ކޮވިޑް-19: އެންމެ ފަހުގެ

ކުރެއްދޫގައި ހުރި ފަތުރުވެރިޔަކު ކޮވިޑް-19 އަށް ޕޮޒިޓިވްވެ، އޭނާ ފުރައިގެންދިޔަ މައްސަލާގައި ކަން ހިނގާދިޔަގޮތް ބަލަމުން އަންނަކަމަށާއި، މައުލޫމާތު ލިބޭ މިންވަރަކުން ހާމަކުރާނެކަމަށް ސަރުކާރުން ބުނެފި އެވެ.

މިހާރު ދަރުބާރު ގޭގައި ކުރިއަށްދާ ނޫސްވެރިންގެ ބައްދަލުވުމުގައި މަބްރޫކް ވިދާޅުވީ، އަމަލުކުރަމުން އަންނަނީ ބައިނަލްއަޤުވާމީ މިންގަނޑުތަކާއި، ބެސްޓް ޕްރެކްޓިސްތަކާއި އެއްގޮތަށް ކަމަށެވެ. އަދި އެކަމުގައި ސަރުކާރަށް މައުލޫމާތު އެނގޭ މިންވަރަކުން ހާމަކުރާނެކަމުގެ ޔަޤީންކަންދޭކަމަށް މަބްރޫކް ވިދާޅުވި އެވެ.

ކޮވިޑް-19 އަށް ޕޮޒިޓިވްވެފައިވާ އިޓަލީ މީހާ ފުރަންގޮސް، ނުފުރިގެން މާގިރި ހޮޓަލަށް އައިސްފައިވާކަމަށް ސަރުކާރުން ހާމަކޮށްފި އެވެ.

އިޓަލީ ފަތުރުވެރިޔާއަކީ، އޭނާ އެނބުރި ޤައުމަށް ދިޔަފަހުން ބައްޔަށް ޕޮޒިޓިވްކަމަށް ދެއްކި މިހެކެވެ. މަބްރޫކް ވިދާޅުވީ އޭނާ އުޅުނު ގޮތްތައް ބެލިއިރު، ފުރަންގޮސް، ނުފުރުމުން މާގިރި ހޮޓަލްގައި މަޑުކުރިކަމަށެވެ. އަދި އެޔަށްފަހު ޔުނިވަރސަލްގެ ޓިކެޓިންގ އޮފީހަށް ގޮސްފައިވާކަމަށް މަބްރޫކް ވިދާޅުވި އެވެ.

މަބްރޫކް ވިދާޅުވީ އޭގެތެރެއިން ޔުނިވަރސަލް ޓިކެޓިން އޮފީހުގައި މަސައްކަތްކުރާ މުވައްޒަފަކު ބައްޔަށް ޝައްކުކުރެވިގެން އެކަހެރިކޮށްފައިވާކަމަށެވެ.

ކޮވިޑް-19 އަށް ޝައްކުކުރެވުނު 63 ސާމްޕަލެއް ނެގި ޓެސްޓު ކުރެވިފައިވާކަމަށް މަބްރޫކް ވިދާޅުވެއްޖެ އެވެ.

ދަރުބާރު ގޭގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި މަބްރޫކް ވިދާޅުވީ 49 ސާމްޕަލެއް ނެގެޓިވްކަމަށް ދެއްކިއިރު، އޭގެތެރެއިން ޕޮޒިޓިވްވިކަމަށް ދެއްކީ 4 ސާމްޕަލެއް ކަމަށެވެ. އަދި ޝައްކުކުރެވޭ ބައެއް މީހުންގެ އެއް ސާމްޕަލަސްވުރެ ގިނަ ސާމްޕަލް ނެގޭކަމަށް މަބްރޫކް ވިދާޅުވި އެވެ.

ކޮވިޑް-19 އަށް ޕޮޒިޓިވްވެފައިވާ އެންމެންގެ ހާލު ރަނގަޅުކަމަށް މަބްރޫކް އަޒީޒް ވިދާޅުވެއްޖެ އެވެ.

ރާއްޖެއިން ކޮވިޑް-19 އަށް ޕޮޒިޓިވްވެފައިވަނީ 4 މީހަކު އެވެ. ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އެ އެންމެންގެ ހާލުވެ މިހާރު ރަނގަޅުވަމުން އަންނަކަމަށެވެ. އަދި އެ މީހުންގެ ހާލު ގާތު ބަލަމުން އަންނަ ކަމަށް މަބްރޫކް ވިދާޅުވި އެވެ.

6 ޖެނުއަރީ 2020:- ކޮވިޑް 19ގެ ހާލަތާއި ގުޅިގެން މިނިސްޓްރީ އޮފް ހެލްތު އަދި ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ގުޅިގެން ރާއްޖޭގެ ރިސްކު އެސެސްމެންޓެއް ހެދުމަށް ނިންމުނު.

12 ޖެނުއަރީ 2020: -ރިސްކު އެސެސްމެންޓް ހަދާ ނިންމުނު

20 ޖެނުއަރީ 2020:- ނެޝަނަލް ރެސްޕޮންސް ގައިޑްލައިން ތައްޔާރު ކުރެވުނު އަދި ސްޓޭކް ހޯންޑަރުންނާ ކަމާބެހޭ މައުލޫމާތުތައް ދީ ތަމްރީން ދިނުމުގެ މަސައްކަތް ފެށުނު

- އެޗްޕީއޭގެ ފަރާތުން ކޮވިޑް 19ގެ ހާލަތާއި ގުޅޭގޮތުން އާއްމުންނަށް ފުރަތަމަ ފަހަރަށް މައުލޫމާތު ހިއްސާކުރެވުނު

21 ޖެނުއަރީ 2020: -ހެލްތު އިމަރޖެންސީ ކޯޑިނޭޓިންގް ކޮމެޓީއެއް އެކުލަވާލާ ، އެ ކޮމެޓީގެ ފުރަތަމަ ބައްދަލުވުން ބޭއްވުނު. މަޝްވަރާތަކަށް ފަހު ދުވަހުން ދުވަހަށް ނިންމަންޖެހޭ ކަންކަމުގައި މަޝްވަރާ އަރުވާ، އަޅަންޖެހޭ ފިޔަވަޅުތަކުގެ އަސާސީ ނާރެހަކީ މި ކޮމިޓީ.

22 ޖެނުއަރީ 2020:- މިނިސްޓްރީ އޮފް ހެލްތުން ޑަބްލިއުއެޗްއޯ އާއި އެކު ނޫސްކޮންފަރެންސްއެއް ބާއްވާ ދުނިޔޭގެ އޭރު ހާލަތު އޮތް ގޮތާއި ރާއްޖޭގައި އެހާތަނަށް އަޅާ ފިޔަވަޅުތަކާއި އަދި ރައްޔިތުން އެކަމާއި ބެހޭ ގޮތުން ސަމާލުކަން ދޭން ޖެހޭ ކަންތައްތަކާއި ޑަބްލިއުއެޗްއޯ އިން ނެރެފައިވާ ގައިޑްލައިންތަކާއި އެ ގައިޑްލައިންތަކުގެ ތެރެއިން ލިބިފައިވާ އިޚްތިޔާރުތަކާއި ތަފްސީލީ މައުލޫމާތު ރައްޔިތުންނާއި ހިއްސާ ކުރެވުނު

- ވެލާނާ އިންޓަރނޭޝަނަލް އެއަރޕޯޓުގައި ތަރމަލް ކެމެރާ ހަރުކުރެވި، ސްކްރީން ކުރެވެން ފެށުނު

- ޓެކްނިކަލް އެޑްވައިޒަރީ އަކުން ކްލިނިކަލް މެނޭޖްމެންޓް ގައިޑްލައިން އެކުލަވާލުމުގެ މަސައްކަތް ފެށުނު

26 ޖެނުއަރީ 2020:- އައްޑޫގައި ތަރމަލް ކެމެރާ ހަރުކުރެވި، ސްކްރީން ކުރެވެން ފެށުނު

27 ޖެނުއަރީ 2020:- ހުޅުމާލޭގައި ހުރި ޕްރީސްކޫލެއް ވަގުތީ ސްކްރީނިންގް މަރުކަޒަކަށް ބަދަލުކުރެވުނު

28 ޖެނުއަރީ 2020:- މަޖިލީހުގެ މެމްބަރުންނަށް ބައްޔާއި ގުޅިގެން މައުލޫމާތު ދިނުމަށް އެދި މަޖިލީހަށް ސިޓީ އެއް ފޮނުވުނު

29 ޖެނުއަރީ 2020:- ރާއްޖެއަށް ކޮރޯނާ އައިއްސި ހާލަތުގައި އަމަލު ކުރާނެ އެސްއޯޕީތަކާއި އުސޫލުތަކުގެ ރަނގަޅުކުރަންޖެހޭ ކަންކަން ހުރިތޯ ބެލުމަށް މަލްޓި އޭޖެންސީ ޓޭބަލް ޓޮޕް އެކްސަރސައިޒެއް ބޭއްވުނު. އެ އެކްސަރސައިޒުން ފާހަގަކުރެވުނު ކަންކަން ބަލާ، އެސްއޯޕީތަކަށް ގެންނަން ޖެހޭ ބަދަލުތައް ގެނެސް އިސްލާހުގެނެވުނު.

