ކޮވިޑް-19އާ ގުޅިގެން މާލެސިޓީގައި ކާފިއު ހިންގި ނަމަވެސް ދަމުނަމާދަށް ދެވޭނެ ކަމަށް އިސްލާމިކް މިނިސްޓްރީން ބުނެފިއެވެ.

އިސްލާމިކް މިނިސްޓްރީން ބުނީ ރައްކާތެރިކަމުގެ ފިޔަވަޅުތަކާއެކު ފައިމަގުގައި މިސްކިތަށް ދަމުނަމާދަށް ދިއުމުގެ ފުރުސަތު ފަހިވެފައިވާ ކަމަށެވެ. މިއީ ރޯދަ މަހުގެ ފަހު ދިހައެއްގެ ދުވަސްތައް ކަމުން ތަރާވީސް ނަމާދާއި ދަމުނަމާދުގެ ޖަމާއަތުގައި ބައިވެރިވުމަށް ގިނަ ބަޔަކު މިސްކިތަށް ދެއެވެ. ނަމަވެސް ކާފިއުގެ ވަގުތަށް ވުމާއެކު މިސްކިތަށް ދާން ޖެހޭނީ ފައިމަގުގައެވެ.

ކޮވިޑް-19ށް ގިނަ ބަޔަކު ޕޮޒިޓިވްވަމުންދާތީ މިހާރު ވަނީ ހަރުކަށި ފިޔަވަޅުތަކެއް އަޅާފައެވެ. އެގޮތުން ބުރާސްފަތި ދުވަހުގެ ރޭ 9:00ން ފަތިހު 4:00ށް ކާފިއު ހިންގަން ވަނީ ނިންމާފައެވެ. މިސްކިތަށް ދާ މީހުން މުސައްލަ ގެންދިއުމަށާއި އިޖްތިމާއީ ގައިދުރު ކަމަށް ޚާއްސަ ސަމާލުކަމެއް ދިނުމަށް ވަނީ އިލްތިމާސްކޮށްފައެވެ.

މާލޭސިޓީގެ 23 މިސްކިތެއްގައި ޖަމާއަތުގައި ދަމުނަމާދު ކުރެއެވެ. ދަމުނަމާދުގެ ޖަމާއަތް ފަށަނީ މެންދަމު ދޭއް ޖަހާއިރު އެވެ.

ދަމުނަމާދަކީ، އިޝާނަމާދަށްފަހު ކިތަންމެ ކުޑަ ހިނދުކޮޅަކުނަމަވެސް ނިދާލުމަށްފަހު ތެދުވެ، ފަތިސްވަގުތުގެ ކުރިން ދެރަކުޢަތުން، ދެރަކުޢަތުން ސަލާމްދެމުން ކުރާ ނަމާދެކެވެ. މިއީ ގަދަވެގެންވާ ސުންނަތް ނަމާދެކެވެ. މި ނަމާދަކީ ހަމައެކަނި ރަމަޟާންމަހު ނުވަތަ ރަމަޟާން މަހުގެ ފަހުދިހައިގައި ކުރާ ނަމާދެއް ނޫނެވެ. އެހެނަނަމަވެސް ރަމަޟާން މަހަކީ މަތިވެރި މައްސަރަކަށްވެފައި، ރަމަޟާން މަހުގެ އަޅުކަމުގެ ސަވާބާއި ދަރުމައިގެ އިތުރުކަމާއެކު ރަމަޟާންމަހު ދަމުނަމާދު ކުރުމަށް މުސްލިމުން ދޭ ސަމާލުކަން އިތުރުކުރެއެވެ. އަދި ރަމަޟާން މަހުގެ ފަހުދިހައަކީ، މިމަހުގެ އެހެން ދުވަސްތަކަށްވުރެ ހެޔޮކަން ބޮޑު، ހަމަ އެހެންމެ އެ ރެއެއްގައި ކުރެވޭ އަޅުކަން އެތައްހާސް ގުނައެއް އިތުރުވެގެންދާ ލައިލަތުލްޤަދުރި ވިލޭރޭ ހިމެނެނީ ރަމަޟާންމަހުގެ ފަހުދިހައިގައި ކަމުގައި ވުމަކީވެސް ރަމަޟާން މަހުގެ ފަހުދިހައިގައި ދަމުނަމާދުކުރުމަށް އިސްކަންދޭ ކަމެކެވެ. ކޮންމެ ރަމަޟާން މަހެއްގައި މާލޭގެ އިތުރަށް ރާއްޖޭގެ އެކި ރަށްރަށުގައި ބޮޑު ޖަމާއަތް ހަދައިގެން ދަމުނަމާދުކޮށް އުޅެއެވެ.