ދައުލަތުގެ ޚަރަދަށް ޒިންމާވުމުގެ ގާނޫނުގައި ވާ މުއްދަތަށް ދީފައިވާ އިސްތިސްނާ ހުއްދައިގެ މުއްދަތު އިތުރު ކޮށްދިނުމަށް ފިނޭންސް މިނިސްޓަރ އެދިވަޑައިގެންނެވި އެދިވަޑައިގެންނެވުން ދިރާސާކުރުމަށް އެކުލަވާލި ވަގުތީ ކޮމިޓީގެ މަސައްކަތް މިރޭގެ ނިޔަލަށް ނިންމާލުމަށް އެކޮމިޓީން ސުންގަނޑި ކަނޑައަޅައިފިއެވެ.

ދައުލަތުގެ ކޭޝްފްލޯ މެނޭޖް ކުރުމަށްޓަކައި މަރުކަޒީ ބޭންކް އެމްއެމްއޭ އިން ދަރަނި ނެގޭ ގޮތަށް ރައްޔިތުންގެ މަޖިލީހުން މިދިޔަ އަހަރު ދީފައިވާ ހުއްދަ އިތުރުކޮށްދިނުމުގެ މައްސަލަ ވަގުތީ ކޮމިޓީއަކަށް ފޮނުވުމަށް އަންގާރަ ދުވަހުގެ ޖަލްސާގައި މަސައްކަތްކުރިނަމަވެސް އެކަން ކާމިޔާބު ވެފައެއްނުވެއެވެ. އެއާއެކު ބުދަ ދުވަހުގެ ޖަލްސާއަށް ވަނީ އަނެއްކާވެސް މިމައްސަލަ ހުށަހަޅައިގެން ކުރިޔަށް ގެންދަވާފައެވެ.

ބުދަ ދުވަހުގެ ޖަލްސާގައި ވާހަކަދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، އަންގާރަ ދުވަހު ހުއްދައިގެ މުއްދަތު އިތުރުކުރުމާ ގުޅޭ ގޮތުން ގޮތެއް ނިންމިފައިނުވާތީ، އެއަށް ގޮތެއް ނިންމުމަށް މަޖިލީހުގެ ރައީސްގެ މޭޒުން އެ މައްސަލަ އަލުން ހުށަހަޅުއްވާ ކަމަށެވެ. މިއާއެކު ބުދަ ދުވަހުގެ ޖަލްސާގައި ވަނީ މައްސަލަ ދިރާސާކުރުމަށް 9 މެމްބަރުންގެ ވަގުތީ ކޮމިޓީއެއް އެކުލަވާލާފައެވެ.

ކޮމިޓީގެ މަސައްކަތް ފަށާފައިވާއިރު ކޮމިޓީން ނިންމާފައިވަނީ މަސައްކަތް މިރޭގެ ނިޔަލަށް ނިންމުމަށެވެ.

އަދި މިކަން ދިރާސާކުރުމަށްޓަކައި ފިނޭންސް މިނިސްޓަރާއި އެމްއެމްއޭގެ ގަވަރުނަރު އަދި އޮޑިޓަރ ޖެނެރަލާއި ބައްދަލުކުރުމަށް ކޮމިޓީން ވަނީ ނިންމާފައެވެ. މީގެއިތުރުން ފިނޭންސް މިނިސްޓްރީން ބޭނުންވާ މައުލޫމާތުތައް ލިޔުމުން ހޯދުމަށްވެސް ވަނީ ކޮމިޓީން ނިންމާފައެވެ.

ފިނޭންސް މިނިސްޓަރާއި އެމްއެމްއޭގެ ގަވަރުނަރު އަދި އޮޑިޓަރ ޖެނެރަލާއި ބުދަ ދުވަހު ކޮމިޓީން ބައްދަލުކުރުމަށްފަހު ބުދަ ދުވަހުގެ ރޭ ބައްދަލުވުމެއް ބާއްވައި ވަކިގޮތެއް ނިންމުމަށް ކޮމިޓީން ވަނީ ނިންމާފައެވެ.

ކޮވިޑުގެ ބަލިމަޑުކަމުގެ ތެރެއިން މިދިޔަ އަހަރުގެ އޭޕްރީލް މަހު ފިނޭންސް މިނިސްޓްރީން ވަނީ ދައުލަތުގެ ޚަރަދަށް ޒިންމާވުމުގެ ޤާނޫނުން އިސްތިސްނާ ހާލަތެއް ގެނައުމުގެ ހުއްދަ މަޖިލީހުން ދީ އެލިމިޓް 4.4 ބިލިއަން ރުފިޔާއަށް އިތުރުކޮށްދިނުމަށް އެދިފައެވެ. އަދި އެއް އަހަރު ދުވަހުގެ މުއްދަތަކަށް އެ އަނބުރާ ދެއްކުން ފަސްވާގޮތަށް ދައުލަތުގެ ޚަރަދަށް ޒިންމާވުމުގެ ގާނޫނަށް އަމަލު ކުރުން އިސްތިސްނާ ކޮށްދިނުމުގެ ހުއްދައަކަށް ވަނީ އެދިފައެވެ. އެހުއްދަ މިމަހުގެ 26 ވަނަ ދުވަހު ހަމަވާއިރު ފިނޭންސް މިނިސްޓްރީން އަނެއްކާވެސް ވަނީ މުއްދަތު އިތުރުކޮށްދިނުމަށް ހުށަހަޅާފައެވެ.

ގާނޫނުގައި ބުނާ ގޮތުން، މަޖިލީހަށް އެ އިސްތިސްނާ ކުރެވެނީ ގުދުރަތީ ނޫނީ އިގްތިސާދީ ކާރިސާތަކުގެ ދަނޑިވަޅުތަކުގައެވެ.