އަޅުން ކުރާ ހެޔޮ އަމަލު، މާތް ﷲ ގަބޫލުކުރެއްވިކަމުގެ ނިޝާންތަކެއްވާ ކަމަށް ހުކުރު ޚުތުބާގައި ބުނެފިއެވެ.

''ހެޔޮ އަމަލުކުރުން މަތީ ދެމި ތިބުމުގެ މުހިންމުކަން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ބައެއް މީހުން ރަމަޟާން މަހު ނަމާދުގެ ޖަމާއަތަށް ރައްކާތެރިވެ، ގިނަގިނައިން ޤުރްއާން ކިޔަވައި، މީސްތަކުންނަށް ހެޔޮފޯރުވައި އުޅުމަށްފަހު، ރަމަޟާން މަސް ނިމުމުން ކަންކަމަށް ފަރުވާކުޑަކޮށް، ފާފަތަކަށް އަރައިގަންނަ ކަމަށެވެ. މިއީ މީހަކު އެތައް ޚަރަދަކާއި، މަސައްކަތެއް ކޮށްގެން، ރަނގަޅު ބިނާއެއް ކުރުމަށްފަހު، އެ ބިނާ ފުނޑުފުނޑުކޮށްލުން ފަދަ ކަމެއް ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ރަމަޟާން މަހަކީ މުޅި އަހަރުތެރޭގައި ކުރެވުނު ފާފަތައް ފޮހެލުމަށް ﷲ ދެއްވާފައިވާ ރަނުގެ ފުރުސަތެއް ކަމަށާއި، ރަމަޟާން މަސް ނިމުމަށް ފަހުވެސް ހެޔޮއަމަލު ކުޅައުން މަތީ ދެމިތިބެން ޖެހޭ ކަމަށެވެ. ޚުތުބާގައި ބުނީ އަޅުން ކުރާ ހެޔޮ އަމަލު، ﷲ ގަބޫލުކުރެއްވިކަމުގެ ނިޝާންތަކެއްވާ ކަމަށެވެ. އެއީ، އެ އަމަލުތައް ކުރުން ދޫކޮށްނުލައި، ފާފަތަކަށް އަރައި ނުގަނެ ހުރުމާއި، ކުރެވުނު ހެޔޮ އަމަލުތައް ﷲގެ ޙަޟްރަތުގައި މަގްބޫލު އަމަލަކަށް ނުވެ ހިނގައިދާނެތީ ބިރުވެތިވުމާއި، އިތުރު ހެޔޮ އަމަލުތައް ކުރުންމަތީ ދެމިހުރުމުގެ ތައުފީގު ލިބުމާއި، ހެޔޮ އަމަލާ މެދު ބޮޑާވުމުގެ ބަދަލުގައި، އެ އަމަލުގެ މަދުކަން އިހްސާސް ވުމާއި އަދި ހެޔޮ އަމަލަށާއި ޞާލިހުންނަށް ލޯބިޖެހި، ފާފަތަކަށާއި ފާސިގުންނަށް ނުރުހުންތެރިކަން އުފެދުމެވެ.

ޚުތުބާގައި ބުނީ ރަމަޟާން މަސް އަލްވަދާއުކީ ކަމުގައިވިޔަސް އިސްލާމް ދީނުގައި ލައްވައިފައިވާ ހެޔޮކަމުގެ ފުރުޞަތުތައް ވަރަށް ގިނަ ކަމަށެވެ. އޭގެތެރެއިން އެންމެ މުހިއްމު އެއް ފުރުސަތަކީ ޝައްވާލުމަހުގެ ހަ ރޯދަ ކަމަށް ޚުތުބާގައި ބުނެފައިވެއެވެ.

ސުންނަތް ރޯދައިގެ އިތުރުން ވެސް ހެޔޮކަމުގައި މެދުނުކެނޑި ދެމިތިބުމަށް ދަމު ނަމާދުކުރުމާއި، ކޮންމެ ދުވަހަކު ވެސް ގުރްއާނުން މިންވަރެއް ކިޔެވުމާއި، ކެރި ކުޅަދާނަވީ މިންވަރަކުން ﷲ ގެ މަގުގައި ހޭދަކުރުމާއި، ގާތް ތިމާގެކަމުގެ ގުޅުން ދެމެހެއްޓުމާއި އަވަށްޓެރިންނާއި، މައިންބަފައިންގެ ހައްގުތަކާއި، އަނބި ދަރީންގެ ހައްގުތައް އަދާކުރުން ފަދަ ކަންތައްތަކަށް ރައްކާތެރިވުމަށް ޚުތުބާގައި ނަސޭހަތްތެރިވެފައިވެއެވެ.

އިސްލާމް ދީނަކީ އެއްބަޔަކު އަނެއް ބަޔަކަށް އެހީތެރިވުމުގެ ދީންކަން ފާހަގަކޮށް ޚުތުބާގައި ބުނީ އިސްލާމް ދީނަކީ ސަލާމަތާއި، އަމާން ކަމުގެ ދީން ކަމަށާއި، އަނިޔާވެރިކަމާއި، ހައްދު ފަހަނަ އެޅުމާ ދެކޮޅު ދީން ކަމަށެވެ. އަދި މީސްތަކުންގެ ފުރާނަޔާއި މުދަލަށް ގެއްލުންދިނުން ފަދަ ހަރުކަށި، އަނިޔާވެރި، ޢަމަލުތަކުން އިސްލާމް ދީން ބަރީއަވެގެންވާ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ނިރުބަވެރި އަމަލުތައް ހިންގާ މީހުން އިންސާފުގެ ކުރިމައްޗަށް ގެނެސް އެ މީހުންނަށް ހަރުކަށި އަދަބު ދެވިގެން މެނުވީ މުޖުތަމައުގެ އަމާން ކަމާއި، ހަމަޖެހުން ދެމިއެއް ނޯންނާނެ ކަމަށެވެ. އެހެންކަމުން މުޖުތަމައުގެ އަމާންކަމާއި، ރައްކާތެރިކަން ދެމެހެއްޓުމަށް މަސައްކަތްކުރުމަކީ، އެންމެންގެ ޒިންމާއެއް ކަމަށް ޚުތުބާގައި ބުނެފައިވެއެވެ.