ފާއިތުވި ދެ އަހަރު މީހުން ބިނާ ކުރުމަށް ގިނަ މަސައްކަތްތަކެއް ކުރެވުނު: މަބްރޫކް
އެންމެ ގިނަ މީހުންނަށް ލޯނު ދޫކޮށްފައިވަނީ ހޯލްސޭލް އަދި ރީޓެއިލް ދާއިރާއިން
ރައީސުލްޖުމްހޫރިއްޔާ އޮފީހުގެ ސްޕޯކްސްޕަރސަން މުހައްމަދު މަބްރޫކް އަޒީޒު
ރާއްޖޭގެ އެކި ރަށްރަށުގައި ވިޔަފާރި ހިންގައި ކުރިއަރުވައި މަސައްކަތްތެރިން ބިނާ ކުރުމަށް މި ސަރުކާރުން ގިނަ މަސައްކަތްތަކެއް ކުރެވިފައިވާކަމަށް ރައީސް އޮފީހުގެ ތަރުޖަމާނު މުހައްމަދު މަބްރޫކު އަޒީޒް ވިދާޅުވެއްޖެއެވެ.
މަސައްކަތްތެރިންގެ ދުވަހާއި ގުޅިގެން ރާއްޖެއެމްވީއާ ވާހަކަ ދައްކަވަމުން މަބްރޫކު ވިދާޅުވީ މަސައްކަތްތެރިން ބިނާ ކުރުމަށްޓަކައި ވަޒީފާތައް އުފެއްދުމަށް ސަރުކާރަށް ގިނަ މަސައްކަތްތަކެއް ކުރެވިފައިވާ ކަމަށެވެ. އެގޮތުން މިއަހަރުގެ ތެރޭގައި އެކަނިވެސް ފަތުރުވެރިކަމުގެ ދާއިރާއިން އިތުރު 9000 ވަޒީފާ އުފެއްދޭނެ ކަމަށް ލަފާކުރެވޭކަމަށް ވިދާޅުވިއެވެ.
މަބްރޫކް ވިދާޅުވީ މިހިނގާ އޭޕްރީލް މަހުގެ 15 ވަނަ ދުވަހުގެ ނިޔަލަށް 721 ފަރާތަކަށް 906 މިލިއަން ރުފިޔާގެ ލޯނުގެ އެހީ އެޕްރޫވް ކުރެވިފައިވާ ކަމަށެވެ.
ލޯނުގެ ތަފްސީލުތަކަށް ބަލާއިރު އެންމެ ގިނަ މީހުންނަށް ލޯނު ދޫކޮށްފައިވަނީ ހޯލްސޭލް އަދި ރީޓެއިލް ދާއިރާއިންނެވެ. އެ ދާއިރާއިން 1266 ލޯނު ދޫކޮށްފައިވާއިރު މަސްވެރިކަމުގެ ދާއިރާއިން ވަޒީފާތައް އުފެއްދޭނެ ގޮތަށް 107 މީހަކަށް ލޯނު ދޫކޮށްފައިވެއެވެ. އަދި ފަތުރުވެރިކަމުގެ ދާއިރާއިން 144 މީހަކަށް ލޯނު ދޫކޮށްފައިވާއިރު ދަނޑުވެރިކަމާއި ކޮންސްޓްރަކްޝަން ދާއިރާއިން ކޮންމެ ދާއިރާއަކުންވެސް 35 މީހަކަށް ލޯނު ދޫކޮށްފައިވެއެވެ. މިއީ ހައްތާވެސް ރަށްރަށުގައި ވިޔަފާރި ހިންގައި ކުރިއަރުވައި މީހުން ބިނާ ކުރެވޭގޮތަށް ދޫކޮށްފައިވާ ލޯނު ކަމަށް މަބްރޫކު ވިދާޅުވިއެވެ.
މިއީ ރާއްޖޭގެ ހުރިހާ ކަންކޮޅުތަކަށް އަމާޒުކޮށްގެން ކުރިއަށް ގެންދިޔަ ކަމެއްކަން ފާހަގަ ކުރައްވަމުން މަބްރޫކު ވިދާޅުވީ ރާއްޖޭގެ ހުރިހާ އަތޮޅެއްވެސް ލޯނު އެހީގައި ހިމެނިފައިވާނެ ކަމަށެވެ. ހުރިހާ އަތޮޅަކުން 143 ރަށެއްގައި ވިޔަފާރި ހިންގައި ކުރިއެރުވުމަށް ލޯނު ދޫކޮށްފައިވާއިރު އެކަމުގެ ސަބަބުން ފާއިތުވި 2 އަހަރުގެ ތެރޭގައި އެކަނިވެސް ގާތްގަނޑަކަށް 4300ށް ވުރެ ގިނަ ވަޒީފާ އުފެދިފައިވާކަމަށް މަބްރޫކު ވިދާޅުވިއެވެ.
މީހުން ބިނާ ކުރުމަށް ސަރުކާރުން ކޮށްފައިވާ މަސައްކަތްތަކުގެ ތެރެއިން "ސްކިލްސް ފޯރ އަ ރެސިލިއަންޓް ވާރކްފޯސް" އަށް އަލިއަޅުވާލައްވަމުން މަބްރޫކު ވިދާޅުވީ، މިއީ ސަރުކާރުން މިދިޔަ އަހަރު އިއުލާނުކޮށް އަހަރު ދުވަހުގެ މުއްދަތަށް ކުރިއަށްގެންދާ ޕްރޮގްރާމެއް ކަމަށެވެ. މި ޕްރޮގްރާމްގެ ދަށުންވެސް 1200 ޒުވާނުން ތަމްރީނު ކުރުމަށް ހަމަޖެހިފައިވާއިރު އޭގެ ތެރޭގައި ފަތުރުވެރިކަމުގެ ދާއިރާއާއި އައިސީޓީ އަދި ޓޫރިޒަމާ ގުޅުންހުރި އިމާރަތް ކުރުމުގެ ދާއިރާވެސް ހިމެނިފައިވެއެވެ.
މަބްރޫކު ވިދާޅުވީ މި ޕްރޮގްރާމްގެ ތެރެއިން ނިމިދިޔަ ހަފުތާގެ ތެރޭގައިވެސް 100 ދަރިވަރަކު ތަމްރީނުކޮށް ވަޒީފާގެ ބާޒާރަށް ނެރުމަށް ތައްޔާރު ކުރެވިގެންދާނެ ކަމަށެވެ.