- ވެލާނާ އިންޓަރނޭޝަލް އެއަރޕޯޓުގައި ވަގުތީ އައިސޮލޭޝަން ފެސިލިޓީއެއް ގާއިމު ކުރެވުނު.

ކޯލް ސެންޓަރެއް ގާއިމުކުރެވިގެންދިޔަ

30 ޖެނުއަރީ 2020: -އިމަޖެންސީ އޮޕަރޭޝަން ސެންޓަރެއް މިނިސްޓްރީ އޮފް ހެލްތުގައި ގާއިމު ކުރެވި، މަސައްކަތް ފެށުނު.

- ޑަބްލިއުއެޗްއޯ އިން ކޮވިޑް-19 އަކީ ޕަބްލިކް ހެލްތު އިމަރޖެންސީ އޮފް އިންޓަރނޭޝަނަލް ކޮންސަރންއެއްގެ ގޮތުގައި ކަނޑައެޅި.

- ޗައިނާ އިން އައި މީހަކު ބައްޔަށް ޝައްކުކުރެވޭ އަލާމާތްތަކެއް ހުރިކަމަށް ބެލެވުމުން ފޮނަދޫގައި ގާއިމުކޮށްފައިހުރި އައިސޮލޭޝަން ފެސިލިޓީގައި އައިސޮލޭޓް ކުރެވުނު

- ޓެސްޓު ކުރުމަށް ސާމްޕަލް ނެގުނު، ނަމަވެސް އޭރު ރާއްޖޭގައި ޓެސްޓު ކުރެވޭނެ އިންތިޒާމް ހަމަޖެހިފައެއް ނެތް

(އޭރު އައިސޮލޭޝަން ފެސިލިޓީތައް ގާއިމު ކުރެވިފައި ހުރީ، ފަރުކޮޅު ފުށި އަދި ފޮނަދޫގައި)

31 ޖެނުއަރީ 2020:އަތޮޅު ތެރޭގެ ހެލްތު ފެސިލިޓީތަކަށް ބޭނުންވާ ޕަރސަނަލް ޕްރޮޓެކްޓިވް ގިއަރ ހޭންޑް ސެނިޓައިޒަރ، މާސްކު އަދި ކޮންމެހެން ބޭނުންވާނެ ތަކެތީގެ ލިސްޓު ތައްޔާރު ކުރުމަށްފަހު ކަމާބެހޭ ފަރާތްތަކަށް ފޮނުވުނު

- ބަލީގެ އަލާމާތެއް ނެތް ނަމަވެސް ޗައިނާ އިން ރާއްޖެއައި ދެމީހެއް އައިސޮލޭޓް ކޮށް، ސާމްޕަލް ނެގުނު

- އެދުވަހު ޗައިނާއަށް ދަތުރުކުރިކަމުގެ ހިސްޓްރީ ހުރި ބަލީގެ އަލާމާތްތައް ހުރި ދެމީހެއް އައިސޮލޭޓް ކުރެވުނު

- ކޮވިޑް-19 އާއި ގުޅިގެން ސަރުކާރުގެ އެތެރޭގެ ކަންކަން ހަރުދަނާ ކުރުމަށް ވަޒީރުންގެ ކޮމިޓީއެއް އެކުލަވާލާ، މަސައްކަތް ފެށުނު

1 ފެބްރުއަރީ 2020:-ޓެސްޓު ކުރުމަށް ފޮނުވުނު ރާއްޖެއިން ބޭރަށް ފޮނުވުނު ސާމްޕަލްތައް އިންޑިއާގެ ޕޫނޭއަށް ފޮނުވުނު

- ތައިލެންޑުގެ އެފްރިމް ލެބޯޓްރީގައި ރާއްޖެއިން ފޮނުވާ ސާމްޕަލް ޓެސްޓު ކުރުމުގެ ހުއްދައަކަށް ސަރުކާރުން އެދުނު

- ރާއްޖޭގެ ސީނިއަރ ޑޮކްޓަރުންގެ މައްޗަށް އެކުލެވޭ ޓެކްނިކަލް އެޑްވައިޒަރީ ގްރޫޕެއް އުފައްދާ، އެގްރޫޕްގެ މަޝްވަރާ ނަގަން ފެށުނު

- ޗައިނާ އިން ރާއްޖެ ދަތުރުކުރާ ޑައިރެކްޓް ފްލައިޓުތައް މެދުކަނޑާލަން ނިންމުނު

3 ފެބްރުއަރީ 2020:ޕޫނޭ އަށް ފޮނުވުނު ހުރިހާ ސާމްޕަލްތަކެއް ޓެސްޓު ނަތީޖާ ލިބުނު. ހުރިހާ ނަތީޖާއެއް ނެގެޓިވް.

- ޗައިނާ މަގުން ދަތުރުކުރާ މީހުން ރާއްޖެ ވަނުން މަނާ ކުރުމަށް ރައިސުލްޖުމްހޫރިއްޔާ ނިންމެވި. އަދި ޗައިނާއިން ރާއްޖެ އަންނަ ހުރިހާ ދިވެހިން 14 ދުވަހަށް ކަރަންޓީނު ކުރުމަށް ނިންމުނު

18 ފެބްރުއަރީ 2020:-ޗައިނާގެވުހާންގައި ތިބި ދިވެހިން އިންޑިއާގައި ކަރަންޓީނު ކުރުމަށްފަހު ރާއްޖެ ގެނެވުނު

20 ފެބްރުއަރީ 2020: -އައިޖީއެމްއެޗްގެ ލެބޯޓްރީގައި ބައްޔަށް ޓެސްޓުކުރެވޭނެ ގޮތް ހަމަޖައްސާ 1000 ފަރާތް ޓެސްޓުކުރުމުގެ އިންތިޒާމް ހަމަޖެހިގެންދިޔަ

24 ފެބްރުއަރީ 2020: ކްރޫޒްލައިނަރތައް ރާއްޖެ އައުން ވަގުތީގޮތުން މެދުކަނޑާލެވުނު

3 މާޗް 2020: އެޗްޕީއޭއާއި އެންޑީއެމްއޭ އާ ގުޅިގެން ނެޝަނަލް އިމަރޖެންސީ އޮޕަރޭޝަން ސެންޓަރެއް ގާއިމުކުރެވި މަސައްކަތް ފެށުނު

- ކުރިން ހެލްތު މިނިސްޓްރީގައި ގާއިމުކުރެވުނު އިމަރޖެންސީ އޮޕަރޭޝަން ސެންޓަރ ދަރުބާރުގެއަށް ބަދަލުކުރެވުނު.

- ކޮރެއާގެ ދެ ސަރަހައްދަކުން ދަތުރުފަށާ މީހުންނާއި އެ ސަރަހައްދުގެ ތެރެއިން ރާއްޖެއަށް މީހުން ދަތުރުކުރުން މެދުކަނޑާލެވުނު

5 މާޗް 2020:އިޓަލީއިން ރާއްޖެ ދަތުރުކުރި މީހެއް ގައިން ބަލީގެ އަލާމާތް ހުރެގެން އެ ބައްޔަށް ޓެސްޓު ކުރެވުނު. އެއީ މި ބައްޔަށް ރާއްޖޭގައި ޓެސްޓު ކުރެވުނު ފުރަތަމަ ފަހަރު. އޭނާގެ ނަތީޖާ ނެގެޓިވް.

