ޗައިނާގެ އެންމެ ބޮޑު ޖައްވީ ރޮކެޓްގެ ބައިތައް ރާއްޖޭގެ ހުޅަނގުން، ކަނޑަށް ވެއްޓިފައިވާ ކަމަށް އެގައުމުން ބުނެފިއެވެ.

މި ރޮކެޓްގެ ބައިތައް ރާއްޖެ އޮންނަ ސަރަހައްދަށް ވެއްޓުމާ ގުޅިގެން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)ން ބުނީ މިހާރު އެ ރޮކެޓްގެ ބައިތައް ވެއްޓުނު ކަމަށް ބެލެވޭ ސަރަހައްދުގައި ކޯސްޓް ގާޑުގެ ޓީމެއް ހަރަކާތެރި ވަމުން ދާ ކަމަށެވެ.

އަދި މެދުރާއްޖެތެރޭގެ އަތޮޅުތައް ހިމެނޭ ސަރަހައްދު ބަލަމުން ގެންދާ ކަމަށް ވެސް އެމްއެންޑީއެފުން ބުނެއެވެ.

މިކަމާ ގުޅިގެން ޗައިނާއިން ބުނީ ރޮކެޓްގެ ބޮޑެތި އަދި ގިނަ ބައިތައް ޖައްވުގެ ތެރޭގައި އަނދައިގެން ގޮސްފައިވާ ކަމަށް ބެލެވޭ ކަމަށެވެ.

އޭޕްރީލް މަހުގެ 29 ވަނަ ދުވަހު ޖައްވަށް ފޮނުވާލި ލޯންގް މާޗް ބީ5 ވައި2 ރޮކެޓުގެ ނަމުން ނަންދީފައިވާ މި ރޮކެޓަކީ ދިގު މިނުގައި 108 ފޫޓު އަދި ބަރުދަނުގައި 40،000 ޕައުންޑް ހުންނަ ރޮކެޓެކެވެ.