ކުޅުދުއްފުށި ސިޓީން ފްލޫ ކްލިނިކަށް ދެއްކި ތިން މީހަކު ކޮވިޑް-19 އަށް ޕޮޒިޓިވްވެ، އެ ސިޓީ މޮނިޓަރިންއަށް ލައިފިއެވެ.
ފްލޫ ކްލިނިކަށް ދެއްކި ތިން މީހަކު ޕޮޒިޓިވްވުމާއި ގުޅިގެން މިހާރު ގެންދަނީ ކޮންޓެކްޓް ޓްރޭސިންގެ މަސައްކަތްތައް ކުރަމުންނެވެ. އަދި ބަލީގެ އަލާމާތްތައް ފެންނަނަމަ ލަސްނުކޮށް އެކަން ރިޕޯޓުކޮށްދިނުމަށް ވެސް ވަނީ އެދިފައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ކޮވިޑް-19 އާ ގުޅިގެން، ސިއްހީ ގޮތުން އިތުރަށް ބަލަންޖެހޭ ކަންކަން ބެލުމަށް ކުޅުދުއްފުށި ސިޓީ މޮނިޓަރިންގެ ހާލަތަށް ގެނެސްފައިވާ ކަމަށެވެ. ރަށުގައި މިވަގުތު ތިބި އެއްވެސް މީހަކު އެޗްޕީއޭއިން ވަކިގޮތެއް އަންގަންދެން ރަށުން ފޭބުމާއި، ހުއްދަނެތި އެއްވެސް މީހަކު ރަށަށް އެރުން އެޗްޕީއޭއިން ވަނީ މަނާކޮށްފައެވެ.
ކުޅުދުއްފުށި ސިޓީ މޮނިޓަރިންގެ ހާލަތަށް ގެނެސްފައިވަނީ އާދިއްތަ ދުވަހުގެ މެންދުރުފަހު 3:28 ގައެވެ.
ކުޅުދުއްފުށި މޮނިޓަރިންއަށްލުމާއި ގުޅިގެން އެޖެންސީން އަންގާ ގޮތެއްގެމަތިން، ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަންގާ އެންގުންތަކާއި އަދި ހިންގާ ހަރަކާތްތަކަށް އެއްބާރުލުން ދިނުމަށް އެޗްޕީއޭއިން އެދިފައިވެއެވެ.
ކުޅުދުއްފުށި ސިޓީ މޮނިޓަރިންގެ ހާލަތަށް ގެނެސްފައިވާއިރު، އައްޑޫ ސިޓީ ވެސް ވަނީ މޮނިޓަރިންއަށް ލާފައެވެ. އަތޮޅުތެރޭގެ ގިނަ ރަށްތަކަށް ކޭސްތައް ފެންނަމުންދާ މިދަނޑިވަޅުގައި މިހާތަނަށް 22 ރަށަކުން ވަނީ ކޭސްތައް ފެނިފައިވެއެވެ.