7 މާޗް 2020:- ކުރެއްދޫ ރިސޯޓުގައި ތިބި ދެ މީހަކު ޕޮޒިޓިވް ވި.

- އިޓަލީ އިން ރާއްޖެ އަށް ދަތުރުކުރުން މަނާކުރެވުނު

8 މާޗް 2020:ބަތަލާ ރިސޯޓުގައި ތިބި ދެ މީހަކު ބައްޔަށް ޕޮޒިޓިވް ވި

ކޮވިޑް-19 އާއިގުޅޭ ނޫސްވެރިންގެ ބައްދަލުވުމެއް މިއަދު މެންދުރުފަހު 2:15 ގައި ބޭއްވުމަށް ނިންމައިފި އެވެ. ހެލްތު ޕްރޮޓެކްޝަން އެޖެންސީން ބުނީ، މިއަދު މެންދުރުފަހުގައި ބާއްވާ ނޫސްވެރިންގެ ބައްދަލުވުމުގައި ކޮވިޑް-19 ހާލަތާއި ގުޅޭގޮތުން އެންމެފަހުގެ މައުލޫމާތު ހިއްސާކުރާނެކަމަށެވެ.

ކޮވިޑް-19 އާ ގުޅިގެން މައުލޫމާތު ދިނުމަށް ގާއިމްކޮށްފައިވާ ހޮޓްލައިނަށް ގުޅި 2233 ފަރާތަކަށް މައުލޫމާތު ދެވިފައިވާ ކަމަށް ހެލްތް މިނިސްޓަރ އަމީން ވިދާޅުވިއެވެ.

އޭގެ އިތުރުން ސަރުކާރުން މިކަމާއި ގުޅިގެން މަނާކުރި ސަރަހައްދުތަކުން އައި މީހުންގެ ތެރެއިން 37 މީހަކު ފޮނުވާލާފައިވާ ކަމަށް އަމީން ވިދާޅުވިއެވެ.

ކޮވިޑް-19 އާ ގުޅިގެން ސަރުކާރުން އަޅަންޖެހޭ ފިޔަވަޅުތައް އަވަސް ގޮތެއްގައި އެޅުމުގެ ގޮތުން، ވަޒީރުންގެ މަޖިލީހުގެ ކޮމިޓީއެއް އެކުލަވާލެވިފައިވާ ކަމަށް ހެލްތް މިނިސްޓަރ އަމީން ވިދާޅުވެއްޖެއެވެ.

ގައިޑްލައިންތަކާއި އެސްއޯޕީތަކަށް އަމަލުކުރާނެ ގޮތާއި ކަންކަމުގައި އަވަސް ނިންމުންތަކެއް ނިންމުމުގައި ވަޒީރުންގެ މަޖިލީހުގެ ކޮމިޓީން ގިނަގުނަ މަސައްކަތްތަކެއް ކުރަމުންދާކަން ފާހަގަކުރައްވާ، އެ ކޮމިޓީގެ މަސައްކަތުގެ ތަފްސީލު އަމީން ވަނީ ދެއްވާފައެވެ.

ކޮވިޑް-19 އިން ރައްކާތެރިވުމުގެ ފިޔަވަޅުތައް އަޅަމުން މިގެންދަނީ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) ގެ ގައިޑްލައިންތަކާއި ދީފައިވާ ލަފައާއި އިރުޝާދާ އެއްގޮތަށް ކަމަށް ހެލްތް މިނިސްޓަރ އަމީން ވިދާޅުވެއްޖެއެވެ.

އަދި އެންމެ ފުރަތަމަ ދުވަހުން ފެށިގެން ސަރުކާރުން މިކަމާއި ގުޅިގެން އަޅަމުންގެންދާ ރައްކާތެރިކަމުގެ ފިޔަވަޅުތައް ރައްޔިތުންނާ ހިއްސާކުރަމުން ގެންދާ ކަމަށާއި، ކުރިއަށް އޮތް ތަނުގައި ވެސް އެ މައުލޫމާތުތައް ރައްޔިތުންނާ ހިއްސާކުރާނެ ކަމުގެ ޔަގީންކަން އަމީން ވަނީ ދެއްވާފައެވެ.

ކޮވިޑް-19 އާ މެދު ފިޔަވަޅު އަޅާފައިވަނީ ދުރާލާ އެކަމަށް ތައްޔާރުވެގެން ކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެ އެވެ. އަމީން މިހެން ވިދާޅުވީ ކޮވިޑް-19 އާ ގުޅިގެން ހެލްތު މިނިސްޓަރ ރައްޔިތުންގެ މަޖިލީހަށް ދެއްވާ ބަޔާނުގަ އެވެ.

ރައްޔިތުންގެ މަޖިލީހުގައި ބަޔާން އިއްވަވަމުން އަމީން ވިދާޅުވީ، މި ސަރަހައްދުގެ ގައުމުތަކުގެ ތެރެއިން ވެސް އެންމެ ފަހުން މި ބަލި އައި ގައުމަކަށް ރާއްޖެ ވެގެން ދިޔައީ، ސަރުކާރުން އެޅި ހަރުދަނާ ފިޔަވަޅުތަކާއި ގުޅިގެން ކަމަށެވެ.

ކުރިޔަށް އޮތް ތަނުގައި ވެސް ގޮތް ނިންމާނީ ކަމާއިބެހޭ ހުރިހާ އިދާރާތަކާއި މަސްއޫލުވެރިންގެ ލަފައާއި އިރުޝާދާ އެކުގައި ކަމަށެވެ.

ކޮވިޑް-19 އާ ގުޅިގެން މިހާތަނަށް އާއިރު ފަރުކޮޅުގައި 2 މީހަކު ކަރަންޓީނުކޮށްފައިވާ ކަމަށް އެޗްޕީއޭއިން ބުނެފި އެވެ. އަދި ފަރުކޮޅުގައި އެކަހެރިކޮށްފައި 8 މީހަކު ތިބި ކަމަށް އެޗްޕީއޭއިން ބުނެއެވެ. މިހާތަނަށް ރާއްޖެއިން 4 މީހަކު ވަނީ މިވައިރަސް އަށް ޕޮޒިޓިވްވެފަ އެވެ.

ކޮވިޑް-19 ޖެހިގެން 3830 މީހުން މަރުވެއްޖެ އެވެ.

ޗައިނާގެ ނޭޝަނަލް ހެލްތު ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު އާދިއްތަ ދުވަހު މިވައިރަސް ޖެހިގެން މަރުވެފައިވަނީ 22 މީހުންނެވެ. އެއާއެކު ޗައިނާއިން މިވައިރަސްޖެހިގެން މަރުވި މީހުންގެ އަދަދު ވަނީ 3,119 އަށް އަރާފަ އެވެ. ޗައިނާއިން އިއްޔެ އަލަށް މިވައިރަސް ޖެހިފައިވަނީ 40 މީހުންނަށެވެ. އެއާއެކު އެގައުމުން މިވައިރަސް ޖެހުނު މީހުންގެ އަދަދު 80,735 އަށް ވަނީ އަރާފަ އެވެ.

ފާއިތުވި 24 ގަޑިއިރު އެންމެ ގިނައިން މީހުން މަރުވެފައިވަނީ އިޓަލީންނެވެ. އެއީ 133 މީހުންނެވެ. އެއާއެކު އެގައުމުން މިވައިރަސް ޖެހިގެން މަރުވި މީހުންގެ އަދަދު 366 ށް ވަނީ އަރާފަ އެވެ. އެގައުމުގައި މިވައިރަސް ޖެހިފައިވާ މީހުންގެ އަދަދު ވަނީ 7,375 އަށް އަރާފަ އެވެ.

ތިން ވަނަ އަށް އެންމެ ގިނަ މީހުން މަރުވަމުން އަންނަނީ އިރާނުންނެވެ. އިރާނުގައި އާދިއްތަ ދުވަހު ވަނީ 49 މީހުން މަރުވެފަ އެވެ. އެއާއެކު އެގައުމުގައި މިހާތަނަށް މިވައިރަސް ޖެހިގެން މަރުވި މީހުންގެ އަދަދު ވަނީ 194 އަށް އަރާފަ އެވެ.

