ވިޔަފާރިތަކަށް ދޫކުރާ ފައިސާގެ އެންމެ ބޮޑު އަދަދަކީ 3 މިލިއަން ރުފިޔާ ކަމަށް ބުނާ ބިލު ކޮމިޓީއަށް
އިސްލާހާއެކު ގާނޫނުގެ ދަށުން ހަދަންޖެހޭ ގަވައިދުތައް ހެދުމުގެ މަސްއޫލިއްޔަތު މިނިސްޓްރީއަށް
ރައްޔިތުންގެ މަޖިލީހުގެ ޖަލްސާއެއް ކުރިއަށް ދަނީ
ކުދި އަދި މެދު ފަންތީގެ ވިޔަފާރީގެ ގާނޫނަށް އިސްލާހު ގެނައުމުގެ ބިލު ދިރާސާ ކުރުމަށް ރައްޔިތުންގެ މަޖިލީހުގެ އިގްތިސާދީ ކޮމިޓީއަށް ފޮނުވައިފިއެވެ.
ބުދަ ދުވަހުގެ ޖަލްސާގައި މި ބިލު ކޮމިޓީއަށް ފޮނުވާފައިވަނީ އެކަމަށްޓަކައި ނެގުނު ވޯޓުގައި ބައިވެރިވި 48 މެންބަރުންގެ އިއްތިފާގުންނެވެ.
ސަރުކާރުގެ ފަރާތުން މި ބިލް ހުށަހަޅުއްވާފައި ވަނީ މަތިވެރި ދާއިރާގެ މެންބަރު ހަސަން ޒަރީރެވެ. ބިލް ހުށަހަޅުއްވަމުން މެންބަރު ވިދާޅުވީ މި ބިލު ހުށަހެޅުމުގެ ބޭނުމަކީ އެންމެ ކުދި، އަދި މެދު ފަންތީގެ ވިޔަފާރިތައް ކުރިއެރުވުމަށްޓަކައި، މިހާރު އެފަދަ ވިޔަފާރިތައް ގިންތިކުރުމުގައި ބަލާ މިންގަޑުތަކަށް އިސްލާހު ގެނެސް، ވިޔަފާރި ގިންތި ކުރުމުގައި ބޭނުންކުރާނެ އުސޫލެއް އެކުލަވާލުމަށް ކަމަށެވެ. އަދި ވިޔަފާރީގެ ކައުންސިލް އެކުލެވިގެންވާ ގޮތަށް ގެންނަންޖެހޭ އިސްލާހުތައް ގެނައުމަށް ކަމަށެވެ.
މެންބަރު ވިދާޅުވީ މި ގާނޫނުގެ ބޭނުމަށްޓަކައި ވިޔަފާރި ބެހިގެން ވަނީ ތިން ގިންތިއަކަށް ކަމަށެވެ. އެއީ އެންމެ ކުދި ފަންތީގެ ވިޔަފާރިއާއި، ކުދި ފަންތީގެ އިތުރުން މެދު ފަންތީގެ ވިޔަފާރި ކަމަށެވެ. މި ގިންތިތަކަށް ވިޔަފާރިތައް ފެތޭތޯ ބެލުމުގައި ވަކި މިންގަނޑުތަކެއް ވާ ކަމަށް ވިދާޅުވިއެވެ. އެގޮތުން އެންމެ ކުދި ވިޔަފާރީގެ މުވައްޒަފުންގެ އަދަދެއްގެ ގޮތުގައި ބަލަނީ 0ން ފެށިގެން 5 މީހުންނާ ހަމައަށެވެ. ޖުމްލަ އާމްދަނީ 5 ލައްކައާއި ހަމައަށް ބަލާއިރު ސާފު ފައިދާގެ ގޮތުގައި ބަލަނީ އަހަރެއްގެ މައްޗަށް 75،000 ރުފިޔާއެވެ.
މި އިސްލާހާއެކު ކައުންސިލުގެ ސެކްރެޓޭރިއެޓް ބެލެހެއްޓުމަށް އިކޮނޮމިކް މިނިސްޓްރީއާ ހަވާލު ކުރެވިގެން ދާނެއެވެ. އަދި ކައުންސިލުގެ ޖަލްސާ ކޮންމެ މަހަކު އެއް ފަހަރު ބޭއްވުމުގެ ބަދަލުގައި މީލާދީ އަހަރުގެ ކޮންމެ ކުއާޓަރެއްގައި މަދުވެގެން ދެފަހަރު ބޭއްވުމަށް ހަމަޖެހިގެން ދާނެއެވެ. މީގެ އިތުރުން ވިޔަފާރިތަކަށް ދޫކުރާ ފައިސާގެ އެންމެ ބޮޑު އަދަދަކީ 3 މިލިއަން ރުފިޔާއަށް ކަމަށް ވެސް މި އިސްލާހާއެކު ބަދަލުވެގެންދާނެއެވެ.
މި އިސްލާހުގައިވާ އިތުރު ކަންކަމުގެ ތެރޭގައި މި ގާނޫނުގެ ވަޒީފާ އަދާކުރާ ފަރާތްތަކާ ގުޅޭ ބާބު، 8 ވަނަ ބާބު އުނިކުރެވިގެން ދާނެއެވެ. އަދި ގާނޫނުގެ ދަށުން ހަދަންޖެހޭ ގަވައިދުތައް ހެދުމުގެ މަސްއޫލިއްޔަތު ކައުންސިލުން ހެދުމުގެ ބަދަލުގައި މިނިސްޓްރީން ހެދުމަށް ބަދަލުވެގެން ދާނެއެވެ.
