ރާއްޖޭގައި ދެވަނަ ޑޯޒް ޖަހަން ޖެހޭ އެކަމަކު ނުޖަހާ ތިބި 20،000 މީހުން އެބަތިބި ކަމަށް ހެލްތް އެމަރޖެންސީ އޮޕަރޭޝަން ސެންޓަރުން ހާމަކޮށްފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެލްތް މިނިސްޓްރީގެ ސްޓޭޓް މިނިސްޓަރ ޑރ. ޝާހު މާހިރު ވިދާޅުވީ ރާއްޖޭގައި ދެވަނަ ޑޯޒް ޖަހަން ފަށައި ވަކި މުއްދަތެއްގެ ތެރޭގައި ޑޯޒްތައް ފުރިހަމަ ކުރުމަށް އެދިފައިވީ ނަމަވެސް ދެވަނަ ޑޯޒް ފުރިހަމަ ނުކުރާ 20،000 މީހުން އެބަތިބި ކަމަށެވެ. އެ އެންމެން ޑޯޒުތައް ފުރިހަމަ ކުރުމަށް ޑރ ޝާހު ވަނީ އެދިވަޑައިގެންފައެވެ.
ހުރިހާ ބޭފުޅުން ވެސް ވެކްސިން ޖެއްސެވުމަށް އިލްތިމާސްކުރަން. މިއަދުގެ އެންމެ ފަހުގެ ޑާޓާއަށް ބަލާލި އިރު 20،000 މީހުން އެބަތިބި ދެވަނަ ޑޯޒަށް އެލިޖިބަލް ވެފައި ވެކްސިން ނުޖައްސަވާ. އެދެނީ ވީހާވެސް އަވަހަށް ވެކްސިން ޖެއްސެވުން.ހެލްތް މިނިސްޓްރީގެ ސްޓޭޓް މިނިސްޓަރ ޑރ. ޝާހު މާހިރު
ޑރ. ޝާހު ވިދާޅުވީ ކޭސްތައް އިތުރުވަމުން ދިޔަ ނަމަވެސް ވެކްސިނޭޝަންގެ ކަންކަން ދަނީ ރަނގަޅަށް ކަމަށެވެ. އަދި ވެކްސިން ޖެހޭ އާބާދީގެ ތެރެއިން ފުރަތަމަ ޑޯޒް 67 އިންސައްތަ މީހުން ޖަހާފައިވާ ކަމަށެވެ. ޖުމްލަ އާބާދީއަށް ބަލާނަމަ އާބާދީގެ 52 އިންސައްތައަށް ވެކްސިންގެ ފުރަތަމަ ޑޯޒް ޖަހާފައިވާ ކަމަށެވެ. ޑރ. ޝާހު ވިދާޅުވީ ވެކްސިން ޖެހި މީހުންގެ ތެރެއިން ދެވަނަ ޑޯޒް ގާތްގަނޑަކަށް 30 އިންސައްތަ މީހުންނަށް ދެވިފައިވާ ކަމަށެވެ.
ބައްޔަށް ލިބެން އޮތް ފަރުވާގެ ކަންކަން ވަރަށް ރަނގަޅަށް ކުރިއަށްދާ ކަމާއި ވެކްސިނޭޝަން ޕްރޮގްރާމްގެ ކަންކަން ވެސް ވަރަށް ރަނގަޅަށް ކުރިއަށްދާ ކަން ސްޓޭޓް މިނިސްޓަރ ފާހަގަ ކުރެއްވިއެވެ. މީގެއިތުރު.ން ދުނިޔޭގެ ނިސްބަތުން ބަލާނަމަ ވެކްސިނޭޝަން ޕްރޮގްރާމުގައި ރާއްޖެ އުޅެނީ ވަރަށް ކުރީގައި ކަމަށާއި އެންމެ ފަހުގެ ޑާޓާއަށް ބަލާލާއިރު ފުރަތަމަ ޑޯޒް ލިބުނު މީހުންގެ ނިސްބަތުން ރާއްޖެ އޮތީ ދުނިގޭ 7 ވަނައިގައި ކަމުންް އެއީ ލިބޭ ވަރަށް ބޮޑު ހިތްހަމަޖެހުމެއް ކަމަށް ޑރ. ޝާހު ވިދާޅުވިއެވެ.