މުޅި ދުނިޔެއިން މިވައިރަސް 110,071 މީހުންނަށް ވަނީ ޖެހިފަ އެވެ. އަދި މިހާތަނަށް މިވައިރަސް ޖެހިގެން 62,280 މީހުން ވަނީ އެއްކޮށް ރަނގަޅުވެފަ އެވެ.

މިސްރުން ނޮވެލް ކޮރޯނާވައިރަސް (ކޮވިޑް-19) ޖެހިގެން ފުރަތަމަ ފަހަރަށް މީހަކު މަރުވެއްޖެއެވެ.

އެ ޤައުމުގެ ސިއްޙަތާ ބެހޭ ވުޒާރާއާ ޙަވާލާދީ ބައިނަލްއަޤުވާމީ މީޑިއާތަކުން ރިޕޯޓްކުރާ ގޮތުން، މަރުވެފައިވަނީ ޖަރުމަނަށް ނިސްބަތްވާ 60 އަހަރުގެ ފަތުރުވެރިއެކެވެ. އެގޮތުން އޭނާ މަރުވެފައިވަނީ ހޯމަ ދުވަހުގެ ވަގުތެއްގައެވެ.

ރިޕޯޓްތައް ބުނާގޮތުން އޭނާ މިސްރަށް އެތެރެވެފައިވަނީ މީގެ 7 ދުވަސް ކުރިންނެވެ. އެގޮތުން އޭނާ ވައިރަސްއަށް ޕޮޒިޓިވްވީ ހޮނިހިރު ދުވަހުގެ ވަގުތެއްގައެވެ. އަދި މަރުވެފައިވަނީ ބަލީގެ އަލާމަތްތައް ފެނި ހޮސްޕިޓަލުގައި ފަރުވާދެމުން ދަނިކޮށެވެ.

މިސްރުން މީގެ ކުރިން ވައިރަސްއަށް ޕޮޒިޓިވްވީ އެންމެ 3 މީހުންނެވެ. ނަމަވެސް މިސްރުގެ ނީލަ ކޯރުގައި އޮތް ކްރޫޒް ޝިޕެއްގައި ތިބި ބައެއްގެ ގައިން ކޮވިޑް-19 ފެނުމާއެކު ވައިރަސް ފެތުރި ޕޮޒިޓިވްވި މީހުންގެ އަދަދު ވަނީ 45 އަށް އަރާފައެވެ. އޭގެ ތެރޭގައި އެކި ޤައުމުތަކަށް ނިސްބަތްވާ ފަތުރުވެރިން ތިބިކަމަށް ރިޕޯޓްތައް ބުނެއެވެ.

ރިޕޯޓްތައް ބުނާގޮތުން އެ ކްރޫޒް ޝިޕް މިހާރު އޮތީ ކަރަންޓީން ކޮށްފައެވެ.

އެ ޤައުމުގެ އެންމެ ފަހުގެ މައުލޫމާތުތައް ހާމަކުރަމުން ހެލްތު މިނިސްޓްރީން ހާމަކޮށްފައިވާ ގޮތުގައި އާދިއްތަ ދުވަހު އެކަނިވެސް މިސްރުން ވަނީ 10 މީހުން ވައިރަސްއަށް ޕޮޒިޓިވްވެފައެވެ. އެއާއެކު ޕޮޒިޓިވް ކޭސްތަކުގެ އަދަދު ވަނީ 55 އަށް އަރާފައެވެ.

އިޓަލީގައި ހަލުވި މިނެއްގައި ކޮވިޑް-19 ފެތުރެމުންދާއިރު، އެ ޤައުމުން ވަނީ ވަރަށް ގިނަ ސަރަޙައްދުތައް ލޮކްޑައުންކޮށްފައެވެ.

އެގޮތުން އިޓަލީގެ އެންމެ މުއްސަނދި އެއް ރީޖަން ކަމަށްވާ ލޮމްބާރޑީއަށް އައުމާއި، ބޭރުވުން މަނާކޮށްފައިވާއިރު، އޭގެ އިތުރުންވެސް 4 ރީޖަންއަކުން 14 ޕްރޮވިންސެއް ވަނީ ލޮކްޑައުންކޮށްފައެވެ.

މީހުން އެއްވެ އުޅުން މަދުކޮށް، ރައްކާތެރިކަމުގެ ގޮތުން އެޅި މި ފިޔަވަޅުގެ ސަބަބުން އެ ޤައުމުގެ 16 މިލިއަނަށްވުރެ ގިނަ މީހުން "ލޮކްޑައުން" ގެ ޙާލަތު އިއުލާނުކޮށްފައިވާ ތަންތަނުގައި ވަނީ ތިބެން ޖެހިފައެވެ.

އިޓަލީއަކީ ޔޫރަޕްގެ ޤައުމުތަކުން މި ވައިރަސް އެންމެ ހަލުވި މިނެއްގައި ފެތުރެމުންދާ ޤައުމެވެ. އެގޮތުން އާދިއްތަ ދުވަހު އެކަނިވެސް ވައިރަސް ޖެހުނު މީހުންގެ އަދަދު އޭގެ ކުރީ ދުވަހަށްވުރެ 24 އިންސައްތަ އިތުރުވެފައިވާއިރު، މަރުވި މީހުންގެ އަދަދު ވަނީ 24 ގަޑިއިރުތެރޭ 57 އިންސައްތައަށް އިތުރުވެފައެވެ.

މިހާރު ދުނިޔޭގެ އެކި ކަންކޮޅުތަކުގައި ފެތުރެމުންދާ ނުރައްކާތެރި ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ސައުދީއަރަބިއާގެ ހުރިހާ ސުކޫލުތަކާއި ކިޔަވައިދޭ ތަންތަން ބަންދުކުރަން އެ ޤައުމުގެ ސަރުކާރުން ނިންމައިފިއެވެ.

ސައުދީގެ ތައުލީމީ ވުޒާރާއާ ޙަވާލާދީ އެ ޤައުމުގެ މީޑިއާތަކުން ރިޕޯޓްކުރާ ގޮތުން، ކޮވިޑް-19 އާ ގުޅިގެން އެ ޤައުމުގެ ސުކޫލުތަކާއި ޔުނިވަރސިޓީތަކުގެ އިތުރުން، ކިޔަވައިދޭ ހުރިހާ ތަނެއް މުއްދަތެއް ނެތް ގޮތަށް ބަންދުކުރުމަށް ވަނީ ނިންމާފައެވެ. އެގޮތުން ހޯމަ ދުވަހުން ފެށިގެން ބަންދުކުރާއިރު، އަލުން އެތަންތަން ހުޅުވާނީ ކޮވިޑް-19 ގެ ޙާލަތައް ބެލުމަށްފަހު ކަމަށް ރިޕޯޓްތައް ބުނެއެވެ.

މި ނިންމުމަކީ އެ ޤައުމުގެ ރައްޔިތުންގެ ސަލާމަތާއި ރައްކާތެރިކަމަށްޓަކައި ނިންމާފައިވާ ނިންމުމެއް ކަމަށް އެ ޤައުމުގެ ތައުލީމާ ބެހޭ ވުޒާރާއިން ބުނެފައިވާއިރު، އެޤައުމުގެ ސަރުކާރުން ވަނީ އެޤައުމުގެ އިރުމަތީ ޕްރޮވިންސްގެ ޤާޠިފް ޞަރަޙައްދު "ލޮކްޑައުން"ކޮށް ކަރަންޓީން ކުުރުމަށްވެސް ނިންމާފައެވެ.

ބަތަލާ އައިލެންޑް ރިސޯޓުން ކޮވިޑް-19 އަށް ޓެސްޓުކުރި 2 މީހުން ވައިރަސްއަށް ޕޮޒިޓިވްވެއްޖެއެވެ.

އެކަމާ ގުޅޭގޮތުން އެޗްޕީއޭއިން ކުރި ޓްވީޓެއްގައި ބުނީ، ބަތަލާ އައިލެންޑް ރިސޯޓުން ޓެސްޓުކުރި 3 މީހުންގެ ތެރެއިން 2 މީހުން ކޮވިޑް-19 އަށް ޕޮޒިޓިވްވެފައިވާ ކަމަށެވެ. އަދި އެކަކު ކޮވިޑް-19 އަށް ނެގަޓިވް ކަމަށެވެ. އެ ތިން މީހުންނަކީވެސް 3 ބިދޭސީންކަމަށް އެޗްޕީއޭއިން ބުންޏެވެ.

