވެއްޖެއެވެ.

ކޮވިޑް-19 ޖެހިގެން ފާއިތުވި 24 ގަޑިއިރު ތެރޭގައި އިނގިރޭސިވިލާތުން 621 މީހަކު މަރުވެއްޖެ އެވެ.

ދުނިޔޭގެ 110 ޤައުމަކުން/ ޓެރިޓަރީއަކުން މީހުން އެއް މިލިޔަނަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު، ދެލައްކަ ފަންސާސްހާހަށްވުރެ ގިނަ މީހުން މިހާރުވަނީ ރަނގަޅުކުރެވިފައެވެ.

ސައުދީއަރަބިއްޔާގެ ޞިއްޙަތާއި ބެހޭ ވުޒާރާއާއި ޙަވާލާދީ ޤަަލްފުގެ މީޑިއާތަކުން ޚަބަރުފަތުރާގޮތުގައި، މިއަދު އެކަނި އެޤައުމުން 206 މީހުން ވަނީ ވައިރަސްއަށް ޕޮޒިޓިވްވެފައެވެ. އަދި 5 މީހަކު ވަނީ ފަރުވާދެމުން ދަނިކޮށް ޞިއްޙީ ހާލު ދެރަވެ ދުނިޔެއާއި އަލްވަދާޢު ކިޔާފައެވެ

ސިންގަޕޫރުގެ ޞިއްޙަތާއިބެހޭ ވުޒާރާއާއި ޙަވާލާދީ ބައިނަލްއަޤުވާމީ މީޑިއާތަކުން ރިޕޯޓުކުރާގޮތުގައި، މިއަދު އެކަނި އެޤައުމުން 120 މީހުން ވަނީ ކޮވިޑް-19 އަށް ޕޮޒިޓިވްވެފައެވެ.

އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީގެ މުވައްޒަފުން ނޯޕޭ ލީވްއަށް ނުފޮނުވާނެ ކަމަށް އެ ކްލަބުން ބުނެފި އެވެ.

މިއީ ޕްރިމިއާ ލީގުގެ ކްލަބަކުން އެ ކްލަބެއްގެ މުވައްޒަފުން ނޯޕޭއަށް ނުފޮނުވާނެ ކަމަށް ބުނި ފުރަތަމަ ފަހަރެވެ.

އިންޑިއާގެ ގުރުގާމް ސިޓީގެ ސްލަމް އޭރިއާގައި ދިރިއުޅެމުންދާ 200 އާއިލާއަކަށް އެކްޓަރ ރަކުލް ޕްރީތް ސިންގް ކާބޯތަކެތި ހަދިޔާކުރަމުންދާ ކަމަށް ރިޕޯޓުތައް ބުނެފިއެވެ.

ކޮވިޑް-19 ގެ ރާއްޖޭގެ އެންމެ ފަހުގެ ޙާލަތު ބަޔާންކުރުމަށް ނޭޝަނަލް އެމަރޖެންސީ އޮޕަރޭޝަން ސެންޓަރުގައި މިރޭ 09:00 ޖަހާއިރު ބާއްވާ ޕްރެސްގައި މިނިސްޓަރ އޮފް ޖެންޑަރ ފެމިލިީ އެންޑް ސޯޝަލް ސަރވިސް ބައިވެރިވަޑައިގަންނަވާނެކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

މީގެ އިތުރުން އެންއާރްސީގެ ސެކްރެޓަރީ ޖެނެރަލްވެސް ބައިވެރިވަޑައިގަންނަވާނެކަމަށް އެޗްޕީއޭއިން ބުނެއެވެ.

މި މަހުގެ ހަތަރު ވަނަ ދުވަހަށް ކުރިން ތާވަލުކުރި ލޯކަލް ކައުންސިލްތަކުގެ އިންތިޚާބު ފަސްކުރުމަށް ނިންމާފައިވާ ނިންމުމާ ގުޅިގެން، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ، ލޯކަލް ކައުންސިލްތަކުގެ އިންތިޚާބާ ގުޅޭ ޚާއްޞަ ބިލް ހޯމަ ދުވަހުގެ ޖަލްސާއަށް އެޖެންޑާ ކޮށްފި އެވެ.