އެއާއެކު ރާއްޖޭގައި ކޮވިޑް-19 އަށް ޕޮޒިޓިވް ވި މީހުންގެ އަދަދު ވަނީ 4 އަށް އަރާފައެވެ.

މީޑިއާ ކައުންސިލުން ނެރުނު ބަޔާނެއްގައި ބުނެފައިވަނީ ކޮވިޑް-19އާ ގުޅޭ ޚަބަރާއި މަޢުލޫމާތު މީޑިއާތަކުން ގެނެސްދިނުމުގައި ރައްޔިތުންގެ މެދުގައި ޝައްކާއި ބިރުވެރިކަން އުފެދޭ ގޮތަށް އަދި ޙަޤީޤަތާއި ޚިލާފު ދޮގު ޚަބަރާއި މަޢުލޫމާތު ނުގެނެސްދިނުމަށް އެދޭ ކަމަށެވެ. އަދި މި ހައްޞާޞީ ދަނޑިވަޅުގައި ރާއްޖޭގެ މީޑިއާތަކުން ޚަބަރާއި މަޢުލޫމާތު ފެތުރުމުގައި ޢަމަލުކުރަމުންދާ ގޮތް އެ ކައުންސިލުން ވިލަރެސް ކުރަމުންދާނެ ކަމަށް ބަޔާނުގައި ބުނެފައިވެއެވެ.

އެގޮތުން މީޑިއާތަކުގައި ޝާއިއުކުރާ ކޮންޓެންޓަކީ ރާއްޖެއަށް މިހާރު ދިމާވެފައިވާ ޙާލަތާ އެކަށީގެންވާ ކޮންޓެންޓެއް ކަމުގައިނުވާނަމަ، އެކޮންޓެންޓަކާ ގުޅޭގޮތުން އެ މީޑިއާއަކާ ވާހަކަ ދައްކައި، ކައުންސިލުން އަންގާ އެންގުންތަކާ އެއްގޮތަށް ޢަމަލު ނުކުރާ މީޑިއާތަކާ ދެކޮޅަށް ޤާނޫނީ ފިޔަވަޅު އަޅާނެ ކަމަށް ވެސް ބަޔާނުގައިވެއެވެ.

ކޮވިޑް-19 އަށް ރާއްޖެ އޮތީ ތައްޔާރަށްކަމަށާއި، އެ ވައިރަސް ނުފެތުރި ކޮންޓްރޯލް ކުރެވޭނެ ކަމުގެ އުންމީދު އެބައޮތްކަމަށް ކޮރޯނާވައިރަސްގެ މައުލޫމާތު ދިނުމަށް ސަރުކާރުން ކަނޑައެޅި ތަރުޖަމާން މުހައްމަދު މަބުރޫކް އަޒީޒު ވިދާޅުވެއްޖެއެވެ.

ކޮވިޑް-19 އާއި ގުޅޭ މަޢުލޫމާތު ޙިއްސާ ކުރުމަށް މިރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މަބްރޫކް ވިދާޅުވީ، ވައިރަސް ކޮންޓްރޯލް ކުރެވިދާނެ ކަމުގެ އުންމީދު ސަރުކާރުން ކަނޑައިނުލާ ކަމަށެވެ. އަދި އެކަމަށް ކުރެވެންހުރި ހުރިހާ މަސައްކަތެއް ސަރުކާރުން ކުރަމުންދާ ކަމަށާއި، ރާއްޖެ ވައިރަސްއަށް ތައްޔާރު ކަމަށް ވިދާޅުވިއެވެ.

ސަޢުދީޢަރަބިއްޔާގެ ދައުލަތުގެ މީޑިއާއިން ޚަބަރު ފަތުރާގޮތުގައި، އެޤައުމުގެ ސަރުކާރުން މިއަދު ވަނީ އެޤައުމުގެ އިރުމަތީ ޕްރޮވިންސްގެ ޤާޠިފް ޞަރަޙައްދު "ލޮކްޑައުން"ކޮށް ކަރަންޓީން ކުުރުމަށް ނިންމާފައެވެ.

އަދި މިފަދައިން ސަރުކާރުން ނިންމާފައިވަނީ އެ ޞަރަޙައްދުން 11 މީހުން ކޮވިޑް-19 އަށް ޕޮޒިޓިވްވެ، ހިފެހެއްޓުމެއްނެތި ފެތުރިދާނެކަމުގެ ބިރު އޮތުމުންނެވެ.

500،000 މީހުންގެ އާބާދީއެއް އޮންނަ ޤާޠިފް ޞަރަޙައްދުގެ ސަރުކާރު އޮފީސްތަކާއި، ޢާންމު ޚިދުމަތްދެ ތަންތަންވެސް މުއްދަތެއް ނެތްގޮތައް މިހާރު ވަނީ ބަންދުކޮށްފައެވެ. އެހެންނަމަވެސް ވިޔަފާރި ޙަރަކާތްތައް އަދި ހުއްޓުވާފައެއް ނުވެއެވެ.

އިނގިރޭސި ވިލާތުގެ ޑިޕާރޓްމަންޓް އޮފް ހެލްތު އެންޑް ސޯޝަލް ކެއަރ އިން ހާމަކުރި ތަފާސް ހިސާބުތަކަށް ބަލާއިރު، އާދީއްތަ ދުވަހު އެކަނިވެސް އެޤައުމުން 67 މީހަކު ނޮވެލް ކޮރޯނާވައިރަސް(ކޮވިޑް-19)އަށް ވަނީ ޕޮޒިޓިވްވެފައެވެ. މިއާއެކު އެޤައުމުގައި ވައިރަސް ޖެހުނު މީހުންގެ އަދަދު ވަނީ 273 އަށް އަރާފައެވެ.

އިނގިރޭސި ވިލާތުގައި މި ވައިރަސްޖެހިގެން ފަރުވާ ދެމުންދަނިކޮށް 2 މީހަކު ވަނީ މަރުވެފައެވެ.

ކޮވިޑް-19 އާއި ބޭހޭ އެންމެ ފަހުގެ މަޢުލޫމާތު ހިއްސާކުރުމަށް ސަރުކާރުން މިހާރު ދަރުބާރުގޭގައި ކުރިޔަށްގެންދާ ނޫސްވެރިންގެ ބައްދަލުވުމުގައި ހެލްތު މިނިސްޓަރ އަމީން ވިދާޅުވީ، ފަރުކޮޅުފުށީގައި މިވަގުތު 8 މީހުން އެބަތިބި ކަމަށާއި، އޭގެ ތެރެއިން 2 މީހުން ކަރަންޓީންކޮށްފައިވާ ކަމަށެވެ.

އަދި ކުރެއްދޫގައި ކޮޓަރިތަކުގައި 93 މީހުން އެކަހެރިކޮށް ބައިތިއްބާފައި ތިބި ކަމަށާއި،އިތުރު 80 މީހުން އެ ރިސޯޓުން ޓްރޭސް ކުރަމުންދާކަމަށެވެ.

މީގެ އިތުރުން ބަޠަލާ ރިސޯޓުގައި ކޮޓަރިތަކުގައި ކަރަންޓީންކޮށްފައި 11 މީހުން އެބަތިބި ކަމަށްވެސް މިނިސްޓަރ ވިދާޅުވިއެވެ.

ކޮވިޑް-19 އާއި ބޭހޭ އެންމެ ފަހުގެ މަޢުލޫމާތު ހިއްސާކުރުމަށް ސަރުކާރުން މިހާރު ދަރުބާރުގޭގައި ކުރިޔަށްގެންދާ ނޫސްވެރިންގެ ބައްދަލުވުމުގައި ހެލްތު މިނިސްޓަރ އަމީން ވިދާޅުވީ، މިހާތަނަށް 24 މީހުން ކޮވިޑް-19 އަށް ޓެސްޓްކޮށްފައިވާއިރު، 20 މީހުން ނެގެޓިވްވެފައިވާކަމަށެވެ. އަދި 2 މީހުން ޕޮޒިޓިވްވެފައިވާއިރު، ބާކީ ދެމީހުންގެ ޓެސްޓުގެ ނަތީޖާ ނުލިބޭ ކަމަށް ހެލްތު މިނިސްޓަރ ވިދާޅުވިއެވެ.

ކޮވިޑް-19 އާއި ބޭހޭ އެންމެ ފަހުގެ މަޢުލޫމާތު ހިއްސާކުރުމަށް ސަރުކާރުން މިހާރު ދަރުބާރުގޭގައި ކުރިޔަށްގެންދާ ނޫސްވެރިންގެ ބައްދަލުވުމުގައި ކޮވިޑް-19 ގެ ތަރުޖަމާނު، މަބްރޫކް ވިދާޅުވީ، ސަރުކަރުގެ ވިސްނުމަކީ ވީ އެންމެ އަވަހަށް ޞައްޙަ މަޢުލޫމާތު ރައްޔިތުންނަށް ފޯރުކޮށްދިނުން ކަމަށެވެ. އެގޮތުން ރައްޔިތުންނާއި މަޢުލޫމާތުތައް ޙިއްސާކުުރުމަށް ދުވާލަކު މަދުވެގެން ދެ ބައްދަލުވުން ބާއްވާނެކަމަށް މަބްރޫކް ވިދާޅުވިއެވެ. މީގެ އިތުރުން ހެލްތު މިނިސްޓްރީއާއި، އެޗްޕީއޭގެ ވެބްސައިޓް މެދުވެރިކޮށް މަޢުލޫމާތު ވަގުތުން ވަގުތައް ހާމަކުރަމުން ގެންދާނެކަމަށްވެސް ވިދާޅުވިއެވެ.

ކޮވިޑް-19 ރާއްޖެއިން ފެނިފައިވުމާއި، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ސަލާމަތީ ފިޔަވަޅެއްގެ ގޮތުން މިވައިރަސްގެ އަލާމާތެއް ހުރިނަމަ އެމީހަކު މިސްކިތަށް ޖަމާޢަތަށް ނުދިޔުމަށް އިސްލާމިކް މިނިސްޓްރީން އިލްތިމާސްކޮށްފި އެވެ.

އެމިނިސްޓްރީން އެކަން ހާމަކޮށް ނެރެފައިވާ ނޫސްބަޔާނެއްގައި ބުނެފައިވަނީ މިވައިރަސްގެ އަލާމާތްތައް ކަމަށްބެލެވޭ ހުން އައުމާއި، ކެއްސާ ކިނބިހި އެޅުމާއި ، ކަރަންޓީނު ކޮށްފައިވާ ރަށަކަށް އަރާފައިވާ މީހުން ، އާންމުން އެއްވެ އުޅޭ ޖަމާޢަތްތަކުގެ ތެރެއަށް ނިކުމެ ނޫޅުމަށް އިލްތިމާސްކުރާ ކަމަށެވެ. އަދި ރައްކާތެރިކަމުގެ ފިޔަވަޅެއްގެ ގޮތުން މިސްކިތުގެ ޖަމާޢަތަށް ކުޑަކުދިންނާއި މުސްކުޅިން ނުދިޔުމަށްވެސް އިސްލާމިކް މިނިސްޓްރީން ވަނީ އިލްތިމާސްކޮށްފަ އެވެ.

ކޮވިޑް19އަށް ޝައްކު ކުރެވޭ އަލާމާތްތައް ހުރި ދިވެއްސެއް ށ. ފޯކައިދޫއިން ފަރުކޮޅުފުއްޓަށް މޮނިޓަރކޮށް، ޓެސްޓު ހެދުމަށް ގެނައުމުގެ މަސައްކަތް ކުރަމުންދަނީ. މި މީހާ އަކީ ކުރެއްދޫ ރިސޯޓްގެ މުވައްޒިފެއް. މިކަމުގެ އިތުރު މައުލޫމާތު ޙިއްސާ ކުރަމުންދާނެ ކަމަށް އެޗްޕީއޭ އިން ބުނޭ

ޖަޕާނު ސަރުކާރުގެ އިސް މަސްއޫލުވެރިންނާއި ޙަވާލާދީ ބޭރުގެ މިޑިއާތަކުން ޚަބަރުފަތުރާގޮތުގައި، މިއަދު އެކަނިވެސް 47 މީހުން ވަނީ ވައިރަސްއަށް ޕޮޒިޓިވްވެފައެވެ. މިއާއެކު، އެޤައުމުގައި ވައިރަސް ޖެހުނު މީހުންގެ އަދަދު ވަނީ 1،151 އަށް އަރާފައެވެ. މީގެ ތެެރެއިން 696 މީހުންނަކީ ކްރޫސްލައިނަރ "ޑައިމަންޑް ޕްރިންސެސް" ގައި ދަތުރުކުރި މީހުންނެވެ.

ދިވެހިން ޢާންމުކޮށް ގޮސް އުޅޭ އިންޑިއާގެ ކެރަލާ ސްޓޭޓުން 5 މީހަކު ނޮވެލް ކޮރޯނާވައިރަސް( ކޮވިޑް-19) އަށް ޕޮޒިޓިވްވެއްޖެއެވެ.

ކެރަލާ ސްޓޭޓުގެ އިސް މަސްއޫލުވެރިންނާއި ޙަވާލާދީ އިންޑިއާގެ މީޑިއާތަކުން ރިޕޯޓުކުރާ ގޮތުގައި، ޕޮޒިޓިވްވި މީހުންގެ ތެރެއިން 3 މީހުންނަކީ އަމިއްލަ ބޭނުމުގައި އިޓަލީއަށް ދަތުރުކޮށްފައި އެނބުރި އައި މީހުންނެވެ. އަނެއް 2 މީހުންނަކީ ޢާއިޅި ގޮތުން އެމީހުންނާއި ގުޅުން އޮންނަ ދެމީހުން ކަމަށެވެ. އިޓަލީއަށް ފަހު އިންޑިއާއަށް އައުމުގެ ކުރިން މި 3 މީހުން ދޯހާއަށާއި، ޤަތަރައްވެސް ވަނީ ދަތުރުކޮށްފައެވެ. އަދި އެނބުރި ކޮޗިން އެއަރޕޯޓަށް އައިސްފައިވަނީ ފެބްރުއަރީ މަހުގެ 29 ވަނަ ދުވަހު ކަމަށާއި، އެއަށްފަހު އެމީހުން ދަތުރުކުރި ތަންތަނުގެ ތަފުޞީލު އަދި ހާމަކޮށްފައި ނުވާކަމަށް އިންޑިއާގެ ރިޕޯޓުތައް ބުނެއެވެ. މި 3 މީހުންނަށް ވައިރަސް ޖެހިފައިވާކަން ހާމަވެފައިވަނީ އާއިލާގެ ދެމީހުން ހުން އައިސްގެން ޑޮކްޓަރަށް ދއްކި ހިސާބުން، ހޮސްޕިޓަލުން ހޯދި މަޢުލޫމާތުގެ އަލީގައެވެ.

މި 5 މީހުން މިހާރު ކަރަންޓީންކޮށްގެން ފަރުވާދެމުންދާއިރު، މި 2 މީހުން ދަތުރުކުރި ޤަތަރު އެއަރވޭސްގެ ފްލައިޓް ކިއުއާރް126 އާއި ކިއުއާރް514 އިން ދޯހާއަށާއި ކޮޗިންއަށް ދަތުރުކުރި މީހުން އަވަހަށް ކަމާއި ބެހޭ ފަރާތްތަކައް ރިޕޯޓުކުރުމަށް ކެރަލާ މައިސަރުކާރުން ވަނީ އިޢުލާންކޮށްފައެވެ.

ކެރަކާ ސިޓީން ވައިރަސްއަށް އަލަށް ޕޮޒިޓިވްވީ މީހުންނާއެކު، އިންޑިއާގައި މިހާރު ވައިރަސް ޖެހުނު މީހުންގެ އަދަދު ވަނީ 39 އަށް އަރާފައެވެ.

ޗައިނާގެ ޝިންހުއާ ނިއުސް އޭޖެންސީން ރިޕޯޓުކުރާގޮތުގައި، ނޮވެލް ކޮރޯނާވައިރަސް ޖެހުނު އުމުރުން 100 އަހަރުގެ މީހަކު ފަރުވާދިނުމަށް ފަހު ހޮނިހިރު ދުވަހު ވަނީ ގެއަށް ދޫކޮށްލާފައެވެ. މިއީ މިހާތަނަށް އައިއިރު ވައިރަސް ޖެހުނު މިހުންގެ ތެރެއިން ރަނގަޅުވެގެން ގެއަށް ދޫކޮށްލި އެންމެ ދޮށީ އުމުރުގެ މީހާއެވެ.

1920 ވަނަ އަހަރުގެ ފެބްރުއަރީ މަހު ޗައިނާއަށް އުފަންވީ މިމީހާ ވައިރަސްއަށް ޕޮޒިޓިވްވެގެން ފަރުވާ ދޭން ފެށި ފެބްރުއަރީ މަހުގެ 24 ވަނަ ދުވަހެވެ. އޭނާއަކީ، މީގެކުރިން ލޭމައްޗަށް ދިއުމާއި، ހިތުގެ ބައްޔަކަށް ފަރުވާ ހޯދަމުން އައިމީހެކެވެ.

ހުބެއި ޕްރޮވިންސްގެ މެޓަރނިޓީ އެންޑް ޗައިލްޑް ހެލްތު ކެއަރ ހޮސްޕިޓަލުން ފަރުވާ ހޯދި މިމީހާއާއެކު އިތުރު 80 މީހުން މިއަދު ވަނީ ފަރުވާއަށް ފަހު ގެއަށް ދޫކޮށްލާފައެވެ.

ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙު ދާދި ދެންމެއަކު ކުރެއްވި ޓްވީޓެއްގައި ވިދާޅުވެފައިވަނީ، ކޮވިޑް-19 އާއި ގުޅިގެން ރައްޔިތުންގެ ސަލާމަތާއި، ރައްކާތެރިކަމަށް ކުރަން ޖެހޭ ހުރިހައި ކަމެއް ސަރުކާރުން ކުރަމުން ގެންދާކަމަށެވެ. އަދި ރައްޔިތުން މިދަނޑިވަޅުގައި، ކަންބޮޑުވުމާއި ހާސްކަމުގެ ތެރެއަށް ނުވެއްޓި ޑޮކްޓަރުންނާއި، ހެލްތު ޕްރޮޓެކްޝަން އޭޖެންސީ(އެޗްޕީއޭ) ގެ ލަފަޔާއި އިރުޝާދުތަކައް ޢަމަލު ކުރުމަށް ރައީސުލްޖުމްހޫރިއްޔާ ވަނީ އިލްތިމާސްކުރައްވާފައެވެ.

މިހާރު ދުނިޔޭގައި ފެތުރެމުންދާ ނޮވެލްކޮރޯނާ ވައިރަސް (ކޮވިޑް-19) އާއި ގުޅިގެން ރާއްޖޭގެ ހާލަތާއި ގުޅޭ މައުލޫމާތު ދޭން ހާއްސަ ސްޕޯކްސްޕަރސަން އަކަށް ރައީސް އޮފީހުގެ ކޮމިއުނިކޭޝަންސް އަންޑަ ސެކްރެޓަރީ މަބްރޫކް އަޒީޒް ހަމަޖައްސައިފިއެވެ.

މިކަން ސަރުކާރުން މިއަދު ވަނީ ޢާންމުކޮށް އިޢުލާންކޮށްފައެވެ.

ކޮވިޑް-19 އާ ގުޅިގެން މިހާތަނަށް 125،000 އަށް ވުރެ ގިނަ ކެންސަލޭޝަން އައިސްފައިވާ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.

ޓޫރިޒަމް ސިނާއަތުގެ ހާލަތު އަންގައިދޭން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އަލީ ވަހީދު ވަނީ ޓޫރިޒަމް ސިނާއަތަށް ބޮޑު ލޮޅުމެއް އަންނާނެކަން ކުރިންވެސް އެނގޭކަން ހާމަކުރެއްވިއެވެ. އަދި މިއީ އަރައިނުގަނެވޭނެ ހާލަތެއް ނޫންކަން ފާހަގަކުރައްވާ، މި ހާލަތުން އަރައިގަންނާނެ ކަމުގެ ޔަގީންކަން ދެއްވިއެވެ.

މިހާތަނަށް އަޅާފައިވާ ފިޔަވަޅުތަކާއި ގުޅޭ އެންމެ ފަހުގެ މައުލޫމާތު ދެއްވަމުން، ވިދާޅުވީ ޓޫރިޒަމް ދާއިރާގެ ހުރިހާ ސްޓޭކްހޯލްޑަރުންނާ މަޝްވަރާކުރެވިގެން ކުރެވެމުންދާ ކަމަށެވެ. އަދި މި ދާއިރާގައި ތިބި ހުރިހާ ފަރާތްތަކަށް ދޭންޖެހޭ އެއްބާރުލުން މިނިސްޓްރީން ދެމުން ގެންދާނެ ކަމަށް ވިދާޅުވިއެވެ.

ރާއްޖެއިން ކޮވިޑް-19 އަށް ޕޮޒިޓިވްވެފައިވާ ދެ މީހަކު ފެނުނު ކަމުގައިވީ ނަމަވެސް، ރާއްޖެ އެއްކޮށް ލޮކްޑައުންއަކަށް ނުދާނެ ކަަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ކޮވިޑް-19 އާ ގުޅިގެން ސަރުކާރުން ގެންގުޅުއްވާ ސިޔާސަތުތަައް ސާފުކޮށްދެއްވަމުން، އަލީ ވަހީދު ވިދާޅުވީ ރާއްޖެ އެއްކޮށް ބަންދުކުރުމަކީ ކުރެވޭނެ ކަމެއް ނޫންކަމަށެވެ. އަދި އިގްތިސާދު އެއްކޮށް ފުނޑުފުނޑު ކޮށްލުމަކީ ކުރެވޭނަ ކަމެއް ނޫން ކަމަށާއި، ލޮކްޑައުން ކުރުމަކީ ރާއްޖޭގެ އިގްތިސާދަށް އުފުލޭނެ ބުރައެއް ނޫންކަމަށް ވިދާޅުވިއެވެ.

ފާސް ނެތް މީހުން އިންދިރާ ގާންދީ މެމޯރިއަލް ހޮސްޕިޓަލުގައި އެދުމަތި ކުރެވިފައި ތިބޭ ބަލިމީހުންނަށް ޒިޔާރަތްކުރުން ވަގުތީ ގޮތުން ހުއްޓާލައިފިއެވެ.

އެ ހޮސްޕިޓަލުން އާދިއްތަ ދުވަހު ނެރުނު ބަޔާނެއްގައި ބުނެފައިވަނީ މިހާރު ފެތުރެމުންދާ ކޮވިޑް-19 ގެ ސަބަބުން ރައްކާތެރިކަމުގެ ފިޔަވަޅެއްގެ ގޮތުން ހޮސްޕިޓަލުގައި އެދުމަތި ކުރެވިފައިވާ ބަލިމީހުންނަށް ނުރައްކާ ވެދާނެ ކަމަށް ފެންނާތީ އާއި، އެންމެންގެ ސަލާމަތާއި ރައްކާތެރިކަމަށްޓަކައި ހޮސްޕިޓަލުގެ ޞިއްޙީ މިންގަނޑުތައް ދެމެހެއްޓުމުގެ ގޮތުން 8 މާރޗް އިން ފެށިގެން ބަލި މީހުންނަށް ފާސް ނެތި ޒިޔާރަތްކުރުން ވަގުތީ ގޮތުން މެދުކަނޑާލާފައިވާ ކަމަށެވެ.

އެހެންނަމަވެސް ފާސް ލިބިފައިވާ ބަލިމީހާގެ އެހީތެރިޔާއަށް އަށް ބަލިމީހާއެކު މަޑުކުރެވޭނެ ކަމަށް އައިޖީއެމްއެޗުން ބުނެއެވެ. މީގެ އިތުރުން ފާސް ލިބިފައިވާ މީހުންގެ އިތުރުން އެހެން މީހުން ހޮސްޕިޓަލަށް ޒިޔާރަތް ކުރުމާއި, އެ ނޫން ވެސް ކަންކަމުގައި ކޮންމެހެން ހޮސްޕިޓަލަށް ދާން ނުޖެހޭނަމަ ނުދިޔުމަށް ވެސް އައިޖީއެމްއެޗުން ވަނީ އިލްތިމާސްކޮށްފައެވެ.