ފިޔާ، އަލުވި، ބިހުގެ އަގުކޮށް ކޮންޓްރޯލް ކުރާ ބީދައިން، ގޭގެ ކުލި ވެސް ކޮންޓްރޯލް ކުރެވެންޖެހޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވެއްޖެ އެވެ.

ކޮވިޑް-19 އާއި ގުޅިގެން މާލޭ ހިޔާ ދޭއްގެ ފުރަގަހުގައި ގާއިމްކޮށްފަިއވާ ދަތުރުވެރިންގެ ކްލިނިކް، ފްލޫ ކްލިނިކަކަށް ބަދަލުކޮށްދފިއެވެ.

ވަޒީފާއިން ވަކިކުރާ ޑައިވިންގް އިންސްޓްރަކްޓަރުންނަށް ގާނޫނީ އެހީތެރިކަން ފޯރުކޮށްދެވޭނެ އިންތިޒާމްް ޑައިވަރސް އެސޯސިއޭޝަން އޮފް ދި މޯލްޑިވިސް އިން ހަމަޖައްސައިފިއެވެ.

ކޮވިޑް-19 އާ ގުޅިގެން ރައްޔިތުންގެ މަޖިލީހުގެ އިގްތިސާދީ ކޮމިޓީއަށް ފިޝަރީޒް މިނިސްޓްރީ، ޓޫރިޒަމް މިނިސްޓްރީގެ އިތުރުން އިކޮނޮމިކް މިނިސްޓްރީގެ އިތުރުން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާ ސުވާލުކުރަން ފާސްކޮށްފިއެވެ.

ކޮރޯނާވައިރަސް (ކޮވިޑް-19) އާ ދެކޮޅަށް ހަނގުރުމާކުރުމަށް އެހީތެރިވުމުގެ ގޮތުން ސްޕެއިންގެ ބާސެލޯނާ ހޮސްޕިޓަލަކަށް ދީލަތި އެހީއެއް ވާން ބާސެލޯނާގެ ކުރީގެ މިޑްފީލްޑަރު އަދި ގަތަރުގެ އަލް ސާދުގެ ކޯޗު ޒަވީ ހެނާންޑޭޒް ނިންމައިފި އެވެ.

ރިޕޯޓުތައް ބުނާ ގޮތުން ޒަވީ އާއި އޭނާގެ އަންހެނުން ވަނީ ބާސެލޯނާ ހޮސްޕިޓަލަށް އެއް މިލިއަން ޔޫރޯ ހަދިޔާކުރަން ނިންމާފައެވެ.

އިންގްލެންޑުގެ ގައުމީ ފުޓްބޯޅަ ޓީމުގެ ކޯޗު ގެރެތު ސައުތުގޭޓްގެ މުސާރައިން 30 އިންސައްތަ އުނިކުރަން އޭނާ އެއްބަސްވެފައިވާ ކަމަށް ރިޕޯޓުތައް ބުނެފި އެވެ.

ރިޕޯޓުތައް ބުނާ ގޮތުން އިނގިރޭސި ކުޅުންތެރިންގެ ހައްގުގައި އުފައްދައިފައިވާ ޔޫނިއަން، ޕްރެފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން އަންނަ ހަފްތާގައި މިކަން އިއުލާނުކުރާނެ އެވެ.

އިނގިރޭސި ރާނީ އެލިޒަބަތް އާދިއްތަ ދުވަހު ޓީވީ މެދުވެރިކުރައްވާ އެގައުމުގެ ރައްޔިތުންނާ މުޚާތަބުކުރައްވާނެކަމަށް ބަކިންގހަމް ޕެލަސް އިން ބުނެފި އެވެ. އިނގިރޭސިވިލާތުގައާއި މުޅި ދުނިޔޭގައި މިހާރު ހަލުވިމިނުގައި ފެތުރެމުންދާ ކޮވިޑް-19 އާއި ގުޅިގެން އިނގިރޭސި ރާނީ ވާހަކަދައްކަވާނެކަމަށް މީޑިޔާ ރިޕޯޓްތައް ބުނެއެވެ. އަދި ނޭޝަނަލް ހެލްތު ސަރިވިސް އާއި ސިއްހީ އެހީތެރިންގެ މަސައްކަތްތަކަށް ރާނީ ޝުކުރުއަދާކުރައްވާ އެމީހުންގެ އާއިލާތަކުން މިވަގުތު ތަހައްމަލުކުރަމުންދާ ކަންކަން ފާހަގަކުރައްވާނެކަމަށް ރިޕޯޓްތައް ބުނެއެވެ.

ކޮވިޑް-19 އެއް ދުވަހާއި މިހާތަނަށް އެންމެ ގިނައިން ސިންގަޕޯރުގައި ޖެހިފައިވަނީ ހޮނިހިރު ދުވަހު ކަމަށް އެގައުމުން ބުނެފި އެވެ. އެގައުމުން 75 މީހަކަށް ވައިރަސް ހޮނިހިރު ދުވަހު ޖެހިފައިވެއެވެ. މިހާތަނަށް 1,189 މީހުންނަށް އެގައުމުން ވައިރަސް ޖެހިފައިވެއެވެ. އަދި 6 މީހަކު ވަނީ މަރުވެފަ އެވެ.

ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން އަޅާފިޔަވަޅެއްގެ ގޮތުން ދުބާއީ ދެ ހަފްތާގެ މުއްދަތަށް ލޮކްޑައުން ކުރާނެކަމަށް އެގައުމުން ބުނެފި އެވެ. ހޮނިހިރު ދުވަހުން ފެށިގެން ދުބާއީ ލޮކްޑައުން ކުރާއިރު ޒަރޫރީ ބޭނުންތަކު ނޫން ގޮތަކަށް އެއްވެސް ގޮތަކަށް މަގުމައްޗަށް ނުނިކުމެވޭނެކަމަށް އެގައުމުން ބުނެއެވެ.

ކޮވިޑް-19 އެންމެ ހަލުވި މިނުގައި ފެތުރެމުންދާ އެމެރިކާގައި ވައިރަސް ޖެހުނު މީހުންގެ އަދަދު 3 ލައްކައަށް ވުރެ މައްޗަށް އަރައިފި އެވެ. އެގައުމުގައި ވައިރަސް ޖެހުނު މީހުންގެ އަދަދު 301,902 އަށް އަރާފައިވާކަމަށް ރިކޯޑް ތަކުން ދައްކައެވެ. އަދި މަރުވި މީހުންގެ އަދަދު އުޅެނީ 8,175 ގައެވެ. ހޮނިހިރު ދުވަހު އެކަނިވެސް އެގައުމުގައި 23,949 މީހުންނަށް ވައިރަސް ޖެހިފައިވެ އެވެ.

ސްޕެއިން ލޮކްޑައުންކޮށް އަޅާފައިވާ ފިޔަވަޅުތައް އިތުރު 15 ދުވަހަށް އިތުރުކޮށް އޭޕްރީލް މަހުގެ 26 އާ ހަމައަށް ދިގުދައްމާލުމަށް އެގައުމުގެ ޤާނޫނު ހަދާ މަޖިލީހުގައި އެދިވަޑައިގަންނަވާނެކަމަށް އެގައުމުގެ ބޮޑުވަޒީރު ޕެޑްރޯ ސަންޗޭޒް ވިދާޅުވެއްޖެ އެވެ. ސްޕެއިންގައި ވައިރަސް ޖެހޭ މީހުންނާއި މަރުވާ މީހުންގެ ރޭޓް ކޮންމެސް ވަރަކަށް މަދުވަމުން އައި ނަމަވެސް މިފިޔަވަޅުތައް ދިގުދައްމާލުން މުހިންމު ކަމަށް ހޮނިހިރު ދުވަހު ޓީވީ މެދުވެރިކޮށް އެގައުމުގެ ރައްޔިތުންނާއި ވާހަކަދައްކަވަމުން ސަންޗޭޒް ވިދާޅުވި އެވެ. މިހާރު ސްޕެއިންއިން ފެންނަމުންދާ ކަންކަމަކީ ކުރިން އެޅި ފިޔަވަޅުތަކުގެ ނަތީޖާކަމަށާއި ހޮނިހިރު ދުވަހުގެ މިނިންމުމާއެކު އަދިވެސް ފިޔަވަޅުތައް އަޅަމުން ގެންދަވާނެކަމަށް ސަންޗޭޒް ވިދާޅުވި އެވެ. މީގެއިތުރުން އީސްޓަރ އަށްފަހު އިގްތިޞާދީ ގޮތުން އަޅާފައިވާ ބައެއް ފިޔަވަޅުތައް އުވާލާނެކަމަށް ސަންޗޭޒް ވިދާޅުވި އެވެ. އެގޮތުން އިގްތިޞާދީ ބައެއް މަސައްކަތްކަތްތައް ކުރުން މެދުކަނޑާލާފައި އޮތްއޮތުން ނިމުމަކަށް ގެންނަވާނެ ކަމަށް ވިދާޅުވި އެވެ. ނަމަވެސް ފިހާރަތަކާއި ބަރ އަދި ރެސްޓޯރެންޓްތައް އަދިވެސް ބަންދުކޮށްފައި ހުންނާނެކަމަށް ސަންޗޭޒް ވިދާޅުވި އެވެ.

ސްޕެއިންގައި މިހާތަނަށް އާއިރު 124,736 މީހުންނަށް ވައިރަސް ޖެހިފައިވާއިރު އިޓަލީއަށްފަހު އެންމެ ގިނަ މީހުން މަރުވަމުން އަންނަ ގައުމަކީ ސްޕެއިންއެވެ. އެގޮތުން އެގައުމުން މިހާތަނަށް 11,744 މީހުން ވަނީ މަރުވެފަ އެވެ. އެހެންނަމަވެސް ފާއިތުވި 24 ގަޑިއިރު އެގައުމުން މަރުވި މީހުންގެ އަދަދުވަނީ އޭގެކުރީ ދުވަހާ އަޅާބަލާއިރު ދަށަށްގޮސްފަ އެވެ. ހުކުރު ދުވަހު 932 މީހުން މަރުވިއިރު ހޮނިހިރު ދުވަހު މަރުވެފައިވަނީ 809 މީހުންނެވެ. އަދި ބުރާސްފަތި ދުވަހު އެގައުމުން ވަނީ 950 މީހުން މަރުވެފަ އެވެ.

މިއީ ކުރީ ހަފްތާގައި ރިކޯޑް ކުރަމުން އައި އަދަދުތަކާއި އަޅާބަލާއިރު ބޮޑުތަނުން ދަށް އަދަދެކެވެ. މީގެ ހަފްތާއެއް ކުރިން ސްޕެއިން އިން މަރުވެގެން ރިކޯޑް ކުރަމުން އައި އަދަދުތައް އުޅުނީ 20 އިންސައްތައިން މަތީގަ އެވެ. އެހެންނަމަވެސް މިހާރު އެއަދަދު އުޅެނީ 7 އިންސައްތައިން މަތީގަ އެވެ.

ތުރުކީވިލާތުގައި ކޮވިޑް-19 ޖެހިގެން ފާއިތުވެދިޔަ 24 ގަޑިއިރު 76 މީހުން ވަނީ މަރުވެފައެވެ. މިއާއެކު އެޤައުމުގައި މިހާތަނަށް ވައިރަސް ޖެހުނު މީހުންގެ އަދަދު ވަނީ 501 އަށް އަރާފައެވެ.

އެޤައުމުގައި މިދިޔަ 24 ގަޑީއިރު، 3,013 މީހަކު ވައިރަސްއަށް ޕޮޒިޓިވްވިއެވެ. މިއާއެކު އެޤައުމުން ވައިރަސް ޖެހުނު މީހުންގެ އަދަދުވަނީ 23,934 އަރާފައެވެ. މިހާތަނަށް އައިއިރު ފަރުވާދީގެން އެޤައުމުގައި 786 މީހުންވަނީ ރަނގަޅުކޮށްފައެވެ.

މިހާރުވެސް ތުރުކީވިލާތުގައި 22,647 މީހުންނަށް ފަރުވާދެމުން އެބަދެއެވެ. މީގެތެރެއިން، 1,311 މީހުންގެ ޙަލަތު ސީރިއަސްކަމަށް ޚަބަރު ލިބެއެވެ.