ރާއްޖެ ގެ ހުރިހާ ރަށެއްގައި ކޮންމެ ފަރުޟު ނަމާދެއްގައި ޤުނޫތު ކިޔަން މިނިސްޓްރީ އޮފް އިސްލާމިކް އެފެއަރޒުން ނިންމައިފިއެވެ.

އިސްލާމިކް މިނިސްޓްރީން ކޮށްފައިވާ ޓްވީޓެގައި ވަނީ ކޮރޯނާ ވައިރަސް ފަދަ ނުރައްކާތެރި ބަލިތަކުން ރައްކާތެރިވުމަށް އެދި ކުރަމުން އަންނަ ޤުނޫތު ނާޒިލާ އާދިއްތަ ދުވަހުން ފެށިގެން ކޮންމެ ފަރުޟު ނަމާދެއްގައި ކިޔަވާގޮތަށް ހަމަޖައްސާފައިވާ ކަމަށެވެ.

ދުނިޔޭގައި އުފެދޭ ބަލިމަޑުކަމައި ނުރައްކާތެރި ރޯގާ ތަކާއި ގުޅިގެން މީގެ ކުރިންވެސް ރާއްޖޭގައި ފަރުޟު ނަމާދުތަކުގައި ޤުނޫތު ނާޒިލާ ކިޔާފައިވެއެވެ.

ނުރައްކާތެރި ބަލިތަކުން ރައްކައުތެރިވުމަށް ޤުނޫތު ނާޒިލާ ކިއުމަށް ނިންމާފައި މިވަނީ ރާއްޖޭގައި މަސައްކަތް ކުރާ ދެ ބިދޭސީއަކު ކޮރޯނާ ވައިރަސް އަށް ޕޮޒިޓިވްވެފައިވާކަން އިޢުލާންކޮށްފައި ވަނިކޮށެވެ.

މިހާރު ދުނިޔޭގައި ހަލުވި ކަމާއެކު ފެތުރެމުންދާ ކޮރޯނާ ވައިރަސް ނުވަތަ ކޮވިޑް-19 ގެ ނުރައްކާ ރާއްޖެއަށް އައުމާއެކު މޯލްޑިވްސް ނެޝަނަލް ޔުނިވަރސިޓީ (އެމްއެންޔޫ)ގެ ދަސްވެނިވުން ފަސްކުރުމަށް ނިންމައިފިއެވެ.

އެމްއެންޔޫގެ ދަސްވެނިވުން ބޭއްވުމަށް ކުރިން ހަމަޖެހިފައި އޮތީ 8 މާރޗް ވާ އާދިއްތަ ދުވަހުގެ ރޭގައެވެ.

މިކަމާއި ގުޅިގެން އެމްއެންޔޫއިން ބުނީ މާރޗް ދަސްވެނިވުން ދެން އޮންނާނެ ވަކި ތާރީޚެއް ފަހުން އަންގާނެ ކަމަށެވެ. އަދި ފަސްކުރެވިފައިވާ ދަސްވެނިވުމުގައި ބައިވެރިވާން ބޭނުން ނުވާ ކުދިންނަށް ދަރިވަރުންގެ ޚިދުމަތްތަކާ ބެހޭ ބައިން ދަސްވެނިވުމުގައި ބައިވެރިވާން ދެއްކި ފައިސާ އަނބުރާ ލިބޭނެ ކަމަށް ވެސް އެމްއެންޔޫ އިން ބުންޏެވެ.

އެމްއެންޔޫއިން ބުނީ ސެޓިފިކެޓަށް އެދޭ ކުދިންނަށް ސެޓިފިކެޓް ރަޖިސްޓްރަރ ގެ އޮފީހުން 11 މާރޗް 2020 ވަނަ ދުވަހުގެ 14:00ގެ ކުރިން ލިބޭނެ ކަމަށާއި، ފަސްކުރެވުނު ދަސްވެނިވުމުގައި ބައިވެރިވުމަށް އެދިފައިވާ ދަސްވެނިންނަށް ސެޓިިފިކެޓް ލިބުނު ނަމަވެސް ބައިވެރިވުމުގެ ފުރުޞަތު ދެވޭނެ ކަމަށެވެ.

ވިއެޓްނާމުގެ ހެލްތު މިނިސްޓްރީއާއި ޙަވާލާދީ ބޭރުގެ މީޑިއާތަކުން ރިޕޯޓުކުރާގޮތުގައި، މިއަދު އެޤައުމުން އިތުރު 9 މީހުން ވަނީ ވައިރަސްއަަށް ޕޮޒިޓިވްވެފައެވެ. މިއާއެކު، އެޤައުމުގައި ވައިރަސް ޖެހުނު މީހުންގެ އަދަދު ވަނީ 29 އަށް އަރާފައެވެ. މިއަދު ވިއެޓްނާމުން ވައިރަސްއަށް ޕޮޒިޓިވްވީ މީހުންގެ ތެރޭގައި 8 ފަތުރުވެރިއަކު ހިމެނެއެވެ.

ވިއެޓްނާމުގެ ހެލްތު މިިނިސްޓްރީން މިއަދު އާންމުކުރި މައުލޫމާތުތަކަށް ބަލާއިރު، އެންމެ ފުރަތަމަ ވައިރަސްއަށް ޕޮޒިޓިވްވީ 16 މީހުންނަށް އަދިވެސް ދަނީ ފަރުވާދެމުންނެވެ. އަދި ވައިރަސްއަށް ޝައްކުކުރެވޭ 101 މީހުން ކަރަންޓީންކޮށްގެން ފަރުވާދެމުންދާއިރު، ސަރަވައިލެންސް ޕްރޮގުރާމެއްގެ ދަށުން އިތުރު 23،228 މީހުން ދަނީ އެމިނިސްޓްރީން ދަނީ މޮނިޓަރ ކުރަމުންނެވެ.

އީރާނު ސަރުކާރުގެ މަސްދަރުތަކާއި ޙަވާލާދީ ބޭރުގެ މީޑިއާތަކުން ރިޕޯޓުކުރާގޮތުގައި، ފާއިތުވެދިޔަ 24 ގަޑިއިރުގެތެރޭގައި އީރާނުން 49 މީހުން ވަނީ ވައިރަސްއަށް ފަރުވާދެމުންދަނިކޮށް މަރުވެފައެވެ.

މިއާއެކު، އީރާނުގައި ވައިރަސްގައި މަރުވީ މީހުންގެ ޖުމުލަ ޢަދަދަކީ 194 އެވެ.

ފާއިތުވެ ދިޔަ 24 ގަޑިއިރުގެ ތެރޭގައި އީރާނުގައި 743 މީހުން ވަނީ އަލަށް ކޮވިޑް-19 އަށް ޕޮޒިޓިވްވެފައެވެ.

މިއާއެކު، ވައިރަސްއަށް ޕޮޒިޓިވްވީ މީހުންގެ ޖުމުލަ އަދަދަކީ 6،566 އެވެ.

ލެޓިން އެމެރިކާގެ ޤައުމަކުން ފުރަތަމަ ފަހަރަށް ކޮވިޑް-19 ޖެހިގެން މީހަކު މަރުވެއްޖެއެވެ.

ބައިނަލްއަޤުވާމީ މިޑިއާތަކުން ރިޕޯޓުކުރާގޮތުގައި، މިއަދު ކޮވިޑް-19 ގައި މަރުވެފައިވަނީ ލެޓިން އެމެރިކާގެ ޤައުމެއް ކަމަށްވާ އާޖެންޓީނާއިންނެވެ.

އާޖެންޓީނާގެ އިތުރުން ދެން މިވައިރަސް ރިޕޯޓުކޮށްފައިވަނީ ލެޓިން އެމެރިކާގެ ޤައުމުތަކުގެ ތެރެއިން ޕެރެގުއޭއި، ކޮލޮމްބިއާއި، ޗިލީ އަދި ޕޭރޫއެވެ. މިއިން އެއްވެސް ޤައުމަކުން އަދި ވައިރަސްގައި މީހަކު މަރުވެފައެއް ނުވެއެވެ